កែប ៖ នៅព្រឹកថ្ងៃទី២៥ខែកក្កដា ឆ្នាំ២០១៧នេះ ស្របពេលមេឃកំពុងធ្លាក់ភ្លៀងយ៉ាងកំហុគផងនោះ រដ្ឋបាលខេត្តកែប ដឹកនាំដោយលោក កែន សត្ថា អភិបាលខេត្តកែប ក្នុងនោះក៏មាន មន្ទីរអង្គភាពពាក់ព័ន្ធនានាផងដែរ បានប្រារព្វពិធី រុក្ខទិវា ៩កក្កដា ដោយបានដាំដើមឈើ នៅតាមប្របមាត់សមុទ្រ សម្រាប់លម្អមាត់ឆ្នេរ។
លោក ថឹង បូរិន ប្រធានមន្ទីរកសិកម្មខេត្តកែប បានឲ្យដឹងថា ក្នុងព្រឹកនេះលោកបានសំរិតសំរាំង ដោយបាននាំយកកូនឈើចំនួន១២០ដើម ភាគច្រើនជាប្រភេទដើមស្ងាវ មកដាំនៅតាមសួនច្បារប្របឆ្នេរមាត់សមុទ្រ ចាប់ពីមុខមន្ទីរសេដ្ឋកិច្ចនិងហិរញ្ញវត្ថុខេត្ត បន្តដល់ចំណុចផែចាស់។លោកបានបញ្ជាក់ផងដែរថា ការងារដាំកូនឈើនេះនឹងត្រូវអនុវត្តន៍បន្តបន្ទាប់ក្នុងអំឡុងពេលខាងមុខ តាមទិសដៅដ៏ចម្បងរបស់អាជ្ញាធរខេត្ត ដែលជានិច្ចកាលបាននឹងកំពុងជម្រុញ គ្រប់ស្ថាប័ន អង្គភាពទូទាំងខេត្ត ត្រូវតែខិតខំចូលរួមស្តានិងអភិវឌ្ឍន៍តំបន់ទេសចរណ៍ ឲ្យកាន់តែមានភាពស្រស់បំព្រង គឺតាមរយៈការដាំដើមឈើឬរុក្ខជាតិផ្សេងៗនេះឯង។
ថ្លែងសំណេះសំណាល ក្នុងពិធីប្រារព្វរុក្ខទិវា ៩កក្កដា នេះដែរ លោកកែន សត្ថា បានគូសបញ្ជាក់ថា កិច្ចការដាំដើមឈើ គឺជាកាតព្វកិច្ចរបស់ពលរដ្ឋគ្រប់ៗរូប ដោលមិនសំដៅតែលើអាជ្ញាធរឬជំនាញឡើយ ។ យ៉ាងណាមិញ ការយកដើមឈើ ប្រភេទស្ងាវមកដាំនៅប្របមាត់ឆ្នេរបែបនេះ វាក៏ជាប្រការដ៏សំខាន់មួយ សម្រាប់ជួយរងសម្ពាធគ្រប់បែបយ៉ាង ពិសេសរង នូវឥទ្ធិពលខ្យល់បោកបក់ពីលម្ហសមុទ្រ ហើយ ដើមស្ងាវមានអត្ថប្រយោជន៍ក្នុងការទប់ទល់នឹងគ្រោះធម្មជាតិទាំងឡាយ ដោយប្រភេទឈើនេះក៏ធុននឹងបរិយាកាស វាមិនងាយដួលរលំដូចដើមឈើឯទៀតនោះទេ ។
លោកបានសង្កត់ធ្ងន់ទៀតថា ការដាំដើមឈើកាន់តែច្រើនកាន់តែប្រសើរ ព្រោះវាជារនាំការពារមួយយ៉ាងសំខាន់ ក្នុងការជួយរេរាំងកំឲ្យមានគ្រោះធម្មជាតិយាយីដល់ភូមិឋានរបស់លោកអ្នក កត្តាសំខាន់មួយទៀតសម្រាប់អបអរបុណ្យសមុទ្រ។
ដូច្នេះការធ្វើពិធី រុក្ខទិវា ៩កក្កដា២០១៧ ពិតជាបានជួយជម្រុញដល់វិស័យទេសចរណ៍ឲ្យមាននិរន្តរភាព និងមានសក្តានុពលកាន់តែខ្ពស់ ស្របពេលបច្ចុប្បន្នខេត្តកែប ដ៏បានជាប់ឈ្មោះជាខេត្តមាននិរន្តរភាពបរិស្ថាន គឺដីស្អាត ទឹកស្អាត ខ្យល់ស្អាត ទៀតផង។ យើងត្រូវចូលរួមដាំដើមឈើទាំងអស់គ្នា ព្រោះព្រៃឈើជាអនាគតរបស់មនុស្សជាតិ!ព្រៃឈើបម្រើសេវាទេសចរណ៍បែបធម្មជាតិ ដែលយើងទាំងគ្នាពុំអាចមើលរំលងវាបានឡើយ ៕
ណារិទ្ធ
