ពិធីប្រកាសតែងតាំង និងផ្ទេរភារកិច្ចប្រធានសាខាគយនិងរដ្ឋករខេត្តប៉ៃលិន

ពិធីប្រកាសតែងតាំង និងផ្ទេរភារកិច្ចប្រធានសាខាគយនិងរដ្ឋករខេត្តប៉ៃលិន

តាមលិខិតបង្គាប់ការរបស់អគ្គនាយកដ្ឋានគយ និងរដ្ឋាករកម្ពុជាលេខ១៦១៩/២២ អ.គ.រ ចុះថ្ងៃទី០១ ខែកក្កដា ឆ្នាំ២០២២ ត្រូវបានប្រកាសតែងតាំងលោកយឹង សំអន អនុប្រធានសាខាគយ និងរដ្ឋករខេត្តស្វាយរៀងឱ្យមកបម្រើការងារជាប្រធានសាខាគយ និងរដ្ឋករខេត្តប៉ៃលិនជំនួសលោកសំ សុវណ្ណារិទ្ធ ប្រធានសាខាគយ និងរដ្ឋករខេត្តប៉ៃលិនដែលត្រូវទៅទទួលភារកិច្ចនៅកន្លែងថ្មី។

លោកយឹង សំអន ប្រធានសាខាគយ និងរដ្ឋករខេត្តប៉ៃលិនដែលទើបតែងតាំងថ្មីបានធ្វើការប្តេជ្ញាចិត្តយ៉ាងមុតមាំថា៖ នឹងខិតខំបម្រើការងារប្រមូលពន្ធអាករផ្សេងៗឱ្យបានលើសផែនការដែលបានគ្រោងទុករបស់អគ្គនាយកដ្ឋានគយ និងរដ្ឋាករកម្ពុជាព្រមទាំងសម្រួលពាណិជ្ជកម្មជាតិនិងអន្តរជាតិតាមរយៈការផ្តល់សេវាល្អជូនធុរៈជនដែលបំពេញធុរៈកិច្ចក្នុងដែលសមត្ថកិច្ចប្រកបដោយតម្លាភាព និងសុក្រិតភាព។ លោកបន្តថា នឹងពង្រឹងសាមគ្គីភាពផ្ទៃក្នុងឱ្យបានល្អជាមួយស្ថាប័នមន្ទីរអង្គភាពពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ជាពិសេសអនុវត្តយ៉ាងតឹងរឹងចំពោះទំនិញគេចពន្ធនានា។

លោក គោស៊ុំ ប៊ុនសឿត អភិបាលរងខេត្តបានមានប្រសាសន៍ថា លោកយឹង សំអន ដែលត្រូវបានថ្នាក់ដឹកនាំអគ្គនាយកដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុផ្តល់ទំនុកចិត្តតែងតាំងមុខតំណែងជាប្រធានសាខាគយ និងរដ្ឋាករខេត្តប៉ៃលិន ដើម្បីបន្តនិរន្តរភាពដឹកនាំសាខាគយ និងរដ្ឋាករខេត្តឱ្យទទួលបានជោគជ័យសម្រេចបានសមិទ្ធផលថ្មីៗបន្ថែមទៀត ជាពិសេសសម្រេចឱ្យបានតាមផែនការកំណត់ក្នុងការប្រមូលពន្ធនាំចេញ-ចូលប្រចាំឆ្នាំរបស់ក្រសួងសេដ្ឋកិច្ច និងហិរញ្ញវត្ថុ។

លោកអភិបាលរងខេត្តបានបន្តថា ប្រធានថ្មីត្រូវចូលរួមចំណែកផ្សព្វផ្សាយឱ្យប្រជាពលរដ្ឋបានយល់អំពីការបង់ពន្ធ និងប្រមូលពន្ធជូនរដ្ឋឱ្យបានច្បាស់លាស់ ពង្រឹងការទប់ស្កាត់នូវបទល្មើសពន្ធអាករគ្រប់ប្រភេទដោយសហការជាមួយកងកម្លាំងសមត្ថកិច្ចជំនាញ និងត្រូវអនុវត្តតាមគោលនយោបាយរបស់រាជរដ្ឋាភិបាលដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ឱ្យបានមុតមាំជានិច្ច និងអភិក្រមទាំងបួន ខំយកចិត្តទុកដាក់បំពេញភារកិច្ចដោយទទួលខុសត្រូវខ្ពស់បំផុត និងត្រូវធ្វើការបណ្តើរសិក្សាស្វែងយល់បណ្តើរ ត្រូវសាមគ្គីភាពផ្ទៃក្នុង មានទំនាក់ទំនងល្អជាមួយប្រជាពលរដ្ឋក៏ដូចជាមន្ត្រីរាជការគ្រប់លំដាប់ថ្នាក់ ត្រូវចាត់ទុកខ្លួនជាអ្នកបំរើសេវាសាធារណៈជូនប្រជាពលរដ្ឋគឺមិនមែនម្ចាស់លើប្រជាពលរដ្ឋនោះទេ។

ឯកឧត្តម ផា អេងវ៉េង អគ្គនាយករងនៃអគ្គនាយកដ្ឋានគយ និងរដ្ឋាករបានធ្វើការណែនាំលោកប្រធានសាខាគយ និងរដ្ឋាករខេត្តថ្មីត្រូវយកចិត្តទុកដាក់បន្ថែមទៀតបំពេញតួនាទី ភារកិច្ចដែលថ្នាក់ដឹកនាំប្រគល់ជូនដើម្បីធ្វើឱ្យការងារប្រមូលចំណូលពន្ធនៅខេត្តមានការអភិវឌ្ឍន៍និងរីកចម្រើន។

ជាពិសេសត្រូវប្រកាន់ភ្ជាប់នូវអភិក្រមរបស់ក្រសួងសេដ្ឋកិច្ច និងហិរញ្ញវត្ថុ ព្រមទាំងអភិក្រមទាំង៥ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាគឺ “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” និងបាវចនាពីរគឺកែទម្រង់ខាងក្នុង និងបង្កើតមិត្តខាងក្រៅ ដោយស្មារតីឯករាជ្យត្រូវមានទំនួលខុសត្រូវខ្ពស់បំពេញការងារដោយបង្ហាញពីចំណេះដឹង និងសមត្ថភាពជំនាញរបស់ខ្លួនទាំងផ្នែកទន់និងផ្នែករឹង។

ឯកឧត្តមបានបន្តថា ការផ្លាស់ប្តូរប្រធានសាខា គឺជាការចាំបាច់របស់ក្រសួងសេដ្ឋកិច្ច និងហិរញ្ញវត្ថុក្នុងការកៀងគរចំណូលថវិកាជាតិ។ ដើម្បឆ្លើយតបទៅនឹងប្រសិទ្ធភាពការងារឱ្យបានម៉ឺងម៉ាត់ ដោយស្មារតី ជំនាញវិជ្ជាជីវៈ ហើយត្រូវសហជាមួយអង្គភាពពាក់ព័ន្ធនិងបង្ការទប់ស្កាត់ការនាំចូលរថយន្តចង្កូតស្តាំ និងទំនិញគេចពន្ធនានា៕