(ភ្នំពេញ) ៖ នៅរសៀលថ្ងៃទី៣០ ខែសីហា ឆ្នាំ២០២២ ឯកឧត្តម ទូច វណ្ណៈ ប្រធានគណៈកម្មាធិការប្រតិបត្តិសមាគមសម្ព័ន្ធសារព័ត៌មានឯករាជ្យ ដែលហៅកាត់ថា( IPA) បានអញ្ជើញជួបសំណេះសំណាលជាមួយចាងហ្វាង និងនិពន្ធនាយកសារព័ត៌មាន ចំនួន ១៨អង្គភាព នៅទីស្នាក់របស់ការសមាគមសម្ព័ន្ធសារព័ត៌មានឯករាជ្យ ផ្ទះលេខ ២២A ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ថ្លែងនៅក្នុងឱកាសនោះ ឯកឧត្តម ទូច វណ្ណៈ បានបង្ហាញពីសមាគមសម្ព័ន្ធសារព័ត៌មានឯករាជ្យ
ជាសមាគមក្រៅរដ្ឋាភិបាល ចុះបញ្ជីដោយក្រសួងមហាផ្ទៃ លេខ ១០៥៩ ប្រក. ចុះថ្ងៃទី២៤ ខែមីនា ឆ្នាំ២០២២ ដែលមានឯកឧត្តម ទូច វណ្ណៈ ជាប្រធាន ។ សមាគមនេះមានគោលដៅសំខាន់ក្នុងការកៀរគរអង្គភាពសារព័ត៌មាន និងអ្នកសារព័ត៌មាន ព្រមទាំងសិស្ស និស្សិត យុវជន យុវនារី ចូលជាសមាជិក រួមគ្នាធ្វើសកម្មភាពដើម្បីប្រជាពលរដ្ឋ និងសង្គមជាតិទាំងមូល ។

សមាគមសម្ព័ន្ធសារព័ត៌មានឯករាជ្យ មានប្រធានកិត្តិយស ១រូប ប្រធានក្រុមប្រឹក្សាភិបាល ១រូប អនុប្រធានក្រុមព្រឹក្សា ១២រូប និងសមាជិក ក្រុមប្រឹក្សាភិបាល ១៥រូប មានទីប្រឹក្សា ចំនួន ៧រូប មានគណៈកម្មាធិការប្រតិបត្តិ ចំនួន ៥៣រូប និងសមាជិក សមាជិកា ចំនួន ៥៣០រូប ព្រមទាំងអង្គភាពសារព័ត៌មាន ចំនួន ២៣ និងអ្នកសារព័ត៌មានមួយចំនួន ជាសមាជិក ។

សមាគមសម្ព័ន្ធសារព័ត៌មានឯករាជ្យ មានអង្គការសមាគមនក្រៅរដ្ឋាភិបាល ជាដៃគូសហការ ចំនួន ១០ និងក្រុមហ៊ុន សហគ្រាសឯកជន ជាដៃគូសហការចំនួន ១៥ ។

ឯកឧត្តម ទូច វណ្ណៈ បានបន្តទៀតថា សកម្មភាពរបស់សមាគមសម្ព័ន្ធសារព័ត៍ឯករាជ្យ គឺផ្ដោតទៅលើការងារសង្គម និងវិស័យសារព័ត៌មាន ព្រមទាំងជួយសម្របសម្រួលការពារបងប្អូនអ្នកសារព័ត៌មាន តាមផ្លូវច្បាប់ រួមសុខរួមទុក្ខ និងចែករំលែកឱ្យគ្នាទៅវិញទៅមក។

ឆ្លើយតបនៅក្នុងកិច្ចប្រជុំនេះដែរ ថ្នាក់ដឹកនាំសារព័ត៌មានទាំងអស់ បានសម្ដែងនូវក្តីរីករាយ និងកោតសរសើរចំពោះសមាគមសម្ព័ន្ធសារព័ត៌មានឯករាជ្យ ដែលទើបតែបង្កើតថ្មី តែមានការគាំទ្រ ជាខ្លាំងពីសំណាក់មហាជនទូទៅ ក្រុមហ៊ុន និងអង្គការ សមាគមក្រៅរដ្ឋាភិបាល។ ដែលជាកម្លាំងចិត្តមួយ សម្រាប់អង្គភាពសារព័ត៌មាន ក៏ដូចជាបងប្អូនសារព័ត៌មាន ក្នុងការចូលរួមជាមួយសមាគម ដើម្បីបន្តដំណើរទៅមុខដោយទំនុកចិត្ត។

ជាចុងក្រោយ ឯកឧត្តម ទូច វណ្ណៈ បានថ្លែងអំណរគុណយ៉ាងជ្រាលជ្រៅបំផុតចំពោះចាងហ្វាង និងនិពន្ធនាយកសារព័ត៌មានទាំងអស់ ដែលបានចំណាយពេលវេលាដ៏មានតម្លៃចូលរួមពិធីសំណេះសំណាល ពិសេសបានសម្រេចចិត្តចូលរួមជាមួយសមាគម ប្រកបដោយបេះដូង ដើម្បីរួមគ្នាផ្សព្វផ្សាយពីសមិទ្ធផលនានារបស់រដ្ឋាភិបាល និងថ្នាក់ក្រោមជាតិ ដែលសម្រេចបាន ឲ្យកាន់តែទូលំទូលាយថែមទៀត ។ ក្នុងនោះដែរ ឯកឧត្តម ក៏បានជូនពរដល់ថ្នាក់ដឹកនាំសារព័ត៌មានទាំងអស់ ជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

អត្ថបទ ៖ សេង បូលីន
រូបភាព ៖ ទឹម ស៊ីវឿន