បាត់ដំបង៖នៅថ្ងៃទី១៤ ខែមេសា ឆ្នាំ២០២៦ដែលត្រូវនឹងថ្ងៃទី១នៃព្រឹត្តិការណ៍សង្ក្រាន្តបាត់ដំបង ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង បានអញ្ជើញជាអធិបតីក្នុងពិធីសម្ពោធរូបព្រាបសន្តិភាពដាក់តាំងបង្ហាញនៅមុខអគារសាលាខេត្តចាស់ ដើម្បីឱ្យមន្រ្តីរាជការ និងបងប្អូនប្រជាពលរដ្ឋបានសរសេរសារជូនពរនិងលើកទឹកចិត្តដល់កងកម្លាំងជួរមុខដែលកំពុងឈរជើងការពារបូរណភាពទឹកដីនៅតាមខ្សែបន្ទាត់ព្រំដែន។
មានប្រសាសន៍ក្នុងពិធីនេះ ឯកឧត្តម សុខ លូ បានថ្លែងអំណរគុណដល់ក្រុមការងារដែលបានខិតខំប្រឹងប្រែងបង្កើតបាននូវព្រាបសន្តិភាពដ៏មានតម្លៃយ៉ាងជ្រាលជ្រៅ។
ឯកឧត្តម មានប្រសាសន៍បន្ថែមថា ថ្នាក់ដឹកនាំគ្រប់លំដាប់ថ្នាក់ជាពិសេសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ព្រមទាំងថ្នាក់ដឹកនាំផ្សេងៗទៀតទាំងអស់ក៏ដូចជាប្រជាពលរដ្ឋនៅទូទាំងប្រទេសគឺចង់បានសន្តិភាព មិនចង់បានសង្រ្គាមនោះទេ ដូច្នេះទើបបង្កើតឱ្យមានព្រាបសន្តិភាពនាពេលនេះ។
ឯកឧត្តម គូសបញ្ជាក់ថា រដ្ឋបាលខេត្តបាត់ដំបងសម្រេចសាងសង់រូបព្រាបសន្តិភាពនេះឡើងសំដៅឱ្យមន្រ្តីរាជការ ប្រជាពលរដ្ឋបានសរសេរសារបិតនៅលើដងខ្លួន នៅលើស្លាបព្រាបនេះ ដើម្បីនាំយកសារទាំងអស់ទៅដល់បងប្អូនវីរកងទ័ព វីរនគរបាលដែលឈរជើងការពារទឹកដីយ៉ាងអង់អាចក្លាហានថាយើងទាំងអស់គ្នាត្រូវការសន្តិភាព ហើយដើម្បីបានសន្តិភាពលុះត្រាតែវីរកងទ័ព និងវីរនគរបាលខិតខំការពារ ដូច្នេះសារនេះជាសារជូនពរ និងថ្លែងអំណរគុណដល់បងប្អូនវីរកងទ័ព និងវីរនគរបាល។
ឯកឧត្តម ឱ្យដឹងបន្តថា ក្នុងព្រឹត្តិការណ៍សង្រ្កាន្តបាត់ដំបងឆ្នាំ២០២៦នេះ រដ្ឋបាលខេត្តនឹងរៀបចំពិធីបង្សុកូល និងរាប់បាត្រព្រះសង្ឃសំដៅរំលឹកដល់គុណរបស់វីរកងទ័ព និងវីរនគរបាលដែលបានពលីដើម្បីការពារបូរណភាពទឹកដី។
ជាមួយគ្នានោះ ឯកឧត្តមអភិបាលខេត្ត បានលើកទឹកចិត្តដល់មន្រ្តីរាជការនិងប្រជាពលរដ្ឋសូមចូលរួមសរសេរជូនពរតាមរយៈព្រាបនាំសារនេះទៅដល់វីរកងទ័ព និងវីរនគរបាលអំពីអ្វីដែលបងប្អូនចង់បញ្ចេញ និងសូមឱ្យមនសិការជាតិនិយម និងស្មារតីស្នេហាជាតិរបស់ប្រជាពលរដ្ឋទាំងអស់រក្សាឱ្យបានស្ថិរស្ថេរគង់វង្សយូរអង្វែង ខណៈស្មារតីជាតិនិយមធ្វើឱ្យខ្មែរខ្លាំង និងសេដ្ឋកិច្ចរីកចម្រើន។
ឯកឧត្តម សុខ លូ បានថ្លែងជូនពរដល់បងប្អូនវីរយុទ្ធជន វីរកងទ័ព និងវីរនគរបាលទាំងអស់ដែលឈរជើងនៅតាមខ្សែបន្ទាត់ព្រំដែនការពារបូរណភាពទឹកដី សូមមានសុខភាពល្អ ប្រកបដោយពុទ្ធពរទាំងបួនប្រការគឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ។
ជាមួយគ្នានោះ ឯកឧត្តម សុខ លូ ព្រមទាំងមន្រ្តីរាជការ បងប្អូនប្រជាពលរដ្ឋ និងយុវជន បានចូលរួមសរសេរសារជូនពរ លើកទឹកចិត្ត និងសម្ដែងការដឹងគុណយ៉ាងជ្រាលជ្រៅជូនចំពោះវីរកងទ័ព និងវីរនគរបាល៕
