(កំពង់ធំ)៖ នាថ្ងៃទី១៨ ខែវិច្ឆិកា ឆ្នាំ ២០២៤នេះ លើកឡើងនាឱកាសដឹកនាំកិច្ចប្រជុំបូកសរុបលទ្ធផលការងារប្រចាំខែវិច្ឆិកា និងលើកទិសដៅសម្រាប់ខែធ្នូ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានដាក់ចេញទិសដៅចំនួន ៥ចំណុច ដល់មន្ត្រីបន្តអនុវត្តឱ្យទទួលបានជោគជ័យសម្រាប់ខែធ្នូ ឆ្នាំ២០២៤នេះ។
ទិសដៅការងារទាំង ៥ចំណុចរបស់លោកឧត្តមសេនីយ៍ទោ ហេង សុផល មានដូចជា៖
១៖ ពង្រឹងការគ្រប់គ្រងបញ្ជា ការប្រមូលផ្តុំកងកម្លាំងក្រោមឱវាទត្រៀមលក្ខណៈរួចជាស្រេច រង់ចាំអនុវត្តគោលការណ៍ បទបញ្ជា ដែលថ្នាក់ដឹកនាំប្រគល់ជូន អនុវត្តបានទាន់ពេលវេលា និងមានប្រសិទ្ធភាពខ្ពស់។
២៖ ពង្រឹងរបៀបរបបការងារជំនាញ ជាពិសេសការងារគ្រប់គ្រងស្ថិតិប្រជាពលរដ្ឋ សូមមន្ត្រីជំនាញតាមបណ្ដាអធិការដ្ឋាននគរបាលក្រុង-ស្រុក និងប៉ុស្តិ៍នគរបាលរដ្ឋបាលត្រូវបន្តយកចិត្តទុកដាក់ ការងារគ្រប់គ្រងបំរែបំរួលប្រជាពលរដ្ឋ (ចំណូល និងចំណាកស្រុក) ដែលស្នាក់នៅក្នុងមូលដ្ឋានរបស់ខ្លួន។
៣៖ ការងារព្រហ្មទណ្ឌ ប្រើប្រាស់វិធានការជំនាញ និងវិធានការរដ្ឋបាលសំដៅបង្ការ ទប់ស្កាត់ និងបង្ក្រាបទល្មើសគ្រប់ប្រភេទ ដែលអាចកើតមានឡើងតាមមូលដ្ឋានរបស់ខ្លួនធានា ថែរក្សាបានសុខក្សេមក្សាន្ត ជូនប្រជាពលរដ្ឋ និងសង្គមជាតិ។
៤៖ បង្កើនការងារផ្សព្វផ្សាយគោលនយោបាយ «ភូមិ-ឃុំសង្កាត់មានសុវត្ថិភាព» ដល់មហាជន គ្រប់ស្រទាប់វណ្ណៈ តំបន់ងាយរងគ្រោះ ដើម្បីលើកកម្ពស់ការយល់ដឹងនិងចូលរួមអនុវត្ត ឲ្យមានលទ្ធផលល្អប្រសើរ។
៥៖ ការងារប្រឆាំងបទល្មើសគ្រឿងញៀន ជំរុញលើកទឹកចិត្ត ដល់កម្លាំងជំនាញបង្ក្រាបបទល្មើសគ្រឿងញៀន ដូចភ្លៀងរលឹម ដើម្បីបង្ការទប់ស្កាត់កាត់បន្ថយបទល្មើសគ្រឿងញៀនឲ្យមានការថយចុះ ជាបន្តបន្ទាប់ ស្របតាមគោលនយោបាយ របស់ប្រមុខរាជរដ្ឋាភិបាលកម្ពុជា។
ជាមួយគ្នានោះ លោកឧត្តមសេនីយ៍ទោស្នងការ បានកោតសរសើរដល់កងកម្លាំង និងលើកឡើងអំពីស្នាដៃគុណសម្បត្តិ នារយៈពេលកន្លងមក ដែលកងកម្លាំងគ្រប់លំដាប់ថ្នាក់ ចូលរួមសម្រេចបានលទ្ធផលគួរជាទីមោទនៈ លើកការបំពេញភារកិច្ច បេសកកម្ម និងការកសាងអង្គភាព រីកចម្រើនជាលំដាប់ផងដែរ៕
