វេទិកាផ្សព្វផ្សាយ និងពិគ្រោះយោបល់ក្រុមប្រឹក្សាខណ្ឌព្រែកព្នៅ អាណត្តិទី៣ ឆ្នាំ២០២២

(ភ្នំពេញ)៖ នៅព្រឹកថ្ងៃពុធ ១៣កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១០ ខែសីហា ឆ្នាំ២០២២ វេលាម៉ោង០៨:០០នាទី លោក សុខ សម្បត្តិ អភិបាល នៃគណ:អភិបាលខណ្ឌព្រែកព្នៅ និងលោក ម៉ៅ បូរ៉ា ប្រធានក្រុមប្រឹក្សខណ្ឌ បានចូលរួមជាអធិបតី ក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខណ្ឌព្រែកព្នៅ អាណត្តិទី៣ ឆ្នាំ២០២២។

វេទិកាផ្សព្វផ្សាយ និងពិគ្រោះយោបល់ក្រុមប្រឹក្សាខណ្ឌព្រែកព្នៅ អាណត្តិទី៣ ឆ្នាំ២០២២ នៅព្រឹកនេះ បានប្រព្រឹត្តទៅប្រកបដោយជោគជ័យដូចរបៀបវារៈដែលបានគ្រោងទុក ដោយមានការអញ្ជើញចូលរួមពី ឯកឧត្តម លោកជំទាវសមាជិកក្រុមប្រឹក្សារាជធានីភ្នំពេញ សមាជិក សមាជិកាក្រុមប្រឹក្សាខណ្ឌ លោក-លោកស្រី ជាអភិបាលរងខណ្ឌ លោកអធិការនគរបាលខណ្ឌ លោកមេបញ្ជាការមូលដ្ឋានកងរាជអាវុធហត្ថខណ្ឌ លោកនាយក-នាយករងរដ្ឋបាលសាលាខណ្ឌ លោក-លោកស្រីប្រធានការិយាល័យចំណុះរដ្ឋបាលខណ្ឌ លោកប្រធានការិយាល័យប្រជាពលរដ្ឋ លោកប្រធានការិយាល័យសុខាភិបាលស្រុកប្រតិបត្តិខណ្ឌ ប្រធានមន្ទីរពេទ្យបង្អែកព្រែកព្នៅ មណ្ឌលសុខភាពសង្កាត់ទាំង៥ តំណាងក្រុមហ៊ុនប្រមូលសំរាម៨០០Super ក្រុមប្រឹក្សាសង្កាត់ នាយ-នាយប៉ុស្តិ៍រងនគរបាលរដ្ឋបាលទាំង៥ លោក លោកស្រីប្រធានភូមិទាំង៥៩ភូមិ និងសហគមន៍ចំនួន១០ លោកនាយក-នាយិកាសាលា សរុបចំនួន ៣៣១នាក់ ស្រី៦៤នាក់។

ជាលទ្ធផលនៃវេទិកាទទួលបានសំណេី រនិងសំណូមពរសរុបចំនួន ៤១ បញ្ហា ដែលក្នុងនោះសំណេីរ/សំណូមពរផ្ទាល់មាត់ចំនួន បញ្ហា ០៥ បញ្ហា និងសំណេីរ/សំណូមពរលាយល័ក្ខអក្សរចំនួន ៤១បញ្ហា ។ សំណេីរ/សំណូមទាំងនោះ លោក សុខ សម្បត្តិ អភិបាលខណ្ឌព្រែកព្នៅ បានឆ្លេីយបំភ្លឺ ដោះស្រាយនៅនឹងកន្លែង ដោយឡែកបញ្ហាដែលនៅសេសសល់តិចតួច នឹងដឹកនាំ ចុះពិនិត្យជាក់ស្តែងនៅពេលបន្ទាប់។

សូមបញ្ជាក់ជូនថា លទ្ធផលវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌព្រែកព្នៅ អាណត្តិទី៣ ឆ្នាំ២០២០ កន្លងទៅ រដ្ឋបាលខណ្ឌសម្រេចបានលទ្ធផលដូចតទៅ សំណេីរ/សំណូមពរ អង្គវេទិកាចំនួន ១៦ បញ្ហា ក្នុងនោះ បានដោះស្រាយរួចចំនួន ០៩ បញ្ហា កំពុងដោះស្រាយ ០៧ បញ្ហា បានដាក់បញ្ចូលក្នុងផែនការអភិវឌ្ឍន៍ ៥ឆ្នាំ និងកម្មវិធីវិនិយោគ ៣ឆ្នាំរំកឹល របស់ខណ្ឌ-សង្កាត់។