ភ្នំពេញ៖នាព្រឹកថ្ងៃសុក្រ ១១រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែកក្កដា ឆ្នាំ២០២៦ ក្រុមប្រឹក្សាខណ្ឌមានជ័យ បានបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌមានជ័យ អាណត្តិទី៤ ឆ្នាំ២០២៦របស់ខ្លួនក្រោមអធិបតីភាពលោក អុន ចំណាប់ សមាជិកក្រុមប្រឹក្សាខណ្ឌ តំណាងលោក ប្រាំង សុផល ប្រធានក្រុមប្រឹក្សាខណ្ឌមានជ័យ និងលោក សេង គន្ធ អភិបាលនៃគណៈអភិបាលខណ្ឌមានជ័យ។
កិច្ចប្រជុំនេះក៏មានការអញ្ជើញចូលរួមពីសំណាក់សមាជិកក្រុមប្រឹក្សាខណ្ឌមានជ័យ គណៈអភិបាលខណ្ឌ អភិបាលរងខណ្ឌ នាយក នាយករងរដ្ឋបាលខណ្ឌ នាយកទីចាត់ការ លោក-លោកស្រី ប្រធានអង្គភាព ស្ថាប័នជុំវិញខណ្ឌ និងចៅសង្កាត់ទាំង៧ក្នុងខណ្ឌ ព្រមទាំងប្រជាពលរដ្ឋ ជាច្រើននាក់ផងដែរ ដើម្បីពិភាក្សា និងសម្រេចលើរបៀបវារៈសំខាន់ៗមួយចំនួន។
វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌមានជ័យ អាណត្តិទី៤ ឆ្នាំ២០២៦ ក្នុងគោលបំណងពង្រឹងទំនាក់ទំនងរវាងអាជ្ញាធរ និងប្រជាពលរដ្ឋ ស្តាប់សំណូមពរ កង្វល់ និងមតិយោបល់ពីប្រជាពលរដ្ឋ ដើម្បីរួមគ្នាដោះស្រាយបញ្ហាប្រឈម និងជំរុញការអភិវឌ្ឍមូលដ្ឋានឱ្យកាន់តែមានប្រសិទ្ធភាព។
ក្នុងឱកាសនោះ ប្រជាពលរដ្ឋបានលើកឡើងនូវសំណូមពរ កង្វល់ និងបញ្ហាប្រឈមជាច្រើនពាក់ព័ន្ធ នឹងជីវភាពរស់នៅប្រចាំថ្ងៃ រួមមានបញ្ហាហេដ្ឋារចនាសម្ព័ន្ធ ផ្លូវថ្នល់ ប្រព័ន្ធលូរំដោះទឹក បរិស្ថាន សន្តិសុខ សណ្តាប់ធ្នាប់សាធារណៈ និងសេវាសាធារណៈផ្សេងៗ ដោយបានស្នើឱ្យ ក្រុមព្រឹក្សា និងរដ្ឋបាលខណ្ឌជួយពិនិត្យ អន្តរាគមន៍ និងសម្របសម្រួលដោះស្រាយឱ្យបានទាន់ពេលវេលា។
ជាការឆ្លើយតប លោក សេង គន្ធ អភិបាល នៃគណៈអភិបាលខណ្ឌមានជ័យ បានស្តាប់ដោយយកចិត្តទុកដាក់នូវរាល់សំណូមពរ និងមតិយោបល់របស់ប្រជាពលរដ្ឋ ព្រមទាំងបានបកស្រាយ និងឆ្លើយតបដោយផ្ទាល់ចំពោះបញ្ហាមួយចំនួននៅក្នុងអង្គវេទិកា។ ចំពោះបញ្ហាដែលត្រូវការពិនិត្យ និងសិក្សាបន្ថែម លោកអភិបាលខណ្ឌបានចាត់តាំងមន្ត្រីជំនាញ និងការិយាល័យពាក់ព័ន្ធឱ្យចុះពិនិត្យជាក់ស្តែង សម្របសម្រួល និងដោះស្រាយតាមនីតិវិធី ដើម្បីឆ្លើយតបទៅនឹងសំណូមពររបស់ប្រជាពលរដ្ឋ ឱ្យមានប្រសិទ្ធភាព តម្លាភាព និងទាន់ពេលវេលា។
វេទិកាផ្សព្វផ្សាយ និងពិគ្រោះយោបល់នេះ គឺជាយន្តការដ៏សំខាន់មួយក្នុងការពង្រឹងអភិបាលកិច្ចល្អ លើកកម្ពស់តម្លាភាព គណនេយ្យភាព និងការចូលរួមរបស់ប្រជាពលរដ្ឋក្នុងការអភិវឌ្ឍមូលដ្ឋាន។
ទន្ទឹមនឹងនេះ វាក៏បានឆ្លុះបញ្ចាំងពីការប្តេជ្ញាចិត្តរបស់រដ្ឋបាលខណ្ឌមានជ័យ ក្នុងការស្តាប់មតិប្រជាពលរដ្ឋ ដោះស្រាយបញ្ហាជាក់ស្តែង និងផ្តល់សេវាសាធារណៈឱ្យកាន់តែមានប្រសិទ្ធភាព សំដៅលើកកម្ពស់គុណភាពជីវិត និងសុខុមាលភាពរបស់ប្រជាពលរដ្ឋនៅក្នុងមូលដ្ឋាន៕
