(កំពង់ធំ)÷ ឯកឧត្តម សៅ សុភាព រដ្ឋលេខាធិការក្រសួងបរិស្ថាន និង ឯកឧត្តម ចាន់ តារា អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ងួន រតនៈ អភិបាលខេត្តកំពង់ធំ អញ្ជើញជាអធិបតីភាពក្នុងពិធីកិច្ចប្រជុំបូកសរុបលទ្ឋផលការងារបរិស្ថានទូទាំងខេត្ត ប្រចាំឆមាសទី១ និង លើកទិសដៅការងារបន្តសម្រាប់អនុវត្តឆមាសទី២ ឆ្នាំ២០២២ របស់មន្ទីរបរិស្ថាន  ខេត្តកំពង់ធំ រសៀលថ្ងៃទី០៦ ខែកក្កដា ឆ្នាំ២០២២  ។

លោក តុប កក្កដា ប្រធានមន្ទីរបរិស្ថានខេត្តកំពង់ធំ បានឡើងរាយការណ៍ពីការងារដែលបានអនុវត្តកន្លងមក ដើម្បីឆ្លើយតបទៅនឹងគោលដៅចំបងរួមមានការអភិរក្ស និង ពង្រឹងច្បាប់ស្តីពីតំបន់ការពារធម្មជាតិ ការធានានូវបរិស្ថានល្អនៅតាមទីប្រជុំជន ។ ការចូលរួម គ្រប់គ្រងធនធានធម្មជាតិដោយសហគមន៍មូលដ្ឋាន និង ការលើកស្ទួយជីវភាពរស់នៅរបស់សហគមន៍មូលដ្ឋាន ដើម្បីកាត់បន្ថយសម្ពាធទៅលើធនធានធម្មជាតិ និងការអប់រំផ្សព្វផ្សាយបរិស្ថានជូនសាធារណៈជនដើម្បីសម្រេច បាននូវគោលបំណងរួមគ្នាក្នុងការគ្រប់គ្រងបរិយាកាសបរិស្ថានជុំវិញខ្លួនយើងឱ្យបានល្អ ។

ថ្លែងនៅក្នុងកម្មវិធីនេះ ឯកឧត្តម សៅ សុភាព រដ្ឋលេខាធិការក្រសួងបរិស្ថាន ជាអ្នកសម្របសម្រួលអង្គប្រជុំឱ្យមានប្រសិទ្ឋភាពគឺ មន្ទីរបរិស្ថានត្រូវចេះវិភាគអំពីបញ្ហាប្រឈម និង ដំណោះស្រាយដ៏មានប្រសិទ្ធិភាព ដែលជាលទ្ធផលនៃកិច្ចពិក្សាពិគ្រោះយោបល់ដោយមានការចូលរួមពីក្រុម ការងារនៃមន្ទីរបរិស្ថាន និងកិច្ចសហការជាមួយអ្នកពាក់ព័ន្ធទាំងអស់ ។  ដោយផ្អែកបទពិសោធន៍ ដែលក្រុមការងារទទួលបានពីការអនុវត្តជាក់ស្តែងពេលកន្លងមក ហើយយកមកប្រើប្រាស់ជាព័ត៌មានក្នុងមូលដ្ឋាន ការអនុវត្តផែនការសកម្មភាព ឱ្យបានគ្រប់ជ្រុងជ្រោយ និង មានប្រសិទ្ធិភាព ។

ប្រសាសន៍ចុងក្រោយរបស់ ឯកឧត្តម និង ផ្តាំផ្ញើដល់អង្គប្រជុំមានដូចជា ដើម្បីរក្សាសមិទ្ធិផលដែលបានសម្រេច ព្រមទាំងការបង្កើនគុណភាព និងបរិមាណសមិទ្ធិផល នាពេលអនាគត ។ រៀបចំទិសដៅបន្តសម្រាប់ឆ្នាំឆមាសទី២ ឆ្នាំ២០២២ សម្រាប់ការិយាល័យនីមួយៗ ដើម្បីងាយស្រួលក្នុងការអនុវត្ត តាមដាន គាំទ្រ ត្រួតពិនិត្យ និង វាយតម្លៃការអនុវត្តផែនការ ។ នេះហើយគឺជាការងារដ៏មានតម្លៃ និង មោទនភាពដែលមន្ទីរបរិស្ថានខេត្តកំពង់ធំ បានអនុវត្តជាប្រព័ន្ធជាមួយ នឹងការរៀបចំ និង ចាត់ចែងទុកជាមុន ដើម្បីបង្ការ និងទប់ស្កាត់ហានិយភាពដែលកើត ឡើងដោយចៃដន្យក្នុងពេលអនុវត្តផែនការ ។ ពិសេសសូមយកចិត្តទុក្ខដាក់ទៅលើបញ្ហាសំរាម ដែលជាបញ្ហាធំបំផុត បើការដឹកជញ្ជូនមានការយឺតយ៉ាវ នាំអោយ បង ប្អូនប្រជាពលរដ្ឋមានការព្រួយបារម្ភ ហើយប៉ះពាល់ដល់សុខភាពនៅក្នុងមូលដ្ឋាន ៕

ដោយ= NCTV (សូមកុំភ្លេច ៣-កុំ  ៣-ការពារ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ )