កម្ពុជា-វៀតណាមប្តេជ្ញាបន្តកិច្ចសហប្រតិបត្តិការការពារសន្តិសុខ សណ្តាប់ធ្នាប់ ប្រែក្លាយព្រំដែននៃប្រទេសទាំងពីរប្រកបដោយសុខសន្តិភាព និងការអភិវឌ្ឍន៍
ខេត្តកែប ៖ នៅព្រឹកថ្ងៃទី១៥ ខែកក្កដា ឆ្នាំ២០២២នេះ ស្នងការដ្ឋាននគរបាលខេត្តកែបបានរៀបចំកិច្ចប្រជុំត្រួតពិនិត្យការងារសហប្រតិបត្តិការការពារសន្តិសុខសណ្តាប់ធ្នាប់ព្រំដែនរវាងស្នងការដ្ឋាននគរបាលខេត្តកែប កំពត ព្រះសីហនុ (កម្ពុជា) ជាមួយមន្ទីរនគរបាលខេត្តគៀនយ៉ាង (វៀតណាម) ឆ្នាំ២០២១ ក្រោយការរីករាលដាលនូវជំងឺកូវីដ-១៩ ជាសកល និងការខិតខំប្រយុទ្ធប្រឆាំងបង្ការទប់ស្កាត់របស់រាជរដ្ឋាភិបាលរបស់ប្រទេសទាំងពីរ។
ប្រតិភូនគរបាលខេត្តគៀនយ៉ាង វៀតណាមដឹកនាំដោយលោកវរសេនីយ៍ឯក ង្វៀង វ៉ាន់ហឹង នាយកមន្ទីរនគរបាលខេត្តគៀនយ៉ាង និង ប្រតិភូចំនួន១៤នាក់ ខណៈខេត្តកែបដឹកនាំដោយលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្ត និងប្រតិភូអមដំណើរចំនួន២០នាក់, ខេត្តកំពតដឹកនាំដោយលោកឧត្តមសេនីយ៍ត្រី ជៀវ សាមិត្ត ស្នងការរងនគរបាលខេត្ត និងប្រតិភូអមដំណើរចំនួន១៥នាក់។ ចំណែកខេត្តព្រះសីហនុដឹកនាំដោយលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត និងប្រតិភូអមដំណើរ១៩នាក់។
អង្គប្រជុំបានស្តាប់របាយការណ៍បូកសរុបលទ្ធផល នៃកិច្ចប្រតិបត្តិការការពារសន្តិសុខព្រំដែន បង្ការទប់ស្កាត់ បង្ក្រាបបទល្មើសនានា តាមតំបន់ព្រំដែនគោក និងតាមដែនទឹកប្រវត្តិសាស្ត្រ នៃប្រទេសទាំងពីរ រួមមាន ៖ បទល្មើសឆ្លងដែន បទល្មើសនេសាទ ការជួញដូរ មនុស្ស ការជួញដូរផ្លូវភេទ ការជួញដូរអាវុធ ការជួញដូរគ្រឿងញៀន បទល្មើសសេដ្ឋកិច្ច បទល្មើសព្រហ្មទណ្ឌ និងបទល្មើសផ្សេងៗ ទៀត ។
ក្នុងឱកាសនោះដែរ លោកនាយកមន្ទីរនគរបាលខេត្តគៀនយ៉ាងវៀតណាម និងលោកស្នងការនគរបាលទាំងបីខេត្តខាងកម្ពុជាបានមានប្រសាសន៍ដោយបានឯកភាពលេីរបាយការណ៍បូកសរុបលទ្ធផលការងារឆ្នាំកន្លងមក ព្រមទាំងប្តេជ្ញាចិត្តយ៉ាងមុតមាំបន្តកិច្ចសហ ប្រតិបត្តិការការពារសន្តិសុខ រក្សាសណ្តាប់ធ្នាប់ព្រំដែនរវាងប្រទេសទាំងពីរ ប្រែក្លាយព្រំដែន នៃប្រទេសទាំងពីរប្រកបដោយសុខ សន្តិភាព និងការអភិវឌ្ឍន៍ និងបន្តរឹតចំណងមិត្តភាពឲ្យកាន់តែរឹងមាំបន្ថែមទៀត ព្រមទាំងរួមគ្នាផ្សព្វផ្សាយអំពីវិធានការបង្ការជំងឺកូវីដ-១៩ ឲ្យបានល្អបន្ថែមទៀតផងដែរ៕
