អដ្ឋិធាតុទាហានវៀតណាមចំនួន៤៣នាក់ទៀតត្រូវបានគេធ្វើមាតុភូមិនិវត្តន៍
អដ្ឋិធាតុទាហានស្ម័គ្រចិត្តវៀតណាមចំនួន ៤៣នាក់ ដែលបានបាត់បង់ជីវិតក្នុងសម័យសង្គ្រាមនៅខេត្តកំពង់ធំ និងក្រចេះ ត្រូវបានអាជ្ញាធរកម្ពុជា និងវៀតណាម បញ្ជូនត្រឡប់ទៅប្រទេសវៀតណាមវិញកាលពីថ្ងៃសៅរ៍។
អភិបាលរងខេត្តក្រចេះ លោក ប៉ែន លីណាត បាននិយាយកាលពីម្សិលមិញថា អដ្ឋិធាតុចំនួន ៣៤ មកពីខេត្តផ្សេងៗ និង ៩ នាក់មកពីខេត្តកំពង់ធំ។លោកកត់សម្គាល់ថា ជនជាតិវៀតណាមបានប្រយុទ្ធជាមួយទាហានខ្មែរក្រហមដើម្បីរំដោះប្រជាជនកម្ពុជាក្នុងរបបប៉ុលពតក្នុងការគ្រប់គ្រងដ៏ឃោរឃៅក្នុងឆ្នាំ ១៩៧៩។លោក លីណាត បញ្ជាក់ថា ការស្វែងរក និងធ្វើមាតុភូមិនិវត្តន៍អដ្ឋិធាតុទាហានវៀតណាម ធ្វើឡើងស្របតាមកិច្ចព្រមព្រៀងសហប្រតិបត្តិការរវាងរដ្ឋាភិបាលកម្ពុជា និងវៀតណាម។
លោកបានកត់សម្គាល់ថា នេះជាលើកទី ២២ ហើយដែលគណៈកម្មការនៃក្រុមការងារនៃប្រទេសទាំង២បានធ្វើមាតុភូមិនិវត្តន៍អដ្ឋិធាតុទាហានស្ម័គ្រចិត្តវៀតណាមដែលបានរកឃើញនៅខេត្តក្រចេះទៅកាន់ប្រទេសវៀតណាម។លោកថា៖ « ក្នុងនាមប្រជាជន និងអាជ្ញាធរខេត្ត ខ្ញុំដឹងគុណចំពោះទាហានស្ម័គ្រចិត្តវៀតណាម ដែលបានពលីជីវិតដើម្បីជួយប្រជាជនកម្ពុជា»។លោកថា ការងាររបស់គណៈកម្មការនៃក្រុមការងារនៃប្រទេសទាំងពីរសម្រាប់ការរុករកអដ្ឋិធាតុទាហានស្ម័គ្រចិត្តវៀតណាមបានចាប់ផ្តើមនៅក្នុងខេត្តក្រចេះក្នុងឆ្នាំ ២០០៣។
លោកបានបន្ថែមថា រហូតមកដល់ពេលនេះ គណៈកម្មការចម្រុះបានរកឃើញអដ្ឋិធាតុទាហានស្ម័គ្រចិត្តវៀតណាមជាង១ពាន់នាក់ នៅខេត្តសៀមរាប ហើយទាំងអស់ត្រូវបានបញ្ជូនទៅកាន់ប្រទេសវៀតណាមវិញ។អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ មិនអាចទាក់ទងសុំការបំភ្លឺបានទេកាលពីម្សិលមិញ។ អ្នកនាំពាក្យកងយោធពលខេមរភូមិន្ទ នាយឧត្តមសេនីយ៍ ម៉ៅ ផល្លា មានប្រសាសន៍ថា យោងតាមរបាយការណ៍របស់កងទ័ពវៀតណាម ទាហានស្ម័គ្រចិត្តវៀតណាមប្រហែល ៦០,០០០ នាក់បានស្លាប់នៅចន្លោះឆ្នាំ ១៩៧៧ ដល់ឆ្នាំ ១៩៨៩ នៅក្នុងប្រទេសកម្ពុជា៕
