កែប ៖ បុរសវ័យជាងពាក់កណ្តាលម្នាក់បានសម្រចចិត្តចងកធ្វើអត្តឃាត ដោយយកក្រមាចងភ្ជាប់នឹងធ្នឹមផ្ទះរបស់ខ្លួន ក្រោយពីជនរងគ្រោះវិលត្រឡប់មកពីផឹកស៊ីវិញ ហើយការគិតខ្លីនេះ គេសង្ស័យមកពីការរស់នៅក្នុងស្ថានភាពឯកា គ្មានទីបង្អែកទើបជ្រើសយកផ្លូវស្លាប់បែបនេះ។
ហេតុការណ៍បង្កការភ្ញាក់ផ្អើលនេះ បានកើតឡើងកាលពីវេលាម៉ោង១៥និង៣០នាទីរសៀល ថ្ងៃទី២៦ខែកក្កដាឆ្នាំ២០១៧ ស្ថិតចំណុចផ្ទះជនរងគ្រោះ ក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប(ចំណុចបន្ទាយទាហាន វាលវង់)។
បើតាមប្រភពពីលោកវរសេនីយ៍ទោ តូវ សុវណ្ណ អធិការនគរបាលស្រុកដំណាក់ចង្អើរ បានបង្ហើបថា ជនរងគ្រោះខាងលើមានឈ្មោះ អ៊ុំ ឌីណា ភេទប្រុស អាយុ៥៥ឆ្នាំ មានស្រុកកំណើតក្នុងស្រុកស្រែអំបិល ខេត្តកោះកុង ប៉ុន្តែបច្ចុប្បន្នមករស់នៅចំណុចទីតាំងកើតហេតុខាងលើ។លោកអធិការបានបញ្ជាក់ទៀតថា បុរសរងគ្រោះជាបុរសពោះម៉ាយរស់នៅម្នាក់ឯង ហើយការចងកធ្វើអត្តឃាតនេះ ដោយសារតែខូចចិត្តរឿងបែកបាក់គ្រួសារ គឺប្រពន្ធក៏ឃ្លាត កូនក៏មិននៅក្បែរ ទើបសម្រេចយកស្រាធ្វើជាមិត្ត ដោយបានក្លាយជាមនុស្សញៀនស្រាផឹកគ្មានទំនេរ ផឹកមហាផឹក ស្រវឹងរាប់ឆ្នាំគ្មានគិតរិះរេ មិនខ្វាយខ្វល់ ហើយជម្រើសចុងក្រោយបន្ទាប់ពីផឹកស្រវឹងជោកខ្លួនហើយនោះ ក៏ដើរចូលផ្ទះយកក្រមាចងកសម្លាប់ខ្លួនឯងដោយសុវត្ថិភាពតែម្តង។
ក្រោយពីមានករណីភ្ញាក់ផ្អើលខាងលើនេះ សមត្ថកិច្ចជំនាញ ក៏បានចុះមកពិនិត្យ ធ្វើកោសល្យវិច្ច័យខ្លាចមានពាក់ព័ន្ធនឹងអំពើឃាតកម្ម ប៉ុន្តែបន្ទាប់ពីបានពិនិត្យឃើញ ពុំមានស្លាកស្នាមគួរឲ្យកត់សម្គាល់ ទើបប្រគល់សពជូនទៅក្រុមគ្រួសារដើម្បីធ្វើបុណ្យតាមប្រពៃណី ៕
ណារិទ្ធ
