ឯកឧត្តម ខូយ រីដា បានដឹកនាំគណៈប្រតិភូខេត្ត អញ្ជើញទៅបំពេញទស្សនកិច្ចផ្លូវការនៅខេត្តដុងថាប់ សាធារណរដ្ឋសង្គមនិយមវៀតណាម ក្នុងឱកាសអញ្ជើញចូលរួមខួបអនុស្សាវរីយ៍លើកទី៧៩ នៃទិវាយុទ្ធជនពិការ និងពលី (២៧ កក្កដា ១៩៤៧ – ២៧ កក្កដា ២០២៦)

ពោធិ៍សាត់៖ តបតាមការអញ្ជើញ ពិសេសក្នុងស្មារតីពង្រឹងចំណងមិត្តភាព និងកិច្ចសហប្រតិបត្តិការជាប្រពៃណីរវាងកម្ពុជា-វៀតណាម នាថ្ងៃទី០៧-០៩ ខែកក្កដា ឆ្នាំ២០២៦ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំគណៈប្រតិភូខេត្ត អញ្ជើញទៅបំពេញទស្សនកិច្ចផ្លូវការនៅខេត្តដុងថាប់ សាធារណរដ្ឋសង្គមនិយមវៀតណាម ក្នុងឱកាសអញ្ជើញចូលរួមខួបអនុស្សាវរីយ៍លើកទី៧៩ នៃទិវាយុទ្ធជនពិការ និងពលី (២៧ កក្កដា ១៩៤៧ – ២៧ កក្កដា ២០២៦)។

ដំណើរទស្សនកិច្ចនេះ ក៏មានការចូលរួមពីគណៈប្រតិភូខេត្តព្រៃវែង ដឹកនាំដោយលោក ពេជ្រ សុត្ថារ័ត្ន អភិបាលរងនៃគណៈអភិបាលខេត្តព្រៃវែង ដែលជាខេត្តសម្ព័ន្ធមេត្រីភាពជាមួយខេត្តដុងថាប់ផងដែរ។

ក្នុងដំណើរទស្សនកិច្ចដ៏មានអត្ថន័យនេះ គណៈប្រតិភូខេត្តពោធិ៍សាត់ និងខេត្តព្រៃវែង បានអញ្ជើញទៅគោរពវិញ្ញាណក្ខន្ធ និងទស្សនាទីបញ្ចុះសពលោក Nguyen Sinh Sac ដែលជាបិតាបង្កើតរបស់លោកហូជីមិញ ព្រមទាំងបានបន្តចុះទស្សនាសារៈមន្ទីរ ផ្ទះបុរាណ និងរមណីយដ្ឋានវប្បធម៌ Phuong Nam។

ឯកឧត្តមអភិបាលខេត្តពោធិ៍សាត់ និងគណៈប្រតិភូខេត្តព្រៃវែង បានសម្តែងការកោតសរសើរយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់អាជ្ញាធរខេត្តដុងថាប់ ក្នុងការថែរក្សា និងអភិរក្សកេរដំណែលប្រវត្តិសាស្ត្រដ៏មានតម្លៃនេះ។ ឯកឧត្តមបានគូសបញ្ជាក់ថា នេះគឺជាមូលដ្ឋានគ្រឹះដ៏សំខាន់សម្រាប់មនុស្សជំនាន់ក្រោយក្នុងការសិក្សាស្វែងយល់ និងជាស្ពានតភ្ជាប់ទឹកចិត្តយ៉ាងស្អិតល្មួតរវាងប្រជាជននៃប្រទេសយើងទាំងពីរ។​

នាព្រឹកថ្ងៃទី០៩ ខែកក្កដា ឆ្នាំ២០២៦ គណៈប្រតិភូបានអញ្ជើញទៅគោរពវិញ្ញាណក្ខន្ធ នៅទីឈាបនដ្ឋានយោធា Tam Nong ខេត្តដុងថាប់ ដើម្បីឧទ្ទិសកុសលដល់វិញ្ញាណក្ខន្ធយុទ្ធជនស្ម័គ្រចិត្តវៀតណាម ដែលបានពលីជីវិតក្នុងបេសកកម្មអន្តរជាតិ ជួយរំដោះប្រជាជនកម្ពុជាចេញពីរបបប្រល័យពូជសាសន៍ ប៉ុល ពត។ ការលះបង់ដ៏មហិមានេះ គឺជាសក្ខីភាពនៃចំណងសាមគ្គីភាពប្រវត្តិសាស្ត្រ ដែលប្រជាជនកម្ពុជាគ្រប់រូបតែងតែចងចាំ និងដឹងគុណជានិច្ចនូវគុណូបការៈដ៏ថ្លៃថ្លានេះ។

ក្នុងឱកាសនេះ ថ្នាក់ដឹកនាំខេត្តពោធិ៍សាត់ និងខេត្តព្រៃវែង បានពិភាក្សាផ្លាស់ប្តូរយោបល់ ជាមួយថ្នាក់ដឹកនាំខេត្តដុងថាប់ ដើម្បីពង្រឹងសម្ព័ន្ធមេត្រីភាពរវាងខេត្តពោធិ៍សាត់-ខេត្តដុងថាប់, ខេត្តព្រៃវែង-ខេត្តដុងថាប់ ឱ្យកាន់តែរឹងមាំ និងមានប្រសិទ្ធភាពខ្ពស់។ ភាគីទាំងពីរបានឯកភាពគ្នា បន្តជំរុញកិច្ចសហប្រតិបត្តិការលើគ្រប់វិស័យ រួមមាន៖ ការអភិវឌ្ឍសេដ្ឋកិច្ច-ពាណិជ្ជកម្ម ការផ្លាស់ប្តូរទស្សនកិច្ចវប្បធម៌ និងការចែករំលែកបទពិសោធន៍គ្រប់គ្រងរដ្ឋបាល ដើម្បីបុព្វហេតុសុខដុមនីយកម្ម និងការអភិវឌ្ឍប្រកបដោយចីរភាព ស្របតាមទិសដៅរបស់ថ្នាក់ដឹកនាំនៃប្រទេសទាំងពីរ។

ដំណើរទស្សនកិច្ចនេះ បានឆ្លុះបញ្ចាំងយ៉ាងច្បាស់ពីភាពជាដៃគូដ៏ស្មោះត្រង់ និងការប្តេជ្ញាចិត្តរួមគ្នាក្នុងការថែរក្សាទំនាក់ទំនងមិត្តភាពជាប្រពៃណី ឱ្យស្ថិតស្ថេរគង់វង្សសម្រាប់មនុស្សជំនាន់ក្រោយៗទៀត៕