កម្ពុជាបង្ហាញពីស្ថានការណ៍នយោបាយ និងដំណើរការបោះឆ្នោតជូន អ្នកសង្កេតការណ៍អន្ដរជាតិ

(ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅរសៀលថ្ងៃទី០៤ ខែមិថុនា ឆ្នាំ២០២២នេះ បានរៀបចំវេទិកាមួយ ដើម្បីបង្ហាញអំពី «ស្ថានការណ៍នយោបាយ និងដំណើរការបោះឆ្នោតនៅកម្ពុជា ជូនអ្នកសង្កេតការណ៍អន្ដរជាតិ» មុនការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ ឈានមកដល់នៅថ្ងៃទី០៥ ខែមិថុនា ឆ្នាំ២០២២ ស្អែកនេះ។

វាគ្មិនដែលចូលរួមធ្វើបទបង្ហាញរួមមាន តំណាងគណៈកម្មាធិការជាតិរៀបចំការបោះឆ្នោត (គ.ជ.ប), តំណាងក្រសួងមហាផ្ទៃ និងតំណាងក្រសួងការបរទេស និងសហប្រតិបត្តិការអន្តរជាតិផងដែរ។

សូមជម្រាបថា អ្នកសង្កេតការណ៍អន្តរជាតិ ដែលចូលរួមសង្កេតការណ៍ក្នុងការបោះឆ្នោតក្រុមប្រឹក្សា ឃុំ-សង្កាត់ អាណត្តិទី៥ ឆ្នាំ២០២២៖

*ទី១៖ តំណាងអង្គការអ្នកប្រជាធិបតេយ្យនិយមកណ្តាលអន្តរជាតិ (Centralist Democrat International CDI-IDC)

*ទី២៖ តំណាងអង្គការអ្នកប្រជាធិបតេយ្យនិយមកណ្តាលអន្តរជាតិប្រចាំអាស៊ីប៉ាស៊ីហ្វិក (Centralist Asia-Pacific Democrat International – CAPDI)

*ទី៣៖ តំណាងអង្គការសន្និសិទអន្តរជាតិ នៃបណ្តាគណបក្សនយោបាយនៅអាស៊ី (International Conference of the Asian Political Parties – ICAPP)

*ទី៤៖ តំណាងវេទិកាស្ថាប័នស្រាវជ្រាវសកល ២០២២ (Think Tank 2022 Global Forum)

*ទី៥៖ តំណាងសហគមន៍អន្តរសភាអាស៊ាន (ASEAN Inter-Parliament Association – AIPA)

*ទី៦៖ តំណាងសភាអន្តរជាតិដើម្បីសន្តិភាព និងភាពអត់ឱន (International Parliament for Tolerance and Peace – IPTP)

*ទី៧៖ តំណាងក្រុមអ្នកសង្កេតការណ៍ឯករាជ្យ (Independence Observer)

*ទី៨៖ តំណាងសហគមន៍ខ្មែរនៅក្រៅប្រទេស រួមមាន សហគមន៍ខ្មែរជីលីងតុន (Khmer Culture Association of Wellington Inc. New Zealand) និងសហគមន៍ខ្មែរនៅកូរ៉េ។

គួរបញ្ជាក់ថា ភ្នាក់ងារគណបក្សនយោបាយស្នើសុំចុះឈ្មោះដើម្បីសង្កេតមើលដំណើរការបោះឆ្នោត និងការរាប់សន្លឹកឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ សរុបមានចំនួន ៨៨,០៥០នាក់ ក្នុងនោះស្ត្រីមានចំនួន ២៦,១៥៥នាក់៕