ខេត្តក្រចេះ ÷ ប្រភពព័ត៌មានច្បាស់ការពីខេត្តក្រចេះបានឲ្យដឹងថានៅវេលាម៉ោង៣.៣៣នាទីព្រឹក ព្រលឹមថ្ងៃទី១៧ ខែកក្តដា ឆ្នាំ២០២២ មានរថយន្តសាមយ៉ុង ២គ្រឿងកំពុងសំរុកដឹកជញ្ជូនអនុផលព្រៃឈើខុសច្បាប់រត់កាត់តាមផ្លូវ៧៣(ស្រុកឆ្លូង) ខេត្តក្រចេះទៅស្រុកឆ្លូង សំដៅទៅកាន់ដេប៉ូនានាក្នុងស្រុកក្រូចឆ្មារខេត្តត្បូងឃ្មុំយ៉ាងសកម្មតាមដងផ្លូវ។

ប្រភពបានឲ្យដឹងថាមេខ្មូតឈើដុះស្លែដឹកជញ្ជូនឈើឆ្លងកាត់ផ្លូវ៧៣(ឆ្លូង)រូបនេះគឺជាមេឈ្មួញឈើចាស់វស្សា២ទសវត្សរ៍យូរយារណាស់មកហើយដែលត្រូវបានគេដឹងឈ្មោះថា ចែមុំ ប្រចាំខេត្តក្រចេះ ដែលសមត្ថកិច្ចតាមដងផ្លូវមិនហានបង្ក្រាបសោះឡើយ ដោយខ្លាចឥទ្ធិពលដុល្លារចែមុំដឹកឈើនោះខ្លាំងណាស់។ ប្រភពបានបន្តថាមេឈ្មួញឈើចែមុំនេះមានរថយន្តសាមយ៉ុង២គ្រឿងសម្រាប់ធ្វើចរាចរណ៍ដឹកអនុផលព្រៃឈើខុសច្បាប់យ៉ាងសកម្មពីចំនុះអូគ្រៀង ឆ្លងកាត់មុខអាវុធហត្ថខេត្តក្រចេះតាមផ្លូវលេខ ៧៣(ស្រុកឆ្លូង) ទៅលក់នៅដេប៉ូស្រុកក្រូចឆ្មារយ៉ាងរីករាយ។ ប្រភពបន្ថែមថាពេលចែមុំជួបជំនាញម្តងៗ ចែមុំនោះថាខ្លួនបានបង់ខែឲ្យមេធំៗក្នុងខេត្តក្រចេះអស់ហើយ និងមានបងប្អូនធ្វើព្រះរាជអាជ្ញារងទៀតផង ទើបសមត្ថកិច្ចតាមដងផ្លូវមិនហានបង្ក្រាបឡើយ ដោយយកតែបាយទឹកបានហើយ។

ប្រភពបានស្នើសុំសមត្ថកិច្ចជំនាញតាមដងផ្លូវ៧៣ (ឆ្លូង) ជាពិសេសឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មាការជាតិ ទប់ស្កាត់ និងបង្ក្រាបបទ​ល្មើសធនធានធម្មជាតិ មេត្តាចាត់កម្លាំងតាមដងផ្លូវ៧៣ (ឆ្លូង)បង្ក្រាបផង ដើម្បីរក្សាដើម ឈើទុកជូនកូនចៅជំនាន់ក្រោយៗមើលផងទាន៕