ភ្នំពេញ៖ បន្ទាប់ពីការប្រព្រឹត្តទៅពេញមួយថ្ងៃនៃពិធីបើក ការជជែកពិភាក្សា និងជំនួបនានាដ៏មមាញឹក នៅយប់ថ្ងៃព្រហស្បតិ៍ ទី២៧ ខែសីហា ឆ្នាំ២០២៦នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសន្និសីទប្រធានសភានៃអន្តរសភាលើកទី២ បានរៀបចំពិធីលៀងសាយភោជនប្រកបដោយដោយកិត្តិយសជូនដល់គណៈប្រតិភូ។
មានប្រសាសន៍ស្វាគមន៍ក្នុងពិធីលៀងសាយភោជននារាត្រីដ៏សែនមនោរម្យលើអគារដ៏ព្រណីតរបស់អគ្គនាយកដ្ឋានពន្ធដា សម្តេចតេជោ ហ៊ុន សែន បានបង្ហាញក្តីសោមនស្សរីករាយយ៉ាងក្រៃលែង ដែលបានរៀបចំពិធីលៀងសាយភោជន ដើម្បីស្វាគមន៍ និងជាកិត្តិយស ជូនគណៈប្រតិភូដែលបានអញ្ជើញ មកចូលរួមសន្និសីទប្រធានសភាអន្តរសភាលើកទី២ នៅរាជធានីភ្នំពេញ តាមការអញ្ជើញរបស់សម្តេច។
សម្តេចតេជោ ហ៊ុន សែន បានចាត់ទុកការអញ្ជើញចូលរួមរបស់គណៈប្រតិភូក្នុងសន្និសីទនេះ បានឆ្លុះបញ្ចាំងពីបំណងប្រាថ្នារួមចំពោះសន្តិភាព និងវិបុលភាព និងពីជំនឿចំពោះសារៈសំខាន់នៃកិច្ចសន្ទនា កិច្ចសហប្រតិបត្តិ ការ និងសាមគ្គីភាព ក្នុងពេលពិភពលោកកំពុងប្រឈមនឹងភាព មិនប្រាកដប្រជា ការបែកបាក់ និងជម្លោះកាន់តែខ្លាំងឡើង។
សម្តេចតេជោ ហ៊ុន សែន បានបង្ហាញសង្ឃឹមយ៉ាងមុតមាំថា ស្មារតីនៃកិច្ចសន្ទនា មិត្តភាព សាមគ្គីភាព និងសហប្រតិបត្តិការ ដែលយើងបានបង្ហាញនៅក្នុងសន្និសីទនេះ នឹងបន្តពង្រឹងទំនាក់ទំនងរវាងសភា និងប្រទេស។ ទន្ទឹមគ្នានេះ នឹងរួមចំណែកកាន់តែខ្លាំងដល់ការកសាងពិភពលោកមួយ ដែលមានសន្តិភាព ស្ថិរភាព យុត្តិធម៌ និងវិបុលភាពយូរអង្វែងសម្រាប់មនុស្សជាតិទាំងមូល។
សម្តេចប្រធានសន្និសីទប្រធានសភានៃអន្តរសភាលើកទី២ បានបន្តថា ការជួបជុំនារាត្រីនេះ ជាការផ្តល់នូវ ឱកាសដ៏ល្អមួយ ដើម្បីបន្តពង្រឹងទំនុកចិត្ត ចំណងមិត្តភាព និងភាពជិតស្និទ្ធរវាងគ្នា ក្នុងបរិយាកាសកាន់តែ កក់ក្តៅ និងស្និទ្ធស្នាល។ សម្តេចតេជោបានគូសរំលេចថា សម្រាប់កម្ពុជា បដិសណ្ឋារកិច្ចមិនគ្រាន់តែ ជាប្រពៃណីប៉ុណ្ណោះទេ ប៉ុន្តែជាការបង្ហាញនូវមិត្តភាព និងការគោរព។
សម្តេចតេជោ ជឿជាក់ថារាត្រីនេះនឹងផ្តល់ឱកាសជូនប្រតិភូ បានស្វែងយល់ និងរីករាយ ជាមួយបដិសណ្ឋារកិច្ច ម្ហូបអាហារ និងវប្បធម៌ខ្មែរ ហើយអ្វីដែលសំខាន់បំផុត គឺមិត្តភាពដ៏ស្មោះស្ម័គ្ររបស់ប្រជាជនកម្ពុជា។
បន្ទាប់ពីសម្តេចបានថ្លែងសុន្ទរកថាស្វាគមន៍ខ្លី ការពិសាភោជនាហារដ៏ឆ្ងាញ់ពិសា និងប្រកបដោយសោភណភាព ក៏បានចាប់ផ្តើម អមដោយផ្ទាំងទស្សនីយភាពជាទម្រង់សិល្បៈខ្មែរយ៉ាងច្រើនជាបន្តបន្ទាប់៕
