យុទ្ធនាការដើម្បីទីក្រុងស្អាត ក្រោមប្រធាន បាត់ដំបងស្អាតនៅក្នុងបរិវេណរមណីយដ្ឋានប្រាសាទបាណន់ស្រុកបាណន់!
ខេត្តបាត់ដំបង៖នៅព្រឹកថ្ងៃសុក្រ ១៥ កើត ខែស្រាពណ៍ ឆ្នាំខាល ព.ស២៥៦៦ ត្រូវនឹងថ្ងៃទី១២ ខែសីហា ឆ្នាំ២០២២ ដោយមានកិច្ចសហការយ៉ាងល្អប្រសើររវាង រដ្ឋបាលស្រុកបាណន់ រួមជាមួយនិងមន្ទីរទេសចរណ៍ខេត្តបាត់ដំបង បានរៀបចំនូវយុទ្ធនាការដើម្បីទីក្រុងស្អាត ក្រោមប្រធាន “បាត់ដំបងស្អាត” ដែលធ្វើការសម្អាត និងអនាម័យបរិស្ថាននៅបរិវេណរមណីយដ្ឋានប្រាសាទបាណន់។
ក្រោមអធិបតីភាព លោក ស្រេង សុខា អភិបាលនៃគណៈអភិបាលស្រុកបាណន់ និង លោក នួន ថា អនុប្រធានមន្ទីរ តំណាងដ៏ខ្ពង់ខ្ពស់ លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង ហើយនៅក្នុងយុទ្ធនាការនេះ ក៏មានការអញ្ជើញចូលរួមពីសំណាក់អធិការនៃអធិការដ្ឋាននគរបាលស្រុក មូលដ្ឋានកងរាជអាវុធហត្ថស្រុក ផ្នែកសឹករងស្រុក រដ្ឋបាលឃុំកន្ទឺ២ យុវជនស.ស.យ.កស្រុក លោកគ្រូ អ្នកគ្រូ និងសិក្សានុសិស្សនៃវិទ្យាល័យកន្ទឺ២ អនុវិទ្យាល័យបាណន់ប្រមាណ២០០ នាក់។
យុទ្ធនាការដើម្បីទីក្រុងស្អាតដែលបានរៀបចំឡើងនាពេលនេះ ជាផ្នែកមួយគាំទ្រគោលនយោបាយរបស់រាជរដ្ឋាភិបាលកម្ពុជា តាមរយៈក្រសួងទេសចរណ៍ គណៈកម្មាធិការជាតិវាយតម្លៃទីក្រុងស្អាត ក្នុងគោលបំណងសម្រេចឱ្យបាននូវភាពស្អាត អនាម័យ និងការយល់ដឹងជាសកលអំពីទីក្រុងស្អាត បរិស្ថានល្អ។ ម្យ៉ាងវិញទៀត ក្នុងយុទ្ធនាការនេះ ផ្តោតទៅលើសកម្មភាពសម្អាត និងការធ្វើអនាម័យបរិស្ថាន ព្រមជាមួយការអប់រំជាមូលដ្ឋានស្តីពីភាពស្អាត ដល់ភ្ញៀវទេសចរជាតិ-អន្តរជាតិ ប្រជាពលរដ្ឋមូលដ្ឋាន និងជាពិសេសគឺការចូលរួម ធ្វើឱ្យបរិស្ថានស្រុកបាណន់ ក៏ដូចជាខេត្តបាត់ដំបងទាំងមូល ឱ្យកាន់តែមានសោភ័ណភាពល្អស្អាត និងមានភាពស្រស់បំព្រង ស័ក្តិសមកិត្តិនាមជាទីក្រុងទេសចរណ៍ស្អាតអាស៊ាន និងជាជ័យលាភីទីក្រុងស្អាតកម្ពុជា ចំណាត់ថ្នាក់ផ្ការំដួលបីទង។
