ស្នងការរងនគរបាលខេត្តកំពត បានចូលទៅបំភ្លឺនៅក្រសួងមហាផ្ទៃរួចហើយ ក្រោយពីមានបណ្តឹងពីប្រជាពលរដ្ឋក្នុងស្រុកព្រៃនប់ ខេត្តព្រះសីហនុ

ភ្នំពេញ៖ ក្រសួងមហាផ្ទៃ បានចេញលិខិត កាលពីថ្ងៃទី១៤ ខែកក្កដា ឆ្នាំ២០២២ ទៅលោកឧត្តមសេនីយ៍ទោស្នងការនគរបាលខេត្តកំពត ដោយស្នើសុំឱ្យលោកវរសេនីយ៍ឯក ហួរ យ៉ៃ អត្តលេខ ៤២០៧៣ ស្នងការរង នៃស្នងការដ្ឋាននគរបាលខេត្តកំពត ចូលទៅបំភ្លឺនៅក្រសួងមហាផ្ទៃ តាមពាក្យបណ្តឹងរបស់ប្រជាពលរដ្ឋក្នុងស្រុកព្រៃនប់ ខេត្តព្រះសីហនុ ដោយចោទប្រកាន់ថា បានប្រព្រឹត្តកំហុសឆ្គងក្នុងការអនុវត្តតួនាទីភារកិច្ចនាពេលកន្លងមក។

ពាក់ព័ន្ធនឹងការចូលបំភ្លឺនៅនាយកដ្ឋានអធិការកិច្ច នៃនគរបាលរាជធានី-ខេត្ត នៃអគ្គាធិកាដ្ឋានក្រសួងមហាផ្ទៃ លោកវរសេនីយ៍ឯក ហួរ យ៉ៃ អតីតអធិការនគរបាលស្រុកព្រៃនប់ នៃខេត្តព្រះសីហនុ ដែលបច្ចុប្បន្នជាស្នងការរងនគរបាលខេត្តកំពត បានបញ្ជាក់ប្រាប់អ្នកយកព័ត៌មានCNC នៅថ្ងៃទី២០ ខែកក្កដា ឆ្នាំ២០២២ ថា លោកបានចូលខ្លួនទៅបំភ្លឺនៅក្រសួងមហាផ្ទៃរួចរាល់ហើយ កាលពីថ្ងៃទី១៨ ខែកក្កដា ឆ្នាំ២០២២។ 

លោក ហួរ យ៉ៃ បានបញ្ជាក់ ថា ពាក្យបណ្តឹងរបស់ប្រជាពលរដ្ឋទាំងនោះ បានធ្វើឡើងតាំងពីឆ្នាំ២០២១ នៅពេលដែលលោកកាន់តួនាទីជាអធិការស្រុកព្រៃនប់ ខេត្តព្រះសីហនុ ហើយដើមចមនៃរឿងនោះគឺ ការចុះរុះរើផ្ទះមិនស្របច្បាប់របស់ប្រជាពលរដ្ឋចំនួនបីគ្រួសារ ដែលបានទៅសាងសង់នៅលើដែលមានប្លង់កម្មសិទ្ធិស្របច្បាប់របស់គេ តែពេលនោះ លោកគ្រាន់តែបញ្ជាកម្លាំងទៅតែប៉ុណ្ណោះ។ 

ក្នុងបេសកកម្មចុះទៅរុះរើ មានគណៈកម្មាធិការចម្រុះរបស់ស្រុក ដើម្បីចុះអនុវត្ត ហើយការរុះរើនោះទៀតសោត គឺបានអនុវត្តទៅតាមនីតិវិធីច្បាប់ មិនមែនធ្វើឡើងទៅតាមចិត្តរបស់លោកនោះទេ។ ប្រសិនបើប្រជាពលរដ្ឋទាំងអស់នោះមិនសុខចិត្ត ហើយធ្វើការប្តឹងផ្តល់តាមច្បាប់គឺ ជាសិទ្ធិរបស់ពួកគេ ហើយលោកនឹងបន្តចូលខ្លួនទៅឆ្លើយបំភ្លឺនូវអ្វីដែលជាការពិត។ 

លោក ក៏បានបញ្ជាក់ដែរថា លោកអភិបាលស្រុកព្រៃនប់ បានឱ្យលោកមេឃុំរាម បានធ្វើការស្រាវជ្រាវរកអាសយដ្ឋានរស់នៅរបស់ប្រជាពលរដ្ឋដែលធ្វើការប្តឹងលោក ថាតើពិតជាប្រជាពលរដ្ឋរស់នៅក្នុងឃុំរាមដែរឬទេ តែក្រោយពីការស្រាវជ្រាវ ប្រជាពលរដ្ឋទាំងនោះមិនបានរស់នៅក្នុងឃុំរាម ស្រុកព្រៃនប់ ខេត្តព្រះសីហនុនោះទេ។

សូមបញ្ជាក់ថា តាមរយៈលិខិតឱ្យលោកវរសេនីយ៍ឯក ហួរ យ៉ៃ ស្នងការរងខេត្តកំពត ចូលខ្លួនទៅបំភ្លឺរបស់ក្រសួងមហាផ្ទៃ យោងទៅតាមពាក្យបណ្តឹងរបស់ប្រជាពលរដ្ឋចំនួន ៤គ្រួសារ និងមានចំណារពី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចុះថ្ងៃទី២៨ ខែតុលា ឆ្នាំ២០២១៕

អត្ថបទ៖ វង្ស សុធារម្យ