ឈ្មួញបន្តសកម្មភាពដឹកជញ្ជូនឈើពីតំបន់ព្រៃឡង់ ឃុំមានរិទ្ធ ស្រុកសណ្ដាន់ទាំងយប់ទាំងថ្ងៃលោក កែ គីលីន ប្រធានស្នាក់ការច្រករបៀងព្រះអាទិត្យ សប្បាយប្រមូលលុយពីបទល្មើសព្រៃឈើ
ប្រជាសហគមន៍ការពារព្រៃឡង់ ក្នុងឃុំមានរិទ្ធ បានឲ្យដឹងថាលោក កែ គីលីន ប្រធានស្នាក់ការច្រករបៀងព្រះអាទិត្យ កំពុងតែសប្បាយប្រមូលលុយពីបទល្មើសព្រៃឈើយ៉ាងត្រជាក់ចិត្ត គ្មានញញើតអ្វីទាំងអស់។ អ្នកចូលព្រៃកាត់រំលំអារច្រៀកឈើ ហើយដឹកជញ្ជូនឈើតាមគោយន្តកន្រ្តៃ ឆ្លងកាត់ច្រករបៀងព្រះអាទិត្យ ចូលមកភូមិសំអោង និងភូមិស្វាយ ឃុំមានរិទ្ធ សុទ្ធតែត្រូវបង់លុយតាមការកំណត់របស់លោក កែ គីលីន ទើបអាចចៀសផុតពីការបង្ក្រាប។ រីឯលោក តុប កក្កដា ប្រធានមន្ទីរបរិស្ថានខេត្តកំពង់ធំ បានរក្សាភាពស្ងៀមស្ងាត់ទុកឲ្យលោក កែ គីលីន ប្រធានស្នាក់ការច្រកររបៀងព្រះអាទិត្យ និងក្រុមមន្រ្តីបរិស្ថាន ប្រចាំតំបន់ព្រៃឡង់ នៃឃុំមានរិទ្ធ ធ្វើអ្វីៗតាមអំពើចិត្ត។
សេចក្ដីរាយការណ៍ពីប្រជាពលរដ្ឋនៅភូមិសំអោង និងភូមិស្វាយ ឃុំមានរិទ្ធ បានឲ្យដឹងថា បច្ចុប្បន្ននេះឈ្មួញនៅតែអាចចូលកាប់ឈើដឹកជញ្ជូនឈើពីតំបន់ព្រៃឡង់ ចូលមកក្នុងមូលដ្ឋានពួកគាត់យ៉ាងអនាធិបតេយ្យដោយគ្មានមន្ត្រីជំនាញ ឬសមត្ថកិច្ចណាចាត់វិធានការបង្ក្រាបឈ្មួញទាំងនោះទេ។ ប្រភពខ្លះបានឲ្យដឹងថា បើគ្មានការបើកដៃពីសំណាក់លោក កែ គីលីន ប្រធានស្នាក់ការច្រករបៀងព្រះអាទិត្យ ទេនោះ គ្មាននរណាចូលកាប់ឈើ ដឹកជញ្ជូនឈើចេញពីព្រៃឡង់ ភូមិសំអោង និងភូមិស្វាយ ឃុំមានរិទ្ធ ស្រុកសណ្ដាន់ បានឡើយ។ ដូច្នេះហើយទើបមានសេចក្ដីអំពាវនាវឲ្យលោក ងួន រតនៈ អភិបាលខេត្តកំពង់ធំ និងលោក សាយ សំអាល់ រដ្ឋមន្រ្តីក្រសួងបរិស្ថាន ពិនិត្យឡើងវិញខ្លះផង ព្រោះព្រៃឡង់ ក្នុងឃុំមានរិទ្ធ ស្រុកសណ្ដាន់ កំពុងរងការបំផ្លាញយ៉ាងមហន្តរាយ។
ប្រភពពីប្រជាពលរដ្ឋបានឲ្យដឹងថា បើគ្មានការបើកដៃពីសំណាក់មន្រ្តីបរិស្ថាន មន្រ្តីរដ្ឋបាលព្រៃឈើ និងសមត្ថកិច្ចពាក់ព័ន្ធក្នុងឃុំមានរិទ្ធ ស្រុកសណ្ដាន់ ទេនោះ គឺឈ្មួញមិនអាចដឹកជញ្ជូនឈើតាមរថយន្តកន្រ្តៃ ចេញពីព្រៃទៅដល់គោលដៅបានទេ។ ហេតុនេះលោក ងួន រតនៈ អភិបាលខេត្តកំពង់ធំ និងលោក សាយ សំអាល់ រដ្ឋមន្រ្តីក្រសួងបរិស្ថាន មិនគួរបណ្ដែតបណ្ដោយតទៅទៀតទេ ព្រោះលោក កែ គីលីន ល្បីខាងប្រមូលលុយពីបទល្មើសព្រៃឈើជាយូរមកហើយ។ ប្រសិនបើនៅតែបណ្ដែតបណ្ដោយតទៅទៀតនោះ គឺព្រៃឡង់ នៅក្នុងឃុំមានរិទ្ធ ស្រុកសណ្ដាន់ ខេត្តកំពង់ធំ ត្រូវវិនាសក្នុងពេលឆាប់ៗខាងមុខ។រងចាំបន្ត
