ភ្នំពេញ ៖ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអំពាវនាវដល់ប្រជាពលរដ្ឋ ឱ្យយកយានយន្តទៅឆៀកឱ្យបានទាន់ពេលវេលា ចៀសវាងការខាតបង់ ឬប្រឈមមុខនឹងការផាកពិន័យ និង ដើម្បីធានាការធ្វើ ដំណើរប្រកបដោយសុវត្ថិភាព។
ថ្លែងក្នុងពិធីសម្ពោធដាក់ឱ្យដំណើរការជាផ្លូវការ មណ្ឌលត្រួតពិនិត្យលក្ខណៈបច្ចេកទេសយានយន្ដ(ឆៀក) សាខាពោធិ៍សែនជ័យ-អូរដឹម និងប្រព័ន្ធស្វ័យប្រវត្តិកម្មត្រួតពិនិត្យលក្ខណៈបច្ចេកទេសយានជំនិះ(ឆៀក)ជំនាន់ទី២ (techinspection.mpwt.gov.kh) នៅថ្ងៃទី២៨ ខែមីនា ឯកឧត្តម ទេសរដ្ឋមន្រ្តី ស៊ុន ចាន់ថុល បានមានប្រសាសន៍ថា បច្ចុប្បន្នមានយានជំនិះចំនួន ៤៩០ពាន់គ្រឿង មិនទាន់យកមកត្រួតពិនិត្យលក្ខណៈបច្ចេកទេស (ឆៀក) ដូច្នេះសូមអំពាវនាវដល់ម្ចាស់យានជំនិះទាំងនោះ ប្រញាប់យកយានជំនិះ មកត្រួតពិនិត្យលក្ខណៈបច្ចេកទេសឱ្យបានទៀងទាត់និងទាន់ពេលវេលា ដើម្បីសុវត្ថិភាពក្នុងពេលធ្វើដំណើរ នៅតាមដងផ្លូវ។
ឯកឧត្តម ទេសរដ្ឋមន្រ្តី បានបញ្ជាក់ថា ការត្រួតពិនិត្យលក្ខណៈបច្ចេកទេសយានជំនិះ និងបទបញ្ញត្តិច្បាប់ដែលតម្រូវឱ្យមានការត្រួតពិនិត្យលក្ខណៈបច្ចេកទេសយានជំនិះមិនស្របតាមស្តង់ដារលក្ខណៈបច្ចេកទេស អាចបង្កគ្រោះថ្នាក់ចរាចរណ៍តាមដងផ្លូវ ខណៈដែលគ្រោះថ្នាក់ចរាចរណ៍សព្វថ្ងៃកើតឡើងចេញពីកត្តាយានជំនិះ មានប្រមាណ ៣,៥% ដោយសារការមិនបាន យកយានជំនិះទៅត្រួតពិនិត្យលក្ខណៈបច្ចេកទេសឱ្យបានត្រឹមត្រូវ និងទៀងទាត់។
« សូមអំពាវនាវទៅបងប្អូនប្រជាពលរដ្ឋ ដែលជាម្ចាស់យានយន្តត្រូវប្រញាប់ប្រញាល់យករថយន្តទាំងនោះ មកឆៀក ឱ្យទាន់ពេលវេលា ចៀសវាងការផាកពិន័យបន្ថែមទៀត មួយថ្ងៃ៥០០រៀល បង់ចូលថវិកាជាតិ។ កុំចោទរាជរដ្ឋាភិបាលចេះតែផាកពិន័យចង់បានលុយប្រជាពលរដ្ឋ បើយើងធ្វើមិនខុសគេមិនផាកពិន័យនោះទេ គេផាកតែយើង ធ្វើខុសច្បាប់ ហើយច្បាប់តម្រូវឱ្យយើងយកឡានមកឆៀកបើយើងមិនឆៀកមានការផាកពិន័យ »។
ឯកឧត្តម ទេសរដ្ឋមន្ដ្រី ស៊ុន ចាន់ថុល ក៏បានសំណូមពរដល់ប្រជាពលរដ្ឋជាអ្នកបើកបរ ដែលមានប័ណ្ណបើកបរផុតសុពលភាព មិនទាន់យកមកប្តូរ ឬពន្យារប័ណ្ណបើកបរ ត្រូវមកប្ដូរ ឬពន្យារ បណ្ណបើកបររបស់ខ្លួនឱ្យស្របច្បាប់ ដើម្បីចៀសវាងការផាកពិន័យ នៅពេលបើកបរនៅតាមផ្លូវ។ ម្យ៉ាងវិញទៀត ក្រសួងសាធារណការ បានបង្កើតមជ្ឈមណ្ឌលផ្ដល់សេវាប្រភេទនេះ នៅក្នុងទីស្តីការ ក្រសួង និងតាមផ្សារទំនើបនានា ដោយគ្រាន់តែចំណាយពេលត្រឹមតែ១៥នាទីប៉ុណ្ណោះ នឹងទទួលបានសេវានេះ ដោយការ ពេញចិត្ត។
សូមបញ្ជាក់ថា ការពិន័យចំពោះឆៀករថយន្ត គឺដាច់ដោយឡែកពីសមត្ថកិច្ច ដោយការផាកពិន័យរបស់សមត្ថកិច្ចទៅលើរថយន្ត ហួសសុពលភាពឆៀក និងមិនព្រមទៅធ្វើឆៀក ចំពោះរថយន្តធុនស្រាលចំនួន ១៨ម៉ឺនរៀល និងរថយន្តធុនធ្ងន់ចំនួន ៣៧ម៉ឺន៥ពាន់រៀល។
ដោយឡែក ការពិន័យចំពោះឆៀករថយន្ត ដោយក្រសួងសាធារណការ និងដឹកជញ្ជូន គឺគិតតាមថ្ងៃដោយក្នុងមួយថ្ងៃ ចំនួន៥០០ រៀល សម្រាប់រថយន្តធុនតូច ឬស្រាល និងរថយន្តធុនធំ ឬធ្ងន់ ក្នុងតម្លៃ២.០០០រៀល ក្នុងមួយថ្ងៃ បន្ថែមទៀត៕ 
