ប៉ៃលិន៖ នារសៀលថ្ងៃទី០៣ ខែកញ្ញា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន និងមន្ត្រីជំនាញពាក់ព័ន្ធ បានទទួលជួបសម្តែងការគួរសម និងពិភាក្សាការងារជាមួយ លោក ថោង សុផាណារិទ្ធិ ប្រធានក្រុមប្រឹក្សាភិបាល និងជាស្ថាបនិកវិទ្យាស្ថាន ព្រមទាំងសិស្សនិស្សិត នៃវិទ្យាស្ថានខេមរៈអន្តរជាតិនៃកម្ពុជា (KIIC) សាខាខេត្តប៉ៃលិន ដើម្បីលើកកម្ពស់វិស័យអប់រំថ្នាក់ឧត្តមសិក្សានៅក្នុងខេត្តប៉ៃលិន។
លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានមានប្រសាសន៍សម្ដែងនូវការអបអរសាទរ និងរីករាយ ចំពោះវិទ្យាស្ថានខេមរៈអន្តរជាតិនៃកម្ពុជា (KIIC) ដែលបានមកបើកសាខានៅក្នុងខេត្តប៉ៃលិន ក្នុងការជួយសម្រួលដល់សិស្សានុសិស្ស និងមន្ត្រីរាជការជុំវិញខេត្ត ដែលមិនមានលទ្ធភាពទៅបន្តការសិក្សាថ្នាក់ឧត្តមសិក្សានៅក្រៅខេត្ត ឬរាជធានីភ្នំពេញ ដើម្បីចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍធនធានមនុស្ស និងកាត់បន្ថយភាពក្រីក្ររបស់ប្រជាពលរដ្ឋ ក្រោមការដឹកនាំដ៏ខ្ពង់ខ្ពស់របស់សម្តេចមហាបវរអធិបតី ហ៊ុន ម៉ាណែត នាយករដ្ឋមន្ត្រី។
លោកជំទាវបណ្ឌិតអភិបាលខេត្ត បានមានប្រសាសន៍រំលឹកថា៖ នាពេលកន្លងមក ដើម្បីចូលរួមចំណែកកាត់បន្ថយការលំបាក ការចំណាយ និងកាត់បន្ថយហានិភ័យផ្សេងៗ ដែលអាចកើតមានឡើង ចំពោះសិស្សានុសិស្ស ក្នុងការធ្វើដំណើរទៅមក ដោយទោចក្រយាន ក្នុងគោលបំណងបន្តការសិក្សានៅតាមមហាវិទ្យាល័យ ឬសាកលវិទ្យាល័យនានាក្នុងខេត្តបាត់ដំបង រដ្ឋបាលខេត្តប៉ៃលិន បាន រៀបចំដាក់ឱ្យដំណើរការរថយន្តក្រុងសម្រាប់ធ្វើការដឹកជញ្ជូនសិស្សនិស្សិតជារៀងរាល់ចុងសប្តាហ៍ ដោយឥតគិតថ្លៃ ប្រកបដោយសុវត្ថិភាព។
ក្នុងឱកាសនោះដែរផងដែរ លោកជំទាវបណ្ឌិត បាន ស្រីមុំ ក៏បានមានប្រសាសន៍ថ្លែងអំណរគុណចំពោះ គណៈគ្រប់គ្រងវិទ្យាស្ថានខេមរៈអន្តរជាតិនៃកម្ពុជា (KIIC) ដែលបានផ្តល់ជូនអាហារូបករណ៍ដល់សិស្សនិស្សិតមានជីវភាពខ្វះខាត និងបានចូលរួមលើកកំពស់វិស័យអប់រំ ថ្នាក់ឧត្តមសិក្សានៅខេត្តប៉ៃលិន ក្នុងការផ្តល់ឱកាសដល់សិស្សនិស្សិត ដែលមានបំណងចង់បន្តការសិក្សា ដូច្នេះសូមមន្ទីរអប់រំ យុវជន និងកីឡាខេត្ត និងមន្ទីរការងារ និងបណ្តុះបណ្តាលវិជ្ជាជីវខេត្ត ត្រូវចូលរួមសហការជាមួយវិទ្យាស្ថាន ដើម្បីជាឧត្តមប្រយោជន៍ជាតិ និងប្រជាជន ពីព្រោះយុវជន គឺជាធនធានដ៏សំខាន់សម្រាប់ការកសាង និងអភិវឌ្ឍប្រទេសនាពេលអនាគត។
បើតាមការបញ្ជាក់របស់លោក ថោង សុផាណារិទ្ធិ ប្រធានក្រុមប្រឹក្សាភិបាល និងជាស្ថាបនិកនៃវិទ្យាស្ថានខេមរៈអន្តរជាតិនៃកម្ពុជា(KIIC) បានឱ្យដឹងថា៖ វិទ្យាស្ថានខេមរៈអន្តរជាតិនៃកម្ពុជា (KIIC) គឺជាគ្រឹះស្ថានឧត្តមសិក្សា ដែលបានទទួលស្គាល់ ដោយសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា តាមរយៈអនុក្រឹត្យលេខ ៨៦ អន ក្រ.បក ស្ថិតនៅក្រោមក្រសួងការងារ និងបណ្តុះបណ្តាលវិជ្ជាជីវៈ ដែលធ្វើការបណ្តុះបណ្តាលកម្រិតសិក្សាថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ដោយមាន ៦មហាវិទ្យាល័យ រួមមាន៖ ១-មហាវិទ្យាល័យ គ្រប់គ្រងពាណិជ្ជកម្ម និងវិទ្យាសាស្ត្រសេដ្ឋកិច្ច, ២-មហាវិទ្យាល័យ នីតិសាស្ត្រ និងរដ្ឋបាលសាធារណៈ, ៣-មហាវិទ្យាល័យ វិទ្យាសាស្ត្រ និងបច្ចេកទេស, ៤-មហាវិទ្យាល័យ កសិកម្ម និងកែច្នៃ, ៥-មហាវិទ្យាល័យ សិល្បៈមនុស្សសាស្ត្រ និងភាសា និង ៦-មហាវិទ្យាល័យ វិទ្យាសាស្ត្រអប់រំ និងនវានុវត្តន៍។
