អាជ្ញាធរក្រុងប៉ោយប៉ែតនិងកងកម្លាំងចម្រុះចុះរៀបចំសណ្តាប់ធ្នាប់ និងជូនដំណឹងឲ្យរុះរើ បញ្ឈប់ការតាំងលក់លើចំណីផ្លូវ និងកាត់សំយ៉ាបលយចូលមកផ្លូវនៅចំណុចជុំវិញផ្សារត្រីប៉ោយប៉ែត!
ខេត្តបន្ទាយមានជ័យ ៖ នៅព្រឹកថ្ងៃសុក្រ ១៤ រោច ខែស្រាពណ៍ ឆ្នាំខាលចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២៦ ខែសីហា ឆ្នាំ២០២២នេះលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំក្រុមការងារ មានការចូលរួម កងកម្លាំងចម្រុះ អាជ្ញាធរសង្កាត់ប៉ោយប៉ែត និងសង្កាត់អូរជ្រៅ អង្គភាពភូមិប្រជាការពារភូមិ ចុះរៀបចំសណ្តាប់ធ្នាប់ និងជូនដំណឹងឲ្យរុះរើ បញ្ឈប់ការតាំងលក់លើចំណីផ្លូវ និងកាត់សំយ៉ាបលយចូលមកផ្លូវនៅចំណុចជុំវិញផ្សារត្រី ប៉ោយប៉ែត ស្ថិតនៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសនោះដែរ៖លោក គាត ហ៊ុល អភិបាល ក្រុងប៉ោយប៉ែត ក៏បាន អំពាវនាវដល់បងប្អូនប្រជាពលរដ្ឋដែលបានតាំងលក់លើផ្លូវ និងកាត់សំយ៉ាបលយចូលមកចំណីផ្លូវសូមចូលរួមសហការជាមួយអាជ្ញាធរគ្រប់លំដាប់ថ្នាក់ក្នុងការរៀបចំសណ្តាប់ធ្នាប់សាធារណៈឲ្យមានរបៀបរៀបរយ និងសូមឲ្យមានការស្វ័យរុះរើស្ម័គ្រចិត្តដោយខ្លួនឯង ។
រដ្ឋបាលក្រុងនឹងទុកឱសានវាទរយៈពេល០៩ថ្ងៃ ក្នុងការរុះរើចាប់ថ្ងៃចុះណែនាំជូនដំណឹងនេះតទៅ ដោយផុតរយៈពេលកំណត់រដ្ឋបាលក្រុងនឹងចុះរុះរើ និងមិនទទួលខុសត្រូវលើការខូចខាតឡើយ។
អំពាវនាវដល់បងប្អូនប្រជាពលរដ្ឋដែលបានតាំងលក់លើផ្លូវ និងកាត់សំយ៉ាបលយចូលមកចំណីផ្លូវនេះ ដើម្បីទីក្រុងស្អាត និងមានរបៀបរៀបរយគឺត្រូវការចូលរួម និងផ្តើមចេញពីបងប្អូនទាំងអស់គ្នា ៕
