ខេត្តរតនគីរី ៖ ៖ អាជីវករជាច្រើននាក់នៅក្នុងផ្សារបានលុង កំពុងរងនូវការហិតសំរាមសំអុយ របស់លោក ជា គង់ គរដូចភ្នំ មិនព្រមកើបយកទៅចាក់ចោល ធ្វើអោយអាជីវករមួយចំនួនដែលមានតូបនៅក្បែរគំនរសំរាមនោះរងនូវ ការប៉ះពាល់ដល់សុខភាពអាជីវករ និងភ្ញៀវទេសចរណ៍ជាតិ និងអន្តរជាតិដែលគេមកលេងខេត្តរតនគិរី ហើយភ្ញៀវទាំងនោះបាននាំគ្នាចូលផ្សារបានលុងគយគន់មើលតើមានអ្វី លក់ខ្លះ ហើយភ្ញៀវទាំងនោះបានត្រឹមតែមើលគំនរសសំរាម ហិតក្លិនអាសោចហើយក៏នាំគ្នាខ្ទប់មាត់ដើរចេញមកក្រៅផ្សារ ហើយបានរអ៊ួដល់អ្នកម៉ៅសំរាមនោះថា មិនយកសំរាមចាក់ចោលទាន់ពេលវេលាសោះ ធ្វើអោយអាជីវករក្តៅក្រហាយបានលើកគ្នាមកសាលាក្រុង ដើម្បីសុំអន្តរាគមន៍ពីអភិបាលក្រុង ដែលទើបឡើងកាន់តំណែងថ្មីវ័យក្មេងនោះ តែលោកអភិបាលក្រុងរូបនោះ បែរជាកាន់ជើងលោកជា គង់ ហើយបានរិៈគន់ទៅអោយខាងភាគីផ្សារ មិនជួយមើលក្រុមអាជីវករនោះផង។
ហេតុការណ៍នេះបានកើតឡើងកាលពីវេលាម៉ោង៨ព្រឹក ថ្ងៃទី ១៩ ខែមីនា ឆ្នាំ២០១៥ ស្ថិតនៅក្នុងផ្សារបានលុងតែម្តង។
ក្រុមអាជីវករបានប្រាប់អ្នកសារពត៌មានដឹងថា សំរាមដែលគរក្នុងផ្សារដូចភ្នំនោះលោក ជា គង់ បញ្ជាឲ្យកម្មករដឹកសំរាមក្នុងមួយថ្ងៃយកតែ២រទេះពីកន្លែងស្តុក ក្នុងផ្សារតែប៉ុណ្ណោះ ហើយក្រុមអាជីវករក៏បានប្រាប់បន្តថាសំរាមដែលគរដូចភ្នំនៅក្នុង ស្តុកនេះមានរយៈពេលជាង២០ថ្ងៃមកហើយដែលធ្វើអោយមានក្លិនស្អុយដល់ អាជីវករដែលលក់នៅក្បែរៗនោះ ក្រុមអាជីវករទាំងនោះសុំអោយអាជ្ញាធរជួយចាត់ចែងអំពីបញ្ហាសំរាម ក្នុងផ្សារនេះផង តែអាជីវករមួយចំនួនហាក់បីដូចជាអស់សង្ឃឹមថាមិនដឹងអោយលោកណាជួយទេ ព្រោះចៅហ្វាយក្រុង និងលោកជា គង់ ត្រូវគ្នាដូចទឹកនិងត្រីអញ្ចឹងនោះ។
បើតាមសំដីលោក ជាម សុផាត អ្នកគ្រប់គ្រងផ្សារបានបញ្ជាក់ថា តើអោយកម្មករយកសំរាមចាក់ នៅឯណា បើក្រុមហ៊ុន ជា គង់ មិនមកប្រមូលសំរាមផងនោះ ព្រោះកន្លែងស្តុកសំរាមគរដូចភ្នំទៅហើយ សូមលោកអភិបាលមើលអោយគ្រប់ជ្រុងជ្រោយផង កុំចេះតែថា អោយខាងផ្សារនោះពេក ៕
សន ចាន់ឌី
