កែប ៖ ជាទូទៅករណីគ្រោះថ្នាក់ចរាចរណ៍ដែលកើតឡើងពិតជាបង្កឲ្យមានសោកនាដកម្មដ៏ធ្ងន់ធ្ងរ ហើយក៏បានលើកយកមកធ្វើជាប្រធានបទសម្រាប់តម្រង់ទិសដល់មហាជនគ្រប់ស្រទាប់វណ្ណៈផងដែរ។ យ៉ាងណាមិញ នៅរសៀលថ្ងៃទី២២ខែមេសា ឆ្នាំ២០១៧នេះ ខាងមន្ទីរសាធារណៈការ និងដឹកជញ្ជូនខេត្តកែប និងក្រោមវត្តមានដ៏ខ្ពង់ខ្ពស់ ឯកឧត្តម កែន សត្ថា អភិបាលនៃគណៈអភិបាលខេត្តកែប បានប្រារព្វពិធីទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១០ ដោយបានធ្វើឡើងនៅក្បែរមាត់ឆ្នេរកែប(មុខមន្ទីរទេសចរណ៍ខេត្ត)ក្នុងគោលបំណងឲ្យយល់ដឹងកក្តាផ្សេងៗស្តីពីច្បាប់ចរាចរណ៍ផ្លូវគោកនិងអត្រាថយចុះនៃកក្តាគ្រោះថ្នាក់ចរាចរណ៍ផងដែរ។
ផ្តើមចេញពីគ្រោះថ្នាក់ចរាចរណ៍ជាច្រើនករណីកន្លងមក អាចបណ្តាលមកពីកំហុសអ្នកបើកបរ ដូចជាការបើកបរក្នុងស្ថានភាពស្រវឹង បើកបរក្នុងល្បឿនលើសកំណត់ បើកបរដោយបាត់ភាពម្ចាស់ការ មិនគោរពច្បាប់ឬការបើកបរជែងក្នុងស្ថានភាពគ្រោះថ្នាក់ជាដើម។
លោក ម៉ម ទូច ប្រធានមន្ទីរសាធារណៈការនិងដឹកជញ្ជូនខេត្តកែប បានលើកឡើងថា ទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១០នេះដើម្បីបន្តពង្រឹងនិងរឹតបន្តឹង ការអនុវត្តច្បាប់ បទប្បញ្ញតិ្តចរាចរណ៍ផ្សេងៗបន្ថែមទៀត សំរាប់ប្រែក្លាយទៅជាមធ្យោបាយដ៏មានប្រសិទ្ធភាព សម្រាប់ជម្រុញការកាត់បន្ថយគ្រោះថ្នាក់ចរាចរណ៍ឲ្យនៅកម្រិតទាបបំផុត ។
លោកបានលើកឡើងទៀតថា ម្ចាស់យានយន្តត្រូវមានប័ណ្ណបើកបរត្រឹមត្រូវតាមប្រភេទ ត្រូវបើកបរដោយចេះការពារខ្លួន ត្រូវពាក់ខ្សែក្រវាត់សុវត្ថិភាពនៅពេលបើកបរ ត្រូវពាក់មួកសុវត្ថិភាពពេលបើកបរ ព្រមទាំងអ្នករួមដំណើរផងដែរ ត្រូវចេះអធ្យាស្រ័យគ្នាក្នុងពេលបើកបរ ត្រូវចាំជានិច្ចថា(ជីវិតគ្មានដាក់លក់នៅទីផ្សារទេ) កុំបើកបរហួសល្បឿនកំណត់ កុំផ្ទុកមនុស្សឬទំនិញលើសចំណុះ កុំបើកបរក្រោមឥទ្ធិពលនៃគ្រឿងស្រវឹងនិងសារធាតុញៀន កុំជែងដោយប្រថុយនឹងគ្រោះថ្នាក់ កុំប្រើទូរសព្ទក្នុងពេលបើកបរ កុំប្រមាថអាយុជីវិតអ្នកដ៏ទៃដូចដែលយើងមិនចង់ឲ្យអ្នកដ៏ទៃប្រមាថអាយុជីវិតយើងដែរ។
ជាមួយគ្នានេះ ឯកឧត្តម កែន សត្ថា ក៏បានថ្លែងដោយលើកយកនូវបញ្ហាផ្សេងៗពាក់ព័ន្ធនឹងសុវត្ថិភាពនិងកក្តាគ្រោះថ្នាក់ដោយសារការបើកបរលើដងផ្លូវសាធារណៈ ដោយលោកបានសង្កត់ធ្ងន់ថា ករណីគ្រោះថ្នាក់នានាគឺកើតឡើងដោយសារការសេពគ្រឿងស្រវឹង ការបើកបរប្រើល្បឿនលឿននិងមិនគោរពច្បាប់ចរាចរណ៍ផ្លូវគោក ។
លោកបានបញ្ជាក់ថា ទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១០នេះ តាមពិតត្រូវប្រារព្វឡើងក្នុងថ្ងៃទី០៤ខែមេសា ព្រោះក្នុងថ្ងៃទី០៤នោះក្នុងទូទាំងប្រទេសមានមនុស្សស្លាប់ដោយសារគ្រោះថ្នាក់ចរាចរណ៍មានតែ០១ករណី(ម្នាក់)ប៉ុណ្ណោះ ប៉ុន្តែដោយសាររដ្ឋបាលខេត្តមានភាពមមាញឹកក្នុងកិច្ចការចាំបាច់ផ្សេងៗគាប់ជួនរវល់ក្នុងកម្មវិធីជាច្រើនសំរាប់អបអរឆ្នាំថ្មីផងនោះទើបពន្យាពេលមកដល់ថ្ថៃទី២២ខែមេសា ឆ្នាំ២០១៧តែម្តង ។
ឯកឧត្តមបានបន្តថា ដើម្បីឆ្លើយតបនឹងស្ថានភាពគ្រោះថ្នាក់ចរាចរណ៍យ៉ាងធ្ងន់ធ្ងរនាពេលបច្ចុប្បន្ននេះ រដ្ឋបាលខេត្ត បានសហការជាមួយមន្ទីរ អង្គភាពជំនាញពាក់ព័ន្ធធ្វើការប្រារព្វ ទិវានេះឡើង ក្នុងគោលបំណងដាស់ស្មារតីឲ្យប្រជាពលរដ្ឋទាំងអស់ដែលប្រើប្រាស់ផ្លូវថ្នល់ ទាំងអ្នកថ្មើរជើង ទាំងអ្នកបើកបរយានយន្តគ្រប់ប្រភេទឲ្យផ្លាស់ប្តូរនូវឥរិយាបថ ដែលធ្លាប់តែមានភាពអនាធិបតេយ្យ មិនគោរពច្បាប់មកប្រកាន់យកឥរិយាបថដែលមានសណ្តាប់ធ្នាប់របៀបរៀបរយ ចេះអធ្យាស្រ័យគ្នានិងគោរពច្បាប់ចរាចរណ៍ទាំងអស់គ្នា ព្រោះបច្ចុប្បន្នគ្រោះថ្នាក់ចរាចរណ៍កើតឡើងដោយសារកក្តា៣យ៉ាងគឺ កក្តាមនុស្ស កក្តាយានយន្ត និងកក្តាផ្លូវថ្នល់ ប៉ុន្តែមូលហេតុចម្បងគឺកក្តាមនុស្សនេះឯងដែលប្រើប្រាស់ផ្លូវមិនគោរពច្បាប់ ដូចជាការបើកបរហួសល្បឿនកំណត់ ការបើកបរដោយធ្វេសប្រហែសនិងការបើកបរក្នុងពេលសេពគ្រឿងស្រវឹងជាដើម ៕
ណារិទ្ធ
