(ព្រះវិហារ)៖ ធ្វើឡើងនាព្រឹកថ្ងៃទី២៨ ខែមីនា ឆ្នាំ២០២២នេះ មន្ទីរព័ត៌មានខេត្តព្រះវិហារ បានរៀបចំកិច្ចប្រជុំបូកសរុបលទ្ធផលសកម្មភាពការងារប្រចាំត្រីមាសទី១ ឆ្នាំ២០២២ ក្រោមវត្តមានលោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ និងមានការចូលរួមពីលោកអនុប្រធានទាំង២ នាយ នាយរងការិយាល័យ មន្រ្តី និងមន្ត្រីកិច្ចសន្យាជាច្រើនរូបទៀត។

លោកស្រី ហែម សុគុណពិសី ប្រធានមន្ទីរព័ត៌មានខេត្ត បានសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំមន្រ្តី នៃការិយាល័យទាំង៥របស់មន្ទីរ ដែលក្នុងរយៈពេលកន្លងមកនេះ បានខិតខំប្រឹងប្រែងក្នុងការបំពេញការងារតាមជំនាញរបស់ខ្លួនយ៉ាងយកចិត្តទុកដាក់ និងទទួលខុសត្រូវខ្ពស់តាមការិយាល័យនីមួយៗ។ ជាមួយនេះ លោកស្រីប្រធានមន្ទីរក៏បានជម្រុញបន្ថែមដល់មន្រ្តីជំនាញទាំងអស់ បន្តយកចិត្តទុកដាក់ បង្កើនប្រសិទ្ធភាពការងាររបស់ខ្លួនក្នុងវិស័យព័ត៌មានឲ្យបានកាន់តែប្រសើរជាងមុនបន្ថែមទៀត ត្រូវសហការ និងទំនាក់ទំនងគ្នាឲ្យបានល្អក្នុងការផលិតព័ត៌មានឲ្យបានច្រើន ជាពិសេសត្រូវរកដំណោះស្រាយរាល់បញ្ហាប្រឈមនានា ដែលកើតឡើងនៅរាល់សកម្មភាពការងារ។

ក្នុងនោះដែរលោកស្រីប្រធានមន្ទីរ បានលើកឡើងថា បើទោះបីសកម្មភាពមួយចំនួនកន្លងមកមានភាពយឺតយ៉ាវក្ដី ប៉ុន្ដែលទ្ធផលការងាររបស់យើងសម្រេចបានទៅមុខជានិច្ច និងត្រូវដោះស្រាយកែលម្អ និងបំពេញនូវចំណុចខ្វះខាត គឺធ្វើយ៉ាងណារួមគ្នាសម្រេចបាននូវលទ្ធផលការងារឱ្យមានភាពល្អប្រសើរ និងមានសាមគ្គីភាពបន្ថែមទៀតសម្រាប់ខែខាងមុខៗ។

ឆ្លៀតនូវឱកាសនោះផងដែរ លោកស្រីបាន សំណូមពរ និងផ្តាំផ្ញើរដល់មន្រ្តីរាជការទាំងអស់ត្រូវអនុវត្តន៍ឱ្យបានខ្ជាប់ខ្ជួន ពីវិធានការការពាររបស់រាជរដ្ឋាភិបាល ៣ការពារ ៣កុំ និងក្រសួងសុខាភិបាល ដើម្បីការពារជម្ងឺកូវីដ-១៩ ជាពិសេសប្រភេទ អូមីក្រុងថ្មី ដែលកំពុងរីករាលដាលក្នុងសហគមន៍៕