ក្នុងឱកាសចូលឆ្នាំថ្មីប្រពៃណីជាតិខ្មែរ រយៈពេល៣ថ្ងៃ មានភ្ញៀវទេសចរមកលម្ហែ កម្សាន្តនៅខេត្តកែប ជាង១២ម៉ឺននាក់
(ខេត្តកែប)៖ តាមតួលេខដែលទទួលបានពីរដ្ឋបាលខេត្តកែប បានបង្ហាញថា គិតរយៈពេល៣ថ្ងៃ គឺថ្ងៃទី១៤-១៥ និង១៦ ខែមេសា ឆ្នាំ២០២២ មានភ្ញៀវទេសចរ មកទស្សនា សម្រាក លម្ហែ កម្សាន្ត នៅរមណីយដ្ឋានខេត្តកែប ចំនួន ១២២,៦៩៨នាក់។
រដ្ឋបាលខេត្តកែប បានបញ្ជាក់ដែរថា នៅថ្ងៃទី១៤ ខែមេសា ឆ្នាំ២០២២ មានអ្នកទេសចរមកទស្សនា នៅខេត្តកែប ចំនួន២៥,៥០៣នាក់ ក្នុងនោះមានភ្ញៀវអន្តរជាតិចំនួន២១៤នាក់។ ចំណែកថ្ងៃទី១៥ ខែមេសា ឆ្នាំ២០២២ ត្រូវជាថ្ងៃទី២ នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ព.ស ២៥៦៥ គ.ស ២០២២ ខេត្តកែប បានទទួលភ្ញៀវទេសចរជាតិ និងបរទេស អញ្ចេីញមកសម្រាកលំហែកម្សាន្ត នៅតាមបណ្ដារមនីយដ្ឋាននានាទូទាំងខេត្ត មានចំនួន៤៤,៥២៩នាក់ ក្នុងនោះ ភ្ញៀវទេសចរជាតិចំនួន៤៤,១៨១នាក់ ភ្ញៀវទេសចរបរទេសចំនួន៣៤៨នាក់។
សម្រាប់មធ្យោបាយធ្វើដំណើរដោយរថយន្តសរុបចំនួន៤,៤១៥គ្រឿង ក្នុងនោះ រថយន្តតូចចំនួន២,៨៦៥គ្រឿង រថយន្តមធ្យមចំនួន១,៥០៥គ្រឿង និងរថយន្តធំចំនួន៤៥គ្រឿង។
សម្រាប់ថ្ងៃសៅរ៍ ទី១៦ ខែមេសា ឆ្នាំ២០២២ ត្រូវជាថ្ងៃទី៣ នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ព.ស ២៥៦៥ គ.ស ២០២២ ខេត្តកែប បានទទួលភ្ញៀវទេសចរជាតិ និងបរទេស អញ្ចេីញមកសម្រាកលំហែកម្សាន្ត នៅតាមបណ្ដារមនីយដ្ឋាននានាទូទាំងខេត្ត មានចំនួន៥៣,៦៨២នាក់ ក្នុងនោះ ភ្ញៀវទេសចរជាតិចំនួន៥៣,២២៨នាក់ ភ្ញៀវទេសចរបរទេសចំនួន៤៥៤នាក់ សម្រាប់មធ្យោបាយធ្វើដំណើរដោយរថយន្តសរុបចំនួន៤,៩១២គ្រឿង ក្នុងនោះ រថយន្តតូចចំនួន៣,១០៥គ្រឿង រថយន្តមធ្យមចំនួន១,៧៥៥គ្រឿង និងរថយន្តធុនធំមានចំនួន៥២គ្រឿង។
សូមបញ្ជាក់ថា ក្នុងរយៈពេល៣ថ្ងៃ(ថ្ងៃទី១៤ រហូតដល់ថ្ងៃ១៦) នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ព.ស ២៥៦៥ គ.ស ២០២២ ខេត្តកែប បានទទួលភ្ញៀវទេសចរជាតិ និងបរទេស សរុបចំនួន១២៣,៧១៤ ក្នុងនោះ ភ្ញៀវទេសចរជាតិមានចំនួន១២២,៦៩៨នាក់ និងភ្ញៀវទេសចរបរទេសមានចំនួន១,០១៦នាក់ សម្រាប់មធ្យោបាយធ្វើដំណើរដោយរថយន្តសរុបចំនួន១១,៨៣១គ្រឿង ក្នុងនោះ រថយន្តតូចចំនួន៧,៥៥៥គ្រឿង រថយន្តមធ្យមចំនួន៤,១៤៣គ្រឿង និងរថយន្តធំចំនួន១៣៣គ្រឿង៕ សេង ណារិទ្ធ
