ជនសង្ស័យគ្រឿងញៀន ត្រូវបាន នគរបាលឃាត់ខ្លួនរួមនិងគ្រឿងញៀន៤ថង់ បញ្ជូនបន្តទៅស្នងការដ្ឋាននគរបាលខេត្ត
នគរបាលការិយាល័យប្រឆាំងគ្រឿងញៀន សហការជាមួយនគរបាលស្រុកស្វាយចេក បង្ក្រាបមុខសញ្ញា រក្សាទុកនិងចែកចាយសារធាតុញៀន ខុសច្បាប់ម្នាក់ បាន ដកហូតវត្ថុតាងគ្រឿងញៀន
បន្ទាយមានជ័យ៖នគរបាលការិយាល័យ ប្រឆាំងគ្រឿងញៀន សហការជាមួយកម្លាំងនគរបាលនៃអធិការដ្ឋាននគរបាលស្រុកស្វាយចេក ឃាត់ខ្លួនមុខសញ្ញារក្សាទុកនិងចែកចាយនូវសារធាតុញៀនខុសច្បាប់ចំនួន០១នាក់ នៅវេលាម៉ោង១០និង៣០នាទីព្រឹកថ្ងៃទី០៣ ខែកក្កដា ឆ្នាំ ឆ្នាំ២០២២ នៅចំណុច វាលអាចារ្យមាសចម្ងាយប្រហែល១០០០ម៉ែត្រ ខាងកើតភូមិខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ ។
ប្រភពពីនគរបាលស្រុកស្វាយចេកបានឲ្យដឹងថា៖ជនសង្ស័យដែលឃាត់ខ្លួនបាន ឈ្មោះ ស៊ឹម ភារ៉ា ភេទប្រុស អាយុ ២០ ឆ្នាំនៅភូមិចំការគ ឃុំស្វាយចេក ស្រុកស្វាយ ខេត្តបន្ទាយមានជ័យ ។ជាមួយនឹងការឃាត់ខ្លួននេះនគរបាលយើងដកហូតបានវត្ថុតាងម្សៅក្រាមពណ៌សថ្លាចំនួន០៤ ថង់តូចនិងទូរស័ព្ទ ០១ ដៃគ្រឿង ។
សមត្ថកិច្ចបានបញ្ជាក់ថា៖ថ្នាំញៀនទាំងនេះ រូបគេបានទិញពីមនុស្ស០១នាក់ នៅបឹងត្រកួនចំនួន០៤ដងមកហើយ និងយកមកលក់បន្ត នៅក្នុងភូមិសាស្ត្រ ស្រុកស្វាយចេក ។ ដោយផ្អែកលើចម្លើយ សារភាពរបស់ជនសង្ស័យនិងមានវត្ថុតាងជាក់ស្តែង បច្ចុប្បន្នជនសង្ស័យកំពុងរៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការតាមនិតិវិធីច្បាប់។
ចំពោះជនពាក់ព័ន្ធនគរបាល កំពុងបន្តធ្វើការស្រាវជ្រាវ ចាប់ខ្លួនផងដែរ ៕
