ពិធីត្រួតពិនិត្យការងារអនុវត្តតួនាទីភារកិច្ច និងវឌ្ឍនភាពការងារ កងរាជអាវុធហត្ថ ខែឧសភា និងទិសដៅការងារខែមិថុនា ឆ្នាំ២០២២ របស់កងរាជអាវុធហត្ថខេត្តព្រះវិហារ!
(ព្រះវិហារ)៖ នាព្រឹកថ្ងៃទី៣១ ខែឧសភា ឆ្នាំ២០២២នេះ ទីបញ្ជាការដ្ឋានកងរាជអាវុធហត្ថខេត្តព្រះវិហារ បានរៀបចំពិធីត្រួតពិនិត្យការងារអនុវត្តតួនាទីភារកិច្ច និងវឌ្ឍនភាពការងារ កងរាជអាវុធហត្ថ ខែឧសភា និងទិសដៅការងារខែមិថុនា ឆ្នាំ២០២២ ក្រោមអធិបតីភាព លោកឧត្តមសេនីយ៍ត្រី កង សៅគុណ មេបញ្ជាការ កងរាជអាវុធហត្ថខេត្តព្រះវិហារ។
ដោយមានការអញ្ជើញចូលរួមពីសំណាក់ លោក មេបញ្ជាការរង នាយរងសេនាធិការដ្ឋាន ប្រធានមន្ទីរទាំង០៧ នាយការិយាល័យ ជំនួយការ មេបញ្ជាការ មេបញ្ជាការរង នាយសេនាធិការមូលដ្ឋាន ក្រុង/ស្រុក ជាច្រើនរូបផងដែរ។
លោកឧត្តមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារ បានថ្លែងការកោតសរសើរ និងវាយតម្លៃខ្ពស់ចំពោះលទ្ធផលដែលបានមកពីការខិតខំប្រឹងប្រែងយកអស់ស្មារតីទទួលខុសត្រូវ របស់នាយទាហាន នាយទាហានរង នៃកងរាជអាវុធហត្ថខេត្តទាំងអស់ ក្នុងការអនុវត្តតួនាទីភារៈកិច្ច និងវឌ្ឍនភាពការងារកងរាជអាវុធហត្ថ ខែឧសភា បានយ៉ាងល្អប្រសើរនាពេលកន្លងមក និងត្រូវតែបន្តទិសដៅការងារខែមិថុនា ឆ្នាំ២០២២ ឱ្យបានយ៉ាងល្អបន្ថែមទៀត។
លោកឧត្តមសេនីយ៍ត្រី កង សៅគុណ បានធ្វើការផ្តាំផ្ញើដល់កម្លាំងកងរាជអាវុធហត្ថខេត្តព្រះវិហារទាំងអស់ ត្រូវតែអនុវត្តនូវការងារជំនាញ ការងាររដ្ឋបាលទូទៅ ការងារបង្ការ ត្រូវចូលរួមសហការណ៍ជាមួយគណៈបញ្ជាការឯកភាពរដ្ឋបាលក្រុង ស្រុក។ ចំពោះការងារបង្រ្កាបពាក់ព័ន្ធនឹងបទល្មើសទូទៅ ត្រូវរាយការណ៍មកកាន់ទីបញ្ជាការតាមមន្ទីរជំនាញ ក្នុងករណីចាំបាច់បន្ទាន់ ត្រូវរាយការណ៍ និងសុំបទបញ្ជាពីមេបញ្ជាការ។
លោកឧត្តមសេនីយ៍ត្រី មេបញ្ជាការ ក៏បានធ្វើការផ្តាំផ្ញើនូវអនុសាសន៍ដ៏ខ្ពង់ខ្ពស់ និងមានតម្លៃរបស់ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ជូនដល់នាយទាហាន នាយទាហានរង នៃកងរាជអាវុធហត្ថខេត្តទាំងអស់ ត្រូវប្រកាន់ខ្ជាប់លក្ខណៈសម្បត្តិ ០៥ចំណុច ដើម្បីក្លាយជាមន្រ្តីកងរាជអាវុធហត្ថគំរូ វិធានការផ្ទៃក្នុងកងរាជអាវុធហត្ថ ០៩ចំណុច និងរូបមន្តគ្រប់គ្រងបុគ្គលិក ដែលមេបញ្ជាការអង្គភាព ឬប្រធានស្ថាប័ននីមួយៗ ត្រូវមាន ៧ចំណុច៖ ហូប ស្លៀកពាក់ ស្នាក់នៅ ការថែទាំសុខភាព អប់រំរៀនសូត្រ មធ្យោបាយធ្វើដំណើរកំសាន្តសប្បាយ និងដោះស្រាយទុក្ខលំបាក៕
