កម្លាំងកងរាជអាវុធហត្ថ បង្ក្រាបរថយន្តដឹកឈើប្រណិតមួយគ្រឿងនៅខេត្តមណ្ឌលគិរី
ខេត្តមណ្ឌលគិរី÷ សមត្ថកិច្ចកងរាជអាវុធហត្ថស្នាក់ការសន្តិសុខ៧៦១ស្រុកកែវសីមា បង្ក្រាបបានរថយន្តដឹកឈើខុសច្បាប់មួយគ្រឿងកាលពីយប់រំលងអធ្រាត្រ ឈានចូលថ្ងៃទី ៧ ខែកក្កដា ឆ្នាំ២០២២កន្លងទៅនេះ នៅចំណុចភូមិត្រពាំងផ្អេរ ឃុំស្រែខ្ទុម ស្រុកកែវសីមា ខេត្តមណ្ឌលគីរី។
សមត្ថកិច្ចបានឲ្យដឹងថា ប្រតិបត្តិការបង្ក្រាបខាងលើនោះដឹកនាំដោយលោកវរសេនីយ៍ត្រី សាក់ សុគុណ ប្រធានស្នាក់ការសន្តិសុខ៧៦១ បានចុះបង្ក្រាបរថយន្តសាំយ៉ុងដឹកឈើប្រណិតមួយគ្រឿង ពណ៌សពាក់ស្លាកលេខ កោះកុង2A-0903។នៅក្នុងរថយន្តនោះមានដឹកឈើទ្វារ30សន្លឹក និងគ្រោងទ្វារ50ដើម(ប្រភេទឈើសុក្រំ) បង្ក្រាបបាននៅភូមិត្រពាំងផ្អេរ ឃុំស្រែខ្ទុម ស្រុកកែវសិមា ខេត្តមណ្ឌលគិរី។
ក្រោយបង្ក្រាបបានសមត្ថកិច្ចកងរាជអាវុធហត្ថខេត្តបានប្រគល់វត្ថុតាងរថយន្តនិងឈើទៅសង្កាត់រដ្ឋបាលព្រៃឈើចុងផ្លាស់ ស្រែព្រះ ដើម្បីចាត់ការបន្តតាមនិតិវិធីច្បាប់។
សាធារណជនបានកត់សម្គាល់ថា បច្ចុប្បន្ននេះនៅក្នុងខេត្តមណ្ឌលគីរី សកម្មភាពដឹកជញ្ជូនឈើប្រណីតខុសច្បាប់បាននិងកំពុងកម្រើកឡើងវិញគួរឲ្យព្រួយបារម្ភ ខណដែលសកម្មភាពល្មើសនោះបានស្ងប់ស្ងាត់មួយរយដោយសារការរាតត្បាតនៃជំងឺកូវីត១៩ ហើយខាងភាគីវៀតណាមបានបិទច្រកព្រំដែនផង ហើយថែមទាំងមិនមានឈ្មួញទទួលទិញឈើពីឈ្មួញខាងកម្ពុជាផងដែរ។
