រាជធានីភ្នំពេញ៖ នៅព្រឹកថ្ងៃទី២៨ ខែតុលា ឆ្នាំ២០២៦ នៅបញ្ជាការដ្ឋាន កងរាជអាវុធហត្ថរាជធានីភ្នំពេញ បានរៀបចំពិធីផ្សព្វផ្សាយការងារសោធននិវត្តន៍ ឆ្នាំ២០២៧ ជូនដល់យោធិននៃកងរាជអាវុធហត្ថដែលត្រូវដល់អាយុចូលនិវត្តន៍។
ពិធីនេះត្រូវបានរៀបចំឡើងក្រោមអធិបតីភាព លោកឧត្តមសេនីយ៍ត្រី ងួន វ៉ា ស្នងការរង ស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស និងជាប្រធានក្រុមការងារទី២។
នៅក្នុងឱកាសនោះផងដែរ ក៏មានការអញ្ជើញចូលរួមពី៖
លោកឧត្តមសេនីយ៍ត្រី ច័ន្ទ វាសនា មេបញ្ជាការរង កងរាជអាវុធហត្ថរាជធានីភ្នំពេញ ទទួលបន្ទុកការងារកសាងកម្លាំងលោកនាយសេនាធិការរងប្រធាន-អនុប្រធានមន្ទីរ និងនាយ-នាយរងការិយាល័យជំនាញមេបញ្ជាការមូលដ្ឋានកងរាជអាវុធហត្ថខណ្ឌទាំង១៤ព្រមទាំងយោធិននៃកងរាជអាវុធហត្ថដែលគ្រប់អាយុត្រូវចូលនិវត្តន៍យ៉ាងច្រើនកុះករ។
ពិធីផ្សព្វផ្សាយនេះធ្វើឡើងក្នុងគោលបំណងណែនាំ និងបញ្ជាក់ច្បាស់ៗអំពីនីតិវិធី បទដ្ឋានគតិយុត្ត និងការរៀបចំឯកសារពាក់ព័ន្ធផ្សេងៗ សម្រាប់ការផ្លាស់ប្តូរស្ថានភាពការងាររបស់យោធិនពីកម្លាំងសកម្ម ទៅជាយោធិនចូលនិវត្តន៍នាឆ្នាំ២០២៧ ខាងមុខ ឱ្យបានត្រឹមត្រូវ និងទាន់ពេលវេលា៕
