សៀវភៅ ក្តីសង្ឃឹម ហ៊ុនម៉ានី នឹងធ្វើឱ្យសាធារណជន ស្គាល់ឯកឧត្តម ហ៊ុន ម៉ានី កាន់តែច្បាស់

នៅព្រឹកថ្ងៃទី១០ ខែសីហា ឆ្នាំ២០២២នេះ បានរៀបចំកិច្ចពិភាក្សា «ក្ដីសង្ឃឹម ហ៊ុន ម៉ានី» នៅ The Heritage Walk ក្រុងសៀមរាប ខេត្តសៀមរាប។​លោក លាង ដឺលុច អ្នកនិពន្ធសៀវភៅ ក្តីសង្ឃឹម ហ៊ុន ម៉ានី បានថ្លែងថា នៅក្នុង សៀវភៅនេះ និងបង្ហាញឱ្យសាធារណៈបានស្គាល់ ឯកឧត្តម ហ៊ុន ម៉ានី កាន់តែច្បាស់ អំពីការ តស៊ូ ការបរាជ័យ និងភាពជោគជ័យរបស់ឯកឧត្តម ជាអ្នកបន្តវេននយោបាយ ជំនាន់ក្រោយ។ តើអ្វីទៅជាក្តីសង្ឃឹមរបស់ ហ៊ុន ម៉ានី នៅក្នុងសៀវភៅនេះ?

លោក លាង ដឺលុច បានពន្យល់ ថា ក្តីសង្ឃឹម ហ៊ុន ម៉ានី នៅក្នុងសៀវភៅនេះ គឺក្តីសង្ឃឹមឯកឧត្តម គឺជាតិ និងប្រជាជន ដោយ ឯកឧត្តមចង់ឃើញ វិបុលភាពប្រជាជន ចង់ឃើញភាពរុងរឿងរបស់ប្រទេស និងប្រជាជន។ ដែលក្តីសង្ឃឹមនេះ និងធ្វើឱ្យឯកឧត្តម ហ៊ុន ម៉ានី ដើរទៅមុខជានិច្ច និងជាក្តីសង្ឃឹម របស់កម្ពុជា។​

ឯកឧត្តម ហ៊ុន ម៉ានី បានមានប្រសាន៍ថា ឯកឧត្តម មិនដែលធ្លាប់រំពឹងថា នឹងមាន សៀវភៅដែលសរសេរអំពីខ្លួនឯងនោះទេ ហើយឯកឧត្តមចាត់ទុកថា សៀវភៅ «ក្តីសង្ឃឹម ហ៊ុនម៉ានី» គឺអាចមានប្រយោជន៍ឱ្យមហាជនស្គាល់ ហ៊ុន ម៉ានី កាន់តែច្បាស់ក្រៅពីជាកូន នាយករដ្ឋមន្ត្រីមួយរូបនោះ។​

ឯកឧត្តមបន្តថា ក្រៅពីឱ្យមហាជនស្គាល់ សៀវភៅនេះក៏បានធ្វើឱ្យុឯកឧត្តមស្គាល់ខ្លួន ឯងកាន់តែច្បាស់ និងឈ្វេងយល់ពីសកម្មភាពការងាររបស់ខ្លួន ថាតើការធ្វើសកម្មភាពរបស់ ខ្លួនបានជះឥទ្ធិពលអ្វីខ្លះលើមនុស្សជុំវិញខ្លួន និងសង្គមជាតិ។

តាមរយៈសកម្មភាពរបស់ ឯកឧត្តម ដែលមានចងក្រងក្នុងសៀវភៅនេះ ឯកឧត្តមជឿជាក់ថា នឹងចែករំលែកមនសិការ ស្នេហាជាតិដល់យុវជនជំនាន់ក្រោយ និងចាប់ផ្តើមសកម្មភាពរបស់ខ្លួនក្នុងនាមជាយុវជនខ្មែរ មួយរូបដើម្បីបុព្វហេតុជាតិកម្ពុជា។ ឯកឧត្តម ហ៊ុន ម៉ានី បញ្ជាក់ថា សម្រាប់ក្តីសង្ឃឹមរបស់ ហ៊ុន ម៉ានី ទោះក្នុងឋានៈតួ នាទីអ្វីក៏ដោយ គឺត្រូវបន្តបេសកកម្មរបស់សម្តេចតេជោក្នុងការរកសេចក្តីសុខ សេចក្តីចម្រើន ជូនជាតិកម្ពុជា។​ឯកឧត្តម ហ៊ុន ម៉ានី ជាសមាជិករដ្ឋសភា និងជាប្រធានសហភាពសហព័ន្ធយុវជន កម្ពុជា។

ឯកឧត្តម ជាកូនទី៤ ក្នុងចំណោមបងប្អូន៥នាក់ របស់សម្តេចអគ្គមហា សេនាបតី តេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។​លោក គី សុខលីម សហស្ថាបនិកសារព័ត៌មានថ្មីៗឱ្យដឹងថា រយៈពេលជាង ៣ខែ ចាប់តាំងពីថ្ងៃបើកសម្ពោធដាក់លក់ជាផ្លូវការសៀវភៅ «ក្តីសង្ឃឹមហ៊ុនម៉ានី» បានលក់ដាច់អស់ ១ម៉ឺនក្បាល និងបានបោះពុម្ភជាលើកទី២ចំនួន១ម៉ឺនក្បាលបន្ថែមទៀត។ កិច្ចពិភាក្សានេះ មានការចូលរួមពីឯកឧត្តម ហ៊ុន ម៉ានី, លោក ហ្សង់-ហ្រ្វង់ស័រ តាន់, លោក ប៉ែន បូណា, លោក គី សុខលីម និងលោក លាង ដឺលុច រួមទាំងសិស្សនិស្សិត យុវជន ប្រជាពលរដ្ឋនៅក្នុង ខេត្តសៀមរាប ជិត២០០នាក់ នៅព្រឹកថ្ងៃទី១០ ខែសីហា ឆ្នាំ២០២២៕