មណ្ឌលគិរី ៖ គិតចាប់ពីថ្ងៃទី០១ ដល់ថ្ងៃទី០៤ ខែមករា ឆ្នាំ២០១៦ កាលពីរសៀលថ្ងៃទី០៥ មករា ២០១៦ ក្រោមអធិបតីភាពលោកឧត្តមសេនីយ៍ត្រី តូ យ៉ុន ស្នងការនគរបាលខេត្តមណ្ឌលគិរី មានការចូលរូមពីសំណាក់ លោកវរសេនីយ៍ឯក ភិន សុភឿន ស្នងការរងទទួលបន្ទុកសណ្តាប់ធ្នាប់ និងលោកវរសេនីយ៍ទោ ចាន់ ទិត្យ នាយការិយាល័យចរាចរណ៍ខេត្ត និងមន្រី្ដនគរបាលជំនាញចំនួន៣៣នាក់។
លោកវរសេនីយ៍ទោ ចាន់ ទិត្យ នាយការិយាល័យចរាចរណ៍ខេត្តបានអានជូននូវរបាយការណ៍ស្តីពីការអនុវត្តន៍ច្បាប់ចរាចរណ៍ផ្លូវគោកថ្មីក្នុងឱកាសនោះថា ដោយគិតចាប់ពីថ្ងៃទី០១ ដល់ថ្ងៃទី០៤ មករា ២០១៦ នេះ មន្ដ្រីនគរបាលចាប់អនុវត្តន៍ច្បាប់ចរាចរណ៍ផ្លូវគោកថ្មីនេះនៅតាមចំនុចនីមួយៗ ឃាត់បានយានយន្ដដែលល្មើសនឹងច្បាប់ចរាចរណ៍មានចំនួន ៤៨គ្រឿង ក្នុងនោះ មានរថយន្ដចំនួន ២៦គ្រឿង ម៉ូតូចំនួន ២២គ្រឿង និងធ្វើការអប់រំតាមដងផ្លូវចំនួន ៦៧គ្រឿង ក្នុងនោះមានរថយន្តចំនួន ២៥គ្រឿង ម៉ូតូចំនួន ៤២គ្រឿង និងផាកវិន័យបង់ជាទឹកប្រាក់បានចំនួន ១៧គ្រឿង ក្នុងនោះ រថយន្ដចំនួន ១៣គ្រឿង និងម៉ូតូចំនួន ៤គ្រឿង។
លោកវរសេនីយ៍ទោ ចាន់ ទិត្យ បានមានប្រសាសន៍បន្ដទៀតថា ក្នុងការអនុវត្តន៍ច្បាប់ចរាចរណ៍ផ្លូវគោកថ្មីនេះ ការិយាល័យចរាចរណ៍មានជួបនឹងបញ្ហាដូចជា ប្រឈមនិងកម្លាំងនគរបាលចរាចរណ៍មានតិច ហើយផ្លូវមានច្រើនខ្វាត់ខ្វែង ក្នុងមួយគោលដៅត្រូវប្រើកម្លាំងនគរបាលចរាចរណ៍ចាប់ពី ៧ ទៅ ៨នាក់ក្នុងមួយគោលដៅ ខ្វះសម្ភារៈសម្រាប់ប្រើប្រាស់ក្នុងការអនុវត្តន៍តាមគោលដៅ ខ្វះការសហការជាមួយសមត្ថកិច្ច មន្ដ្រីពាក់ព័ន្ធ ខ្វះការចូលរួមគោរព ប្រជាពលរដ្ឋមិនសហការ ជាមួយសមត្ថកិច្ចនគរបាលចរាចរណ៍ តាមដងផ្លូវ ពេលដែលធ្វើឲ្យមានកំហុសខុសនឹង ច្បាប់ចរាចរណ៍ ពីសំណាក់មន្ដ្រីធំៗមួយចំនួន នៅក្នុងខេត្ត ខ្វះកន្លែងរក្សាទុកយានយន្ដពុំទាន់មានសុវត្ថិភាពគ្រប់គ្រាន់។
លោកបានបន្ដទៀតថា ក្នុងការធ្វើដំណើរតាមដងផ្លូវរបស់ពួកគាត់ភាគច្រើន គឺម៉ូតូគ្មានផ្លាកលេខ គ្មានមួក គ្មានកញ្ចក់ គ្មានបច្ចេកទេសគ្រប់គ្រាន់ និងជិះគ្នាច្រើនដែលធ្វើឲ្យមន្ដ្រីនគរបាលចរាចរណ៍បានត្រឹមតែឃាត់យានទុកតាមច្បាប់ ហើយធ្វើការផាកពិន័យតាមច្បាប់គ្រាន់តែធ្វើការណែនាំដល់ពួកគាត់ឲ្យមាន លក្ខណៈសម្បត្តិគ្រប់គ្រាន់ទើបអាចធ្វើចរាចរណ៍បាន។
លោកឧត្តមសេនីយ៍ត្រី តូច យ៉ុន ស្នងការខេត្តបានបញ្ជាក់ថា បើទោះជាកម្លាំងនគរបាលខេត្តមានចំនួនតិច ខ្វះខាតសម្ភារៈ និងមធ្យោបាយយ៉ាងណាក៍ដោយ កម្លាំងនគរបាលជំនាញត្រូវតែបំពេញភារកិច្ច អនុវត្តន៍ ការប្រតិបត្តិច្បាប់ចរាចរណ៍ថ្មីអោយស្របទៅតាមគោលការណ៍ច្បាប់ដែលបានចែងនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា៕
ដោយ : គឹម ចំរើន
