បន្ទាយមានជ័យ៖ ក្រោមម្លប់នៃសន្តិភាព ដែលបានមកដោយនយោបាយ ឈ្នះឈ្នះ របស់សម្តេចតេជោ ហ៊ុន សែន អតីតនាយករដ្ឋមន្រ្តី សព្វថ្ងៃជាប្រធានព្រឹទ្ធសភា នៃព្រះរាជាណាចក្រកម្ពុជា និងស្ថិតក្រោមការដឹកនាំប្រកបដោយថាមពល ស្វាហាប់ ឈ្លាសវៃ និងចក្ខុវិស័យច្បាស់លាស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ធ្វើឱ្យប្រទេសកម្ពុជា មានការអភិវឌ្ឍរីកចម្រើនជាបន្តបន្ទាប់ ជាពិសេសខេត្តបន្ទាយមានជ័យ មានការអភិវឌ្ឍលើគ្រប់វិស័យ និងមានភាពសុខដុមរម្យនាក្រោមដំបូលដ៏ត្រជាក់ នៃសុខសន្តិភាព ដែលកម្ពុជាពុំធ្លាប់មានអស់រយៈពេលជាយូរលង់មកហើយ។
នេះបេីតាមប្រសាសន៍លេីកឡេីងរបស់ ឯកឧត្ដម អ៊ុំ រាត្រី អភិបាល នៃ គណៈអភិបាលខេត្ត អញ្ជើញជាអធិបតី អបអរសាទរទិវាពលកម្មអន្តរជាតិ ១ ឧសភាឆ្នាំ២០២៥ ខួប អនុស្សាវរីយ៍លើកទី១៣៩ ក្រោមប្រធានបទ “រួមគ្នាដើម្បីការងារសមរម្យ និងកំណើនប្រកបដោយចីរភាព និងភាពធន់”ប្រារព្ធ ធ្វើឡើង នៅសាលប្រជុំ ធំ សាលាខេត្តបន្ទាយមានជ័យ នាព្រឹកថ្ងៃព្រហស្បតិ៍ ទី០១ ខែឧសភា ឆ្នាំ ២០២៥។
ឯកឧត្តម អ៊ុំ រាត្រី ក៏បានបញ្ជាក់ថា ជាការពិតណាស់ដោយកត្តា “សន្តិភាព” បានធ្វេីឱ្យវិស័យការងារ និងបណ្តុះបណ្តាលវិជ្ជាជីវៈ មានសមិទ្ធិផលជាផ្លែផ្កាយ៉ាងច្រើនដែលបងប្អូន កូន ក្មួយ បាននឹងកំពុងទទួលរាល់ថ្ងៃនេះ ដែលជាមរតកបានមកពីការដឹកនាំដ៏ខ្ពង់ខ្ពស់ និងប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន និងមានសមិទ្ធិផលថ្មីៗជាច្រើនបន្ថែមទៀត ដែលបានបន្តកសាង និងបង្កើតឡើងដោយរាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្តេចធិបតី នាយករដ្ឋមន្ត្រី ដែលសមិទ្ធិផលទាំងនោះរួមមាន កម្មករ-កម្មការិនី វិស័យកាត់ដេរ ក្នុងឆ្នាំ២០២៥ ត្រូវបានដំឡើងប្រាក់ឈ្នួលគោលអប្បបរមាដល់២០៨$ ហើយត្រូវបើកជូន២ដង/១ខែ ក៏ដូចជាទទួលបាននូវអត្ថប្រយោជន៍ជាច្រេីនទៀត។
ឯកឧត្តម អភិបាល ខេត្ត ក៏បានបង្ហាញមោទនភាព ដែលខេត្តបន្ទាយមានជ័យ មានរោងចក្រ១ គឺរោងចក្រ ហាយ ថេក អឺភែរឹល (ខេមបូឌា) ដែលជារោងចក្រកាត់ដេរសំលៀកបំពាក់ ធំបំផុតក្នុងខេត្ត ដែលបានទទួល ពានមាស នឹងត្រូវទទួលបានការលើកលែងការចុះអធិការកិច្ចការងារសាមញ្ញរយៈពេល៣ឆ្នាំ ក្នុងករណីគ្មានបណ្ដឹង។
ជាមួយគ្នា នោះ ឯកឧត្ដម អ៊ុំ រាត្រី លើកទឹកចិត្តដល់ កងកម្លាំងសមត្ថកិច្ចគ្រប់ផ្នែក អាជ្ញាធរមូលដ្ឋានគ្រប់ថ្នាក់ អង្គភាពសាធារណៈ វិស័យឯកជន ដៃគូអភិវឌ្ឍន៍ គ្រឹះស្ថានសាធារណៈ គ្រឹះស្ថានឯកជន អង្គការសង្គមស៊ីវិល បន្តធ្វើការចងចាំ ផ្សព្វផ្សាយ និងប្រតិបត្តិឱ្យបានខ្ជាប់ខ្ជួននូវខ្លឹមសារ នៃទិវាពិភពលោកដ៏មានសារៈសំខាន់នេះ ដោយការដឹងគុណ និងផ្តល់តម្លៃដល់គ្រប់ពលកម្ម និងការងារមិនមានការរើសអើង៕
