ដូនចាស់ជរាទូរគត វ័យ៧៦ឆ្នាំ និងមានជំងឺប្រចាំកាយម្នាក់ រស់នៅក្នុងខ្ទមកំសត់ តស៊ូលក់បន្លែចិញ្ចឹមជីវិត នៅក្រុងស្វាយរៀង អំពាវនាវរកជំនួយ
(ស្វាយរៀង)៖ លោកយាយទូរគតម្នាក់ឈ្មោះ តូច ផាន្នី ហៅអាន អាយុ៧៦ឆ្នាំ ចាស់ជរា មានជំងឺប្រចាំកាយ រស់នៅម្នាក់ឯង ស្ថិតក្នុងភូមិតា ណ សង្កាត់ស្វាយតឿ ក្រុងស្វាយរៀង ដោយលោកយាយតស៊ូ លក់បន្លែ ត្រកួន និងកណ្តៀងមួយកញ្ជ្រែង ដើម្បីចិញ្ចឹម ជីវិតប្រចាំថ្ងៃ ទទូចសូមអំពាវនាវរកជំនួយពីសប្បុរសជននានា។
លោកយាយ តូច ផាន្នី បានឱ្យដឹងថា ឆ្នាំនេះ លោកយាយកាន់តែជរា ដោយជំងឺប្រចាំកាយពិបាកក្នុងការធ្វើដំណើរជិះកង់ដឹកបន្លែមកលក់នៅផ្សារ ទោះបីជាមានជំងឺប្រចាំកាយយ៉ាងណាក៏ដោយនៅតែតស៊ូ បេះបន្លែត្រកួន និងកណ្តៀងប្រមាណជាង១០ដុំ ដឹកកង់យកមកលក់នៅក្នុងផ្សារក្រមួន ស្ថិតក្នុងភូមិរោងបន្លែសង្កាត់ស្វាយ ក្រុងស្វាយរៀង។
លោកយាយ អាន បានរៀបរាប់អំពីរដំណើរជីវិតដ៏កំសត់របស់គាត់ថា លោកយាយមានស្វាមី ឈ្មោះ ប៉ាង ស៊ុត អតីតជាទាហាន សម័យរាជានិយម ក្រោយពីធ្វើរដ្ឋប្រហារថ្ងៃ១៨ ខែមីនា ឆ្នាំ១៩៧០ ស្វាមី លោកយាយត្រូវមេបញ្ជាការបញ្ជូនទៅឈជើងនៅខេត្តក្រចេះ កាលណុះលោកយាយទើបតែឆ្លងទន្លេរួច បានជាង១០ថ្ងៃ បានកូនស្រីមួយ។ ចំណែកលោកយាយរស់នៅជាមួយម្តាយ នៅខេត្តស្វាយរៀង ក្រោយមកបាន២ខែ កូនស្រីក៏មានជំងឺស្លាប់បាត់ទៅ លោកយាយត្រូវរស់នៅបែកពីប្តីរហូតដល់ឆ្នាំ១៩៧៥ ទើបជួបជុំជាមួយស្វាមីវិញ នៅភូមិព្រៃឈ ឃុំព្រៃឈ ស្រុកកំពង់ត្របែក ខេត្តព្រៃវែង ដល់ចុងឆ្នាំ១៩៧៨ ខ្មែរក្រហម គេស៊ើបដឹងថា ប្តីគាត់ធ្វើទាហាន លន់ នល់ ពួកខ្មែរក្រហមប៉ុលពត បានចាប់ប្តីរបស់គាត់យកទៅសម្លាប់ចោលតែម្តង។ ដល់ឆ្នាំ១៩៧៩ ក្រោយថ្ងៃរំដោះ ៧ មករា លោកយាយ និងម្តាយក៏បាននាំគ្នាមករស់នៅស្រុកកំណើត ភូមិតាណ នេះរហូតមក។
លោកយាយបានបន្តថា ក្រោយមកឪ ពុកម្តាយចាស់ជរា ក៏បានស្លាប់ទៀត រូបគាត់រស់នៅម្នាក់ឯង គ្មានដីធ្លី និងគេទេ ប្រកបមុខរបរ ស៊ីឈ្នួលដកស្ទូងឱ្យគេ ហើយបានសុំដីភូមិប្អូនស្រី សង់ខ្ទមរស់នៅរហូតមក។ រហូតមកដល់ឆ្នាំ២០០០ ក៏មានជំងឺរោគស្ត្រីប្រចាំកាយ ស្រុតស្បូន ក្រោយមកគ្រូពេទ្យធ្វើការវះកាត់ស្បូនចោល ក៏ប៉ុន្តែ ជំងឺរោគស្ត្រីនៅតែបៀតបៀនបន្តរហូតមក និងមានជំងឺលើសឈាម ឈឺសន្លាក់រ៉ាំរ៉ៃដល់សព្វថ្ងៃ។
លោកយាយទុរគតរូបនេះ បានបញ្ជាក់ថា គាត់មានដីកូនអំពកតូចមួយដែរ នៅមាត់ព្រែកទន្លេវ៉ៃគោ ទំហំ១០ម៉ែត្រ គុណ២០ម៉ែត្រ គាត់ក៏ដាំបន្លែ ត្រកួន ទឹក និងកណ្តៀង សម្រាប់បេះលក់ គឺក្នុង១ថ្ងៃ កាត់បានត្រកួន៥ដុំ កណ្តៀង ១០ដុំ ក្នុង១ដុំ តម្លៃ៨០០រៀល សរុបបាន១,២០០០រៀល។ ក៏ប៉ុន្តែក្នុង១សប្តាហ៍ កាត់បានតែ០៣ទៅ៤ ដងអស់ហើយ ដោយសារស្មៅដុះច្រើន គាត់គ្មានកម្លាំងបោចស្មៅ ហើយពេលកាត់បន្លែបានលោកយាយចងជាដុំដាក់ក្នុងចានដែកដឹកកង់យកទៅលក់នៅផ្សារគ្រាន់ទិញអង្ករ និងម្ហូបប្រចាំថ្ងៃ។
លោកយាយបន្ថែមថា ដោយផ្ទះខ្ទម លោកយាយបាក់ទ្រុឌទ្រោម ក្មួយ និងអ្នកភូមិបានរួមគ្នា សង់ផ្ទះ១ខ្នង ៤ម៉ែត្រ គុណ៥ម៉ែត្រ សង់អំពីដែកប្រក់ស័ង្ហសី លើដីក្មួយ គេឱ្យនៅរហូតអស់ជីវិត។ កន្លងមកពេលខ្វះខាតបាយទឹកម្ហូបអ្នកជិតខាងគេហុចឱ្យ និងអាជ្ញាធរក៏បានជួយខ្លះដែរ ក៏ប៉ុន្តែមិនគ្រប់គ្រាន់តាមតម្រូវការនោះទេ ដោយសារជរាជំងឺប្រចាំកាយ ដូច្នេះ សូមអំពាវនាវសូមសប្បុរសជនមេត្តា ជួយឧបត្ថម្ភៈ ថវិកា ឬអង្ករ ស្បៀងអាហារ សម្លៀកបំពាក់ ដល់លោកយាយ បានផ្គត់ផ្គងជីវភាពនៅជីវិតចុងក្រោយ៕
