ទីតាំងល្បែងស៊ីសងដ៏ធំប្រចាំខណ្ឌទួលគោក យីហោ ហេបភីណេត របស់ ហី ទូច ចាប់បើកដំណើរការវិញហើយ
(ភ្នំពេញ)៖ ទីតាំងល្បែងស៊ីសងដ៏ធំប្រចាំខណ្ឌទួលគោក យីហោ ហេបភីណេត ជាច្រេីនកន្លែង ដែលមានម្ចាស់ឈ្មោះ ហី ទូច ចាប់ផ្តេីមបេីកដំណេីរការវិញហេីយដេីម្បីស្វាគមន៍អតិថិជនមកពីគ្រប់មជ្ឈដ្ឋានទាំងថ្ងៃ ទាំងយប់។
គួររំលឹកផងដែរថា កាលពីពេលថ្មីៗនេះក្រសួងសុខាភិបាលបានចេញសេចក្តីប្រកាសព័ត៌មានមួយជូនប្រជាពលរដ្ឋទូទាំងប្រទេសថាសូមមានការប្រុងប្រយ័ត្នចំពោះជំងឺកូវីត១៩ ដែលទើបនឹងបម្លែងខ្លួនថ្មីឈ្មោះថា(អូមីក្រុង) ។ ដោយឡែកទីតាំងល្បែងស៊ីសងមួយនេះហាក់មិនញញើតនិងមិនគោរពតាមសរាចរណែនាំរបស់រាជរដ្ឋាភិបាលនិងក្រសួងសុខាភិបាលនោះឡេីយ។
ប្រជាពលរដ្ឋបានសំណូមពរដល់អាជ្ញាធរមានសមត្ថកិច្ចពិសេសលោក ជា ពិសី អភិបាលខណ្ឌទួលគោក និងលោកអធិការខណ្ឌទួលគោក សូមមេត្តាចុះត្រួតពិនិត្យនិងបង្ក្រាបល្បែងស៊ីសងខាងលើនេះដើម្បីរក្សាការពារសន្តិសុខនិងភូមិឃុំមានសុវត្ថិភាពទាំង៧ចំណុចរបស់ក្រសួងមហាផ្ទៃជាពិសេសគឺសេចក្តីសុខរបស់ប្រជាពលរដ្ឋក្នុងមូលដ្ឋាន៕
សូមជម្រាបថា កន្លងមកលោក ឃួង ស្រេង អភិបាលរាជធានីភ្នំពេញបានប្រាប់ឱ្យ អភិបាលខណ្ឌទាំង១៤ចុះបង្ក្រាបទីតាំងដែលបង្កប់ល្បែងភ្នាល់គ្រប់ប្រភេទដូចជា ហ្គេមបាញ់ត្រី ហ្គេម Internet Online និងល្បែងស៊ីផ្សេងៗទៀត។ លោក ឃួង ស្រេង បានបញ្ជាក់ទៀតថា បើសិនជារកឃើញថា ទីតាំងណាដែលបើកល្បែងស៊ីសងហ្គេមបាញ់ត្រី សេវាកម្ម Internet លួចបង្កប់ការលេងល្បែងស៊ីសង Online ត្រូវតែចាត់វិធានការតាមផ្លូវច្បាប់ និងបិទអាជីវកម្មនោះ ហើយត្រូវធ្វើការឃាត់ខ្លួនម្ចាស់អាជីវកម្មផងដែរ។
ការបញ្ជានេះធ្វើឡើងក្នុងកិច្ចប្រជុំគណៈបញ្ជាឯកភាពរាជធានីភ្នំពេញដោយការចូលរួមពីអភិបាលរងរាជធានីភ្នំពេញ ស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានី អាជ្ញាធរខណ្ឌទាំង១៤ រួមទាំងមន្ដ្រីជំនាញពាក់ព័ន្ធជាច្រើនរូបទៀត។
សូមបញ្ជាក់ថា លោក ឃួង ស្រេង បានសង្កត់ធ្ងន់ថា អាជ្ញាធរមានសមត្ថកិច្ចក៏ដូចជា អាជ្ញាធរដែនដី ត្រូវត្រួតពិនិត្យឱ្យបានម៉ត់ចត់បំផុតមិនត្រូវអនុញ្ញាតឱ្យមានល្បែងស៊ីសងប្រភេទហ្គេមបាញ់ត្រី និងអាជីវកម្ម ណេតកាហ្វេអនឡាញ ដែលមានបង្កប់ល្បែងស៊ីសងនៅក្នុងមូលដ្ឋានជាដាច់ខាត ក្នុងករណីដែលមាននៅក្នុងមូលដ្ឋានរបស់ខ្លួនត្រូវបង្ក្រាបភ្លាមៗទាំងអ្នកលេង និងម្ចាស់ទីតាំងដែល ប្រកបអាជីវកម្មខុសច្បាប់នេះ៕
