ខេត្តស្វាយរៀង៖ នាថៃ្ងចន្ទ ទី៣១ ខែសីហា ឆ្នាំ២០២៦ រសៀលនេះ មន្ទីរព័ត៌មានខេត្តស្វាយរៀង បានរៀបចំកិច្ចប្រជុំប្រចាំខែសីហា និងកំណត់ទិសដៅការងារបន្តសម្រាប់ខែកញ្ញា ឆ្នាំ២០២៦ ក្រោមអធិបតីលោក លោក ដាំ ឃុនពិសី ប្រធានមន្ទីរព័ត៌មានខេត្តស្វាយរៀង។ កិច្ចប្រជុំនេះមានការអញ្ជើញចូលរួមពីសំណាក់ លោក លោកស្រី ជាអនុប្រធានមន្ទីរ ប្រធាន-អនុប្រធានការិយាល័យទាំង៥ ព្រមទាំងមន្ត្រីរាជការមន្ទីរ និងមន្ត្រីកិច្ចសន្យានៃមន្ទីរព័ត៌មានខេត្តស្វាយរៀង។
បន្ទាប់ពីការិយាល័យជំនាញនីមួយៗបានរាយការណ៍អំពីសមិទ្ធផលការងារ ស្ថានភាពសន្តិសុខព័ត៌មាន ការផ្សព្វផ្សាយព័ត៌មានទាន់ហេតុការណ៍ក្នុងខេត្ត និងបញ្ហាប្រឈមនាពេលកន្លងមក លោកប្រធានមន្ទីរបានសម្តែងនូវការកោតសរសើរ និងវាយតម្លៃខ្ពស់ចំពោះខិតខំប្រឹងប្រែងរបស់ថ្នាក់ដឹកនាំ និងមន្ត្រីទាំងអស់ ដែលបានបំពេញភារកិច្ចផ្សព្វផ្សាយព័ត៌មានពិត លឿនរហ័ស និងទាន់ពេលវេលាជូនប្រជាពលរដ្ឋ។
សម្រាប់ទិសដៅបន្តលោកប្រធានមន្ទីរបានផ្ដាំផ្ញើរដល់មន្រ្តីមន្ទីរព័ត៌មានទាំងអស់ត្រូវពង្រឹងគុណភាព និងប្រសិទ្ធភាពនៃការប្រមូល និងផ្សព្វផ្សាយព័ត៌មានឲ្យកាន់តែសម្បូរបែប។ បន្តតាមដាន និងក្តាប់ព័ត៌មានក្លែងក្លាយ (Fake News) ដើម្បីឆ្លើយតប និងបកស្រាយបានទាន់ពេលវេលា ពង្រឹងកិច្ចសហការ និងសាមគ្គីភាពផ្ទៃក្នុងរវាងការិយាល័យទាំង៥ ព្រមទាំងការគ្រប់គ្រងវត្តមាន និងវិន័យការងាររបស់មន្ត្រីរាជការ។
ជាទីបញ្ចប់ លោក ដាំ ឃុនពិសី បានផ្តាំផ្ញើដល់មន្ត្រីរាជការទាំងអស់ ត្រូវបន្តអភិវឌ្ឍសមត្ថភាពឌីជីថលបន្ថែមទៀត ដើម្បីឆ្លើយតបទៅនឹងការវិវត្តនៃបច្ចេកវិទ្យាព័ត៌មាន និងបម្រើការងារជូនអង្គភាពឲ្យកាន់តែមានប្រសិទ្ធភាពខ្ពស់៕
