លោក លឹម សៀងហេង ស្នើឲ្យក្រុមប្រឹក្សាសង្កាត់ទើបជាប់ឆ្នោតថ្មី ត្រូវខិតខំរួមគ្នាលើកកម្ពស់វប្បធម៌នៃលទ្ធិប្រជាធិបតេយ្យសេរីពហុបក្ស

លោកអភិបាលក្រុងបានមានប្រសាសន៍ ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងកិច្ចប្រជុំដំបូងរបស់ក្រុមប្រឹក្សាសង្កាត់បាវិត ក្រុងបាវិត ដែលមានការចូលរួមពីគណ:បញ្ជាការកងរាជអាវុធហត្ថក្រុងបាវិត គណ:បញ្ជាការសឹករងក្រុងបាវិត គណ: បញ្ជាការឯកភាពរដ្ឋបាលក្រុងបាវិត លោក លោកស្រី ជាក្រុមប្រឹក្សានៅក្នុងមុខតំណែង ក្រុមប្រឹក្សាដែលទើបជាប់ថ្មី សាខាបក្សភូមិនឹងប្រជាពលរដ្ឋ ។

លោក លឹម សៀងហេង បានបន្តថា៖ ចាប់តាំងពីឆ្នាំ២០០២ព្រះរាជាណាចក្រកម្ពុជាយើងបានដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់តាមគោលការណ៍លទ្ធិប្រជាធិបតេយ្យ សេរីពហុបក្សសរុបចំនួន៥លើករួចមកហើយ។ ពីការបោះឆ្នោតមួយទៅការបោះឆ្នោតមួយ ត្រូវបានមជ្ឈដ្ឋានជាតិ និងអន្តរជាតិវាយតម្លៃថា ដំណើរការប្រជាធិបតេយ្យនិងការបោះឆ្នោតនៅកម្ពុជាកាន់តែវិវត្តន៍រីកចម្រើនជាលំដាប់។ 

ការបោះឆ្នោតដើម្បីបង្កើតឡើងនូវក្រុមប្រឹក្សានៅថ្នាក់ឃុំ សង្កាត់មានអត្ថន័យយ៉ាងជ្រាលជ្រៅមកលើប្រព័ន្ធនយោបាយនិងរដ្ឋបាលនៅកម្ពុជាគឺ៖

ទី១/ ការពង្រឹង ពង្រីកដំណើរការលទ្ធិប្រជាធិបតេយ្យសេរីពហុបក្សឲ្យចាក់គ្រឹះរហូតដល់មូលដ្ឋាន។

ទី២/ ការនាំមកនូវការផ្លាស់ប្តូររចនាសម្ព័ន្ធ និងប្រព័ន្ធគ្រប់គ្រងរដ្ឋបាលនៅកម្ពុជាតាមបែបផែននៃវិមជ្ឈការនិងវិសហមជ្ឈការ តាមរយៈការផ្ទេរមុខងារ អំណាច ធនធាន សិទ្ធិស្វ័យសម្រេចពីថ្នាក់ជាតិមករដ្ឋបាលថ្នាក់ក្រោមជាតិដើម្បីឆ្លើយតបតម្រូវការជាក់ស្តែងរបស់ប្រជាពលរដ្ឋតាមមូលដ្ឋាននីមួយៗ។

ទី៣/ ការលើកកម្ពស់ការចូលរួមនិងភាពជាម្ចាស់របស់ប្រជាពលរដ្ឋគ្រប់មូលដ្ឋានក្នុងការអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រនិងលើកកម្ពស់គុណភាពនៃជីវិតរបស់ប្រជាពលរដ្ឋ។

ជារួមដដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥កាលពីថ្ងៃទី៥ខែមិថុនាឆ្នាំ២០២២កន្លងមកក៏ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មានអំពើហឹង្សា ហើយលទ្ធផលនៃការបោះឆ្នោតក៏ត្រូវបានទទួលស្គាល់ពីគណបក្សនយោបាយនានាដែលបានចូលរួមក្នុងការបោះឆ្នោតនេះដែរ ហើយគណបក្សនយោបាយដែលបានចូលរួមប្រកួតប្រជែងក្នុងការបោះឆ្នោតឃុំសង្កាត់អាណត្តិទី៥នេះមានចំនួន១៧គណបក្ស ។

យោងតាមការប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥របស់ គ.ជ.ប ក្នុងចំណោមឃុំសង្កាត់នៅទូទាំងប្រទេសចំនួន ១៦៥២ ដែលមានអាសនៈសរុបចំនួន១១,៦២២មានតែគណបក្សនយោបាយចំនួន៩ប៉ុណ្ណោះដែលទទួលបានអាសនៈក្រុមប្រឹក្សាឃុំសង្កាត់ក្នុងអាណត្តិទី៥នេះ។

លោក លឹម សៀងហេង បានសង្កត់ធ្ងន់ថាៈ ចំពោះអស់លោក-លោកស្រី ដែលទើបជាប់ឆ្នោតថ្មីនិងអស់លោក លោកស្រីដែលបានជាប់ឆ្នោតឡើងវិញជាសមាជិកក្រុមប្រឹក្សាសង្កាត់ ក្នុងអាណត្តិទី៥នេះ ពិតជាមានការរីករាយប្រកបដោយមោទនភាពនិងកំពុងសម្រួចឆន្ទៈក្នុងការចូលរួមបញ្ចេញសមត្ថភាព ប្រាជ្ញា ស្មារតី កម្លាំងកាយ កម្លាំងចិត្តដើម្បីបម្រើផលប្រយោជន៍របស់ប្រជាពលរដ្ឋក្នុងសង្កាត់របស់ខ្លួន។

ដូច្នេះសូម លោក-លោកស្រី អស់លោកទាំងអស់មេត្តាយកចិត្តទុកដាក់អនុវត្តឲ្យបានត្រឹមត្រូវតាមគោលនយោបាយច្បាប់និងលិខិតបទដ្ឋានគតិយុត្តនានារបស់រាជរដ្ឋាភិបាលបំពេញការងារចំពោះមុខមួយចំនួនឲ្យបានម៉ត់ចត់រួមទាំងការធានាបាននូវសាមគ្គីភាពផ្ទៃក្នុង និងការយោគយល់គ្នានៅក្នុងការបំពេញការងាររបស់ខ្លួន។ លើសពីនេះលោក សូមអរគុណចំពោះក្រុមប្រឹក្សាអាណត្តិចាស់ពិតជាមានឆន្ទៈប្រកបដោយភាពសប្បាយរីករាយក្នុងការផ្ទេរតំណែងជូនក្រុមប្រឹក្សាសង្កាត់អាណត្តិទី៥តាមរយៈការប្រគល់ ទទួលត្រា បញ្ជី សម្ភារៈ ប្រាក់កាស និងឯកសារនានាក្នុងឱកាសនេះ ។

សូមបញ្ជាក់ផងដែរថា សំរាប់សង្កាត់បាវិតក្រុងបាវិតខេត្តស្វាយរៀងមានចំនួន៧អាសនៈ ក្នុងនោះគណបក្សប្រជាជនកម្ពុជាទទួលបាន៥អាសនៈ គណបក្សភ្លើងទៀនទទួលបាន២អាសនៈ ហើយលោក សាញ់ សាខុន មកពីគណបក្សប្រជាជនកម្ពុជា ទទួលតំណែងជាចៅសង្កាត់បាវិត ក្រុងបាវិត ខេត្តស្វាយរៀងសំរាប់អាណត្តិទី៥នេះ៕