នគរបាលខេត្តមណ្ឌលគិរីឃាត់ខ្លួនជន សង្ស័យ៨នាក់ករណីជួញដូរគ្រឿងញៀនខុសច្បាប់
ដោយ:សុខុម
មណ្ឌលគិរី÷ កម្លាំងសមត្ថកិច្ចជំនាញ ខេត្ត មណ្ឌលគិរី សហការបង្ក្រាប ឃាត់ខ្លួនជន សង្ស័យចំនួន៨នាក់ ពាក់ព័ន្ធករណី ជួញដូរគ្រឿងញៀនខុសច្បាប់។
ប្រតិបត្តិការបង្ក្រាបនោះ គឺកម្លាំងជំនាញការិយាល័យប្រឆាំងគ្រឿងញៀន, អធិការនគរ បាលស្រុកកែវសីមា,កម្លាំងប៉ុស្តិ៍នគរបាលស្រែខ្ទុមនិងប៉ុស្តិ៍នគរបាលស្រែព្រះបង្ក្រាបបាននៅចំណុចស្រែអូរណាស្ថិតក្នុងភូមិស្រែអូរណា ឃុំស្រែខ្ទុម ស្រុកកែវសីមា កាលពីរសៀលថ្ងៃទី ១៨ខែកក្កដាឆ្នាំ២០២២។
សមត្ថកិច្ចបានប្រាប់ឲ្យដឹងថា ជនសង្ស័យទាំង៨នាក់សមត្ថកិច្ចស្រុកកែវសីមាបញ្ជូនទៅការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តមណ្ឌលគិរី ចោទប្រកាន់ ពីជួញដូរ រក្សាទុកនិងប្រើប្រាស់ធាតុញៀនខុស ច្បាប់ដើម្បីត្រៀមកសាងសំណុំរឿងបញ្ជូនទៅតុលាការ។
វត្ថុតាងដែលកម្លាំងសមត្ថកិច្ចឆែកឆេរនិងដកហូតបានរួមមាន÷សារធាតុញៀន មានសណ្ឋានជាក្រាមពណ៌សថ្លាចំនួន ១២កញ្ចប់ ក្នុងនោះ (៥កញ្ចប់ធំល្មម និង៧កញ្ចប់តូច ) ។
ទូរសព្ទដៃចំនួន ០៧គ្រឿង ម៉ាក Oppo ចំនួន ០៣ គ្រឿង. ម៉ាក vivo ចំនួន ០៣ គ្រឿង. ម៉ាក iPhone ចំនួន០១ គ្រឿង ។
ជញ្ជីងថ្លឹងថ្នាំញៀនចំនួន ០១ គ្រឿង។
ថង់វិចខ្ចប់ថ្នាំញៀន និងឧបករណ៍កែឆ្នៃសម្រាប់សេពគ្រឿងញៀនមួយចំនួន ។
ម៉ូតូ ចំនួន ៤គ្រឿង។កន្រ្តៃ ចំនួន. ០១.ដើម៕
