ប្រកាសចូលកាន់តំណែងប្រធានមន្ទីរសុខាភិបាលថ្មី នៃខេត្តស្វាយរៀង, លោក គុជ ស៉ីថា ជំនួសលោក កែរ រដ្ឋា ដែលត្រូវចូលនិវត្តន៍

(ស្វាយរៀង)៖ លោក ម៉ែន វិបុល អភិបាលខេត្តស្វាយរៀង នៅព្រឹកថ្ងៃទី២២ ខែកក្កដាឆ្នាំ ២០២២នេះ បានអញ្ជើញចូលរួមប្រកាសផ្លាស់ប្ដូរមុខតំណែងប្រធាន អនុប្រធាមន្ទីរសុខាភិបាលខេត្តស្វាយរៀង។

ក្នុងនោះ លោកវេជ្ជបណ្ឌិត គុជ ស៊ីថា ត្រូវបានប្រកាសឲ្យចូលកាន់តំណែងជា ប្រធានមន្ទីរ ជំនួសលោកវេជ្ជបណ្ឌិត កែរ រដ្ឋា ដែលដាក់ឲ្យចូលវត្តន៍ និងលោកវេជ្ជបណ្ឌិត ថោង អ៊ុសុធា ជាអនុប្រធានមន្ទីរសុខាភិបាលខេត្តស្វាយរៀង។

ថ្លែងនៅក្នុងឱកាសនោះ លោក មែន វិបុល បានថ្លែងនូវការកោតសរសើរ ចំពោះលោកវេជ្ជបណ្ឌិត កែរ រដ្ឋា អតីតប្រធានមន្ទីរសុខាភិបាលខេត្ត ដែលបានខិតខំយកចិត្តទុកដាក់ធ្វើការងារ បម្រើសេវាសុខាភិបាលជូនប្រជាពលរដ្ឋបានល្អប្រសើរ ជាពិសេសនៅអំឡុងពេលកូវីដ១៩ កំពុងរាតត្បាតនៅក្នុងប្រទេសខិតខំពិនិត្យ និងព្យាបាលដោយយកចិត្តទុកដាក់ ដោយមិនខ្លាច នឿយហត់ឡើយ។

លោក ម៉ែន វិបុល ក៏បានថ្លែងជំរុញដល់លោកប្រធានមន្ទីរ និងអនុប្រធានមន្ទីរសុខាភិបាលថ្មី និងមន្ត្រីសុខាភិបាលទាំងអស់ត្រូវអនុវត្តតួនាទី និងភារកិច្ចរបស់ខ្លួនលើការគ្រប់គ្រង និងការផ្តល់សេវាសុខាភិបាលជូនប្រជាពលរដ្ឋ ប្រកបដោយការទទួលខុសត្រូវមានប្រសិទ្ធភាព តម្លាភាព ស្របតាមគោលការណ៍ និងនីតិវិធីថ្មីៗ ដូចបានកំណត់ក្នុងលិខិតបទដ្ឋានគតិយុត្តពាក់ព័ន្ធ និងការផ្ទេរមុខងារក្នុងវិស័យសុខាភិបាល មកក្រោមការគ្រប់គ្រងរបស់រដ្ឋបាលខេត្ត។

លោកបានបន្តថា ប្រធានមន្ទីរសុខាភិបាល ក៏ត្រូវមានការទទួលខុសត្រូវ និងគណនេយ្យភាព ចំពោះក្រុមប្រឹក្សា និងគណៈអភិបាលខេត្ត ក្នុងការគ្រប់គ្រងការចាត់ចែង ការគាំទ្រផ្នែកបច្ចេកទេស និងការតាមដានត្រួតពិនិត្យលើការផ្តល់សេវាសុខាភិបាល ដែលបានប្រគល់ទៅឲ្យរដ្ឋបាលខេត្ត។

លោកអភិបាលខេត្ត បានជំរុញដល់ថ្នាក់ដឹកនាំមន្ទីរសុខាភិបាលគ្រប់ជាន់ថ្នាក់ ព្រមទាំងបុគ្គលិកសុខាភិបាលទាំងអស់ ត្រូវសហការគ្នាឲ្យបានល្អ ក្នុងការបំពេញភារកិច្ចការងារ ពាក់ព័ន្ធនឹងការផ្តល់សេវាសុខាភិបាលនានា ជូនដល់ប្រជាពលរដ្ឋ លើការព្យាបាលជំងឺផ្សេងៗ និងត្រូវមានក្រមសីលធម៌ ក្នុងការបំពេញការងារ ត្រូវបន្តចូលរួមការអនុវត្តវិធានការបង្ការ ទប់ស្កាត់ការរីករាលដាលនៃជំងឺកូវីដ១៩ និងរាល់វិធានការចាំបាច់នានាផ្សេងទៀត ស្របតាមការណែនាំរបស់ប្រមុខរាជរដ្ឋាភិបាល និងក្រសួងសុខាភិបាល សំដៅធានាឱ្យបាននូវសុខុមាល ភាពសាធារណៈ និងបញ្ជៀសបាននូវហានិភ័យនៃការចម្លងមេរោគកូវីដ-១៩ នៅតាមសហគមន៍។

លោក ម៉ែន វិបុល បានថ្លែងផ្តាំផ្ញើរដល់លោក ប្រធានមន្ទីរ និងលោកអនុប្រធាន មន្ទីរសុខាភិបាលខេត្តថ្មី ត្រូវសហការគ្នាឲ្យបានល្អ មានសាមគ្គីភាពគ្នាជាធ្លុងមួយជាមួយមន្ត្រីស្ថាប័ន ពាក់ព័ន្ធនិងមន្ត្រីក្រោមឱវាទរបស់ខ្លួន ព្រមទាំងត្រូវចូលរួមប្រយុទ្ធប្រឆាំងឱសថក្លែងក្លាយ ពង្រឹងធនធានមនុស្សផ្នែកសុខាភិបាលឲ្យបានខ្លាំង។ សូមមន្រ្តីសុខាភិបាលទាំងអស់បន្តយកចិត្តទុកដាក់ជំរុញដល់ប្រជាពលរដ្ឋត្រូវបន្តចូលរួមចាក់វ៉ាក់សាំងការពារជំងឺកូវីដ-១៩ ដូសជំរុញ(ដូសទី៣ ៤ ៥) ឲ្យបានគ្រប់គ្នាដើម្បីមានភាពសុាំនៅក្នុងសហគមន៍ ក្នុងការបន្តនិរន្តរភាពការងារអភិវឌ្ឍប្រទេសឲ្យរីកចម្រើនជាបន្តបន្ទាប់ទៀត ក្រោមយោបាយឈ្នះឈ្នះរបស់សម្ដេចតេជោ ហ៊ុន សែន ជានាយករដ្ឋមន្ត្រី ដែលបានចាត់ទុកវិស័យសុខាភិបាល គឺជាវិស័យអាទិភាពមួយក្នុងការរួមចំណែកអភិវឌ្ឍប្រទេសជាតិ៕