ពិធីបើកនិងបិទអនុសំវច្ឆរមហាសន្និបាតមន្ត្រីសង្ឃទូទាំងខេត្ត៩៨វត្តលើកទី២៩ក្រោមអធិបតីភាព ឯកឧត្តមសង់ រីហា អភិបាលរងខេត្តឧត្តរមានជ័យ
(ឧត្តរមានជ័យ)នាព្រឹកថ្ងៃទី២៩ខែមេសាឆ្នាំ២០២២ស្ថិតនៅត្រង់បរិវេណមន្ទីរធម្មការនិងសាសនាខេត្តបានរៀបចំប្រារព្វពិធីអនុសំវច្ឆរមហាសន្និបាតមន្ត្រីសង្ឃទូទាំងខេត្តលើកទី២៩ ក្រោមអធិបតីភាព ឯកឧត្តម សង់ រីហា អភិបាលរងខេត្តឧត្តរមានជ័យតំណាងដ៏ខ្ពង់ខ្ពស់ឯកឧត្តម ប៉ែន កុសល្យ អភិបាលខេត្តឧត្តរមានជ័យ។
ជាមួយគ្នានេះដែរលោក ឆឹម តឿ ប្រធានមន្ទីរធម្មការនិងសាសនាខេត្តឧត្តរមានជ័យបានបញ្ជាក់ប្រាប់ឲ្យដឹងនៅថ្ងៃទី២៩ខែមេសាឆ្នាំ២០២២ថា ដើម្បីបន្តអនុវត្តខ្លឹមសារ សង្ឃប្រកាសរបស់អនុសំវច្ឆរមហាសន្និបាតមន្ត្រីសង្ឃទូទាំងប្រទេសកន្លងមកនិងលិខិតបទដ្ធានគតិយុត្តិនានាដែលនៅជាធរមាន។មួយវិញទៀតថ្នាក់ដឹកនាំពុទ្ធមណ្ឌលវិបស្សនាធុរ: មានកាតព្វកិច្ច បណ្តុះបណ្តាលគ្រូសមថ.វិបស្សនាកម្មដ្ធានឲ្យបានគ្រប់គ្រាន់តាមតម្រូវការនៅទូទាំងក្រុង ស្រុក ពង្រឹងវគ្គសិក្សាខ្លី និងវែងផ្នែកសមថ វិបស្សនាកម្មដ្ធានឲ្យបានល្អប្រសើរនិងមានគុណភាពបន្ថែមទៀត។
ឆ្លៀតនៅក្នុងពិធីនោះដែរ ឯកឧត្តម សង់ រីហា អភិបាលរងខេត្តឧត្តរមានជ័យបានមានប្រសាសន៏ថា ក្នុងនាមអាជ្ញាធរខេត្តការពង្រឹងការបដិបត្តិធម៌វិន័យ វិស័យពុទ្ធិកសិក្សាគ្រប់កម្រិត(បឋម មធ្យម ឧត្តម និងក្រោយឧត្តម)របស់ភិក្ខុ សាមណេរក្នុងពុទ្ធសាសនា ចតុប្បារិសុទ្ធិសីល អភិសមាចារដូចជា កោរកេសា រោមចិញ្ចើមនិងស្លៀកដណ្តប់ស្បង់ចីវរឲ្យជាបរិមណ្ឌលសក្តិសមជាសមណសក្សបុត្តិយ៏។
សូមបញ្ជាក់ថា ឯកឧត្តមអភិបាលរងខេត្តក៏បានលើកឡើងនៅក្នុងពិធីបើកនិងបិទមហាសន្និបាតនេះ ដោយបានមានមតិសំណេះសំណាលបន្ថែមស្តីពីការទប់ស្កាត់ការរីករាលដាលនៃមេរោគដ៏កាចសាហាវកូវីត១៩ ហើយនិងបានធ្វើការផ្សព្វផ្សាយដល់គ្រប់ព្រះសង្ឃនៃគណ:និកាយគ្រប់ព្រះអង្គទាំង៩៨វត្តដែលបានទទួលបានការចាក់វ៉ាក់សាំងដុសទី៣ហើយ សូមមកទទួលការចាក់វ៉ាក់សាំងដុសទី៤បន្ថែមទៀតនៅតាមមណ្ឌលសុខភាពនានាតាមបណ្តា ក្រុង ស្រុកដែលនៅជិតវត្ត ដែលព្រះអង្គគង់នៅតាមទីអារាមឲ្យបានគ្រប់ៗព្រះអង្គផងដែរ។
