កំពត ៖ បន្ទាប់ពីមានភាពកង្វល់ដោយសារស្ថានភាពទឹកហក់ឡើងខ្ពស់គួរឲ្យបារម្មណ៍កាលពីថ្ងៃទី២៦ខែកក្កដា ឆ្នាំ២០១៧ម្សិលមិញនោះ គេសង្កេតឃើញវត្តមាន លោកចាន់ ចេស្តា អភិបាលខេត្តកំពត និងមន្ត្រីជំនាញ បានទៅត្រួតពិនិត្យស្ថានភាពទឹកនៅស្ថានីយទំនប់វារីអគ្គិសនីកំចាយ ដែលស្ថិតក្នុងឃុំម៉ាក់ប្រាង្គ ស្រុកទឹកឈូ ខេត្តកំពត។
ប៉ុន្តែបើតាមប្រភពពីក្រុមអាជ្ញាធរខេត្តកំពត បានបញ្ជាក់ថា នៅព្រឹកថ្ងៃទី២៧ខែកក្កដា ឆ្នាំ២០១៧នេះស្ថានភាពទឹកនៅលើស្ថានីយទំនប់វារីអគ្គិសនីកំចាយបានច្រកចុះបន្តិចវិញហើយៗបើប្រៀបធៀបកម្ពស់ទឹកកាលពីម្សិល បានឡើងរហូតដល់ទៅ១៤៩មែត្រ ប៉ុន្តែនៅព្រឹកនេះទឹកបានស្រកចុះនៅត្រឹមតែ១៤៨.៣០ម៉ែត្រប៉ុណ្ណោះ។ដោយឡែក ចំពោះស្ថានភាពទឹកជំនន់ភ្លៀងនៅតាមតំបន់មួយចំនួន នៃខេត្តកំពត ក៏បានស្រកចុះវិញជាបណ្តើរៗហើយ ដោយផ្ទៃទឹកនៅតាមដងព្រែកកំពត មានលំហូរខ្លាំងដែលអាចចញ្ចៀសទឹកចេញពីចំណុចដែលកំពុងប្រកាសអាសន្នបានផងដែរ។
ជាមួយនឹងភាពកង្វល់នេះដែរ អាជ្ញាធរខេត្តកំពត ក៏បានលើកឡើង និងប្រកាសជាសាធារណៈថា ថ្វីត្បិតស្ថានភាពទឹកលើស្ថានីយទំនប់វារីអគ្គិសនីមានកម្ពស់រហូតដល់១៤៩ម៉ែត្រ ប៉ុន្តែវាមិនស្ថិតក្នុងស្ថានភាពប្រកាសអាសន្ននោះទេ ដរាបណាកម្ពស់ទឹកឈានដល់កម្ពស់ជាង១៥០ម៉ែត្រឡើងទៅ ទើបជាករណីព្រួយបារម្មណ៍ និងត្រូវប្រកាសអាសន្ន ដើម្បីជូនដំណឹងដល់ប្រជាពលរដ្ឋក៏ដូចជាមហាជនដើម្បីបង្កើនការប្រុងប្រយ័ត្ន។ដូច្នេះ សូមបងប្អូនប្រជាពលរដ្ឋកុំភ័យខ្លាចពីកត្តាដូចខាងលើអី ព្រោះខណៈនេះទាំងអាជ្ញាធរ ទាំងជំនាញ ព្រមទាំងក្រុមហ៊ុនស្ថានីយវារីអគ្គិសនីកំចាយ កំពុងមានវិធានការទប់ស្កាត់ដោយហ្មត់ចត់បំផុត ដោយពុំមានការធ្វេសប្រហែសឡើយ។
ម្យ៉ាងទៀតអំឡុងពេលនេះ អាជ្ញាធរនិងសមត្ថកិច្ច បាននិងកំពុងយកចិត្តទុកដាក់ ដើម្បីចុះត្រួតពិនិត្យ ស្ថានភាពទឹកនៅគ្រប់ទីកន្លែងនៃភូមិសាស្ត្រទូទាំងខេត្ត សម្រាប់ឆ្លើយតប នូវគ្រោះមហន្តរាយផ្តើមពីធម្មជាតិនេះ។/ ណារិទ្ធ
