កំពត ៖ ទីបំផុតគ្រឿងចក្រដែលធ្វើសកម្មភាពជីកកកាយយកអាចម៍ដីស្ថិតត្រង់ចំណុចវត្តភ្នំសាលី ដ៏គគ្រឹកគគ្រេងនោះ ត្រូវបានអាជ្ញាធរក្នុងតំបន់ចុះទៅផ្អាកសកម្មភាពហើយ បន្ទាប់ពីម្ចាស់គ្រឿងចក្រមកជីកកាយបានរយៈពេលពីរថ្ងៃមកនោះ។
ការបញ្ឈប់សកម្មភាពគ្រឿងចក្រនេះ បានធ្វើឡើងនៅវេលាម៉ោង៣និង២៥ នាទីរសៀល ថ្ងៃទី១១ខែសីហា ឆ្នាំ២០១៧ ត្រង់ចំណុចបរិវេណវត្តភ្នំសាលី ក្នុងភូមិភ្នំសាលី ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
តាមការបញ្ជាក់ពីប្រជាពលរដ្ឋតំបន់ខាងលើបានឲ្យដឹងថា គ្រឿងចក្រនេះ បានមកជីកកាយយកអាចម៍ដីកាលពីថ្ងៃទី១០ខែសីហា ឆ្នាំ២០១៧ម្សិលមិញ ដោយដឹកជញ្ជូនអាចម៍ដីតាមរថយន្តឆ្លងកាត់សាលាឃុំកំពង់ត្រាចខាងលិច ឆ្ពោះទៅកាន់ទីប្រជុំជនស្រុកកំពង់ត្រាច ដូចហែរកឋិន ដោយប្រើសុទ្ធតែរថយន្តបែនធំៗ ហើយការមកធ្វើអាជីវកម្មជីកយកអាចម៍ដីលក់នេះ ក៏មានគេលួចខ្សឹបប្រាប់ថា ម្ចាស់គ្រឿងចក្រពុំមានច្បាប់ទម្លាប់ត្រឹមត្រូវនោះទេ គឺមកជីកដីដឹកទៅលក់ឆៅៗតែម្តង ទើបប្រជាពលរដ្ឋផ្ទុះប្រតិកម្ម ព្រមទាំងរាយការណ៍ទៅខាងអាជ្ញាធរភ្លាមៗ។
បើតាមប្រភពដាច់ដោយឡែកបានឲ្យដឹងថា គ្រឿងចក្រនេះ ត្រូវបានម្ចាស់នាំមកពីភូមិសាស្ត្រស្រុកឈូក ប៉ុន្តែគេមិនដឹងថា ថៅកែគ្រឿងចក្រនេះមានអំណាចប៉ុណ្ណាទេ ទើបហ៊ានយកអេស្កាវាទ័រមកជីកកាយយកអាចម៍ដីលក់យ៉ាងគឃ្លើនបែបនេះ។ប្រភពបានបញ្ជាក់ថា ការជីកកាយយកដីដឹកជញ្ជូនតាមរថយន្តបែនរាប់រយឡានបែរជាអាជ្ញាធរក្នុងតំបន់មិនដឹង លុះមានប្រតិកម្មពីសំណាក់ប្រជាពលរដ្ឋ និងព្រះសង្ឃទើបឃើញមុខលោកមេឃុំមកអន្តរាគមន៍ ហើយការទៅផ្អាកសកម្មភាព ស្ទើចង់ហួសពេល ព្រោះទីតាំងនោះវាក្លាយជារណ្តៅដីដ៏ជ្រៅមួយបាត់ទៅហើយ។
ទោះជាយ៉ាងណា អភិបាលស្រុកកំពង់ត្រាច លោកអ៊ុម សីុណាត បានបញ្ជាក់ប្រាប់តាមទូរស័ព្ទ នៅល្ងាចថ្ងៃទី១១ខែសីហា ឆ្នាំ២០១៧នេះថា គ្រឿងចក្រដែលមកជីកកាយយកអាចម៍ដី ត្រង់ចំណុចវត្តភ្នំសាលី ពុំបានសុំច្បាប់ពីក្រុមអាជ្ញាធរនិងជំនាញណាឡើយ ទើបនៅរសៀលនេះ លោកចាត់ឲ្យលោកមេឃុំកំពង់ត្រាចខាងលិច ទៅបង្អាកសកម្មភាពភ្លាមៗតែម្តង ៕
ណារិទ្ធ
