លោក ប៉ែន បូណា ដឹកនាំគណៈប្រតិភូក្លឹបអ្នកកាសែតកម្ពុជាគោរពវិញ្ញាណក្ខន្ធសព មហាឧបាសិកា កុសលចិត្តាពុទ្ធសាសនូបត្ថម្ភក៍ ពេន យុត

ភ្នំពេញ ៖ នៅរសៀលថ្ងៃសុក្រ ១៥កើត ខែស្រាពណ៍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១២ ខែសីហា ឆ្នាំ២០២២នេះ លោក ប៉ែន បូណា ប្រធានក្លឹបអ្នកកាសែតកម្ពុជា បានដឹកនាំគណៈប្រតិភូចូលរួមដាក់កម្រង់ផ្កាគោរពវិញ្ញាណក្ខន្ធសព មហាឧបាសិកា កុសលចិត្តាពុទ្ធសាសនូបត្ថម្ភក៍ ពេន យុត ម្តាយក្មេក ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ត្រូវជាម្តាយបង្កើតលោកជំទាវ ខៀវ ទេព រង្ស៊ី កាញារីទ្ធ នៅឯភូមិគ្រឹះលេខ ៣៨ ផ្លូវលេខ ២៨៥ សង្កាត់បឹងកក់១ ខណ្ឌទួលគោក រាជធានីភ្នំពេញ។

ក្នុងនាមគណៈប្រតិភូក្លឹបអ្នកកាសែតកម្ពុជា សូមចូលរួមមណទុក្ខយ៉ាងក្រៀមក្រំបំផុតជាមួយ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន និងលោកជំទាវ ទេព រង្ស៊ី កាញារីទ្ធ ចំពោះមរណភាពលោកយាយ មហាឧបាសិកា ពេន យុត ដែលបានទទួលមរណភាពកាលពីថ្ងៃទី៩ ខែសីហា ឆ្នាំ២០២២ ក្នុងជន្មាយុ ៩២ឆ្នាំ ដោយរោគាពាធ។

សូមបញ្ជាក់ថា សពមហាឧបាសិកា កុសលចិត្តាពុទ្ធសាសនូបត្ថម្ភក៍ ពេន យុត តម្កល់ធ្វើបុណ្យតាមប្រពៃណីនៅភូមិគ្រឹះលេខ ៣៨ ផ្លូវលេខ២៨៥ សង្កាត់បឹងកក់១ ខណ្ឌទួលគោក រាជធានីភ្នំពេញ។ បើតាមកម្មវិធីបុណ្យ សពមហាឧបាសិកា កុសលចិត្តាពុទ្ធ សាសនូបត្ថម្ភក៍ ពេន យុត នឹងត្រូវដង្ហែទៅកាន់ឈាបនដ្ឋាននៅឯវត្តលង្កានាព្រឹកថ្ងៃអាទិត្យ ២រោច ខែស្រាពណ៍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៤ ខែសីហា ឆ្នាំ២០២២ ខាងមុខនេះ៕