កណ្តាល៖ ឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្តាល និងឯកឧត្តម គង់ សោភណ្ឌ័ អភិបាលខេត្ត នៅរសៀលថ្ងៃទី១៤ ខែមេសានេះ បានអញ្ជើញ ជាអធិបតីភាព ក្នុងពិធីបើកព្រឹត្តិការណ៍សង្ក្រាន្តខេត្តកណ្តាលឆ្នាំ២០២២ ដែលពិធីនេះប្រារព្ធធ្វើឡើងនៅសួនច្បារមាត់ទន្លេបាសាក់ក្រុងតាខ្មៅ ដោយមានការចូលរួម ពីសំណាក់ ឯកឧត្ដម ជាសមាជិករដ្ឋសភា តំណាងកាកបាទក្រហមកម្ពុជា ឯកឧត្ដម លោកជំទាវ សមាជិកក្រុមប្រឹក្សាខេត្ត គណ:អភិបាលខេត្ត និងមន្ត្រីអ្នកមុខអ្នកការជាច្រើនរូបទៀត។

នៅក្នុងឱកាសដ៏អធិកអធម ក្នុងពិធីប្រកាស ព្រឹត្តិការណ៍សង្ក្រាន្តខេត្តកណ្តាល រដ្ឋបាលខេត្ត បានរៀបចំបង្ហាញនូវផ្ទាំងទស្សនីយភាព និងទិដ្ឋភាពដង្ហែរក្បួន តាមផែននិមួយៗ ចំនួន១២ផែន រួមមាន៖
ទី១ ផែនវប្បធម៌, ទី២ ផែនឆៃយ៉ាំ, ផែនទី៣ ផែនរបាំត្រុដិ, ផែនទី៤ផែន ល្ខោនខោល វត្តស្វាយ, ទី៥ល្ខោនពោលស្រី វត្តកៀនស្វាយក្រៅ, ផែនទី៦ផែនកីឡាបុកកាតោ, ផែនទី៧ផែនក្រម៉ាយុវជន, ផែនទី៨គឺយុវជនកីឡាបាលទាត់, ផែនទី៩គឺផែនយុវជនកីឡាបាល់ទះ, ផែនទី១០គឺផែននារីជាជួរ, ផែនទី១១គឺផែននារីខ្លែងឯក និងផែនទី១២គឺផែន រដ្ឋបាលក្រុងតាខ្មៅ។

ថ្លែងក្នុងពិធីនេះ ឯកឧត្តម គង់ សោភណ្ឌ័ អភិបាលខេត្ត បានលើកឡើងពីប្រវត្តិប្រពៃណីទំនៀមទម្លាប់បុណ្យចូលឆ្នាំថ្មី និងបានបង្ហាញ នូវការជឿជាក់ របស់ប្រជាជនយើង លើការដឹកនាំរបស់រាជរដ្ឋាភិបាល ដែលមានសម្តេចតេជោសែនជាប្រមុខដឹកនាំ។ឯកឧត្តមបានបញ្ជាក់ពីតម្លៃសន្តិភាព ដែលបានផ្តល់នូវ ភាពសុខសាន្តដូចសព្វថ្ងៃនេះ ដើម្បីផ្តល់អោយប្រជាជនយើងមាន ឱកាសដើរកំសាន្តគ្រប់ទីកន្លែង ប្រកបដោយសុខសុវត្តិភាព។

ជាមួយគ្នានោះ ឯកឧត្ដម បានអំពាវនាវ ដល់អាជីវករ ប្រជាជន ភ្ញៀវជាតិនិងអន្តរជាតិ ដែលបានចូលរួមកំសាន្ត សប្បាយ ក្នុងឱកាសចូលឆ្នាំថ្មី នេះ សូមចូលរួមថែរក្សាបរិស្ថាន អានាម័យទាំងងអស់គ្នា ដោយប្រកាន់ខ្ជាប់នៅទិសស្លោក « ទីក្រុងស្អាត រមណីយដ្ឋានស្អាត សេវាស្អាត និងបដិសណ្ឋារកិច្ចល្អ»។

ជាមួយគ្នានោះរដ្ឋបាលខេត្តកណ្តាលបានរៀបចំអោយមាន ការបណ្តែតគោលលើផ្ទៃទឹក ការបង្ហោះគោមលើអាកាស និងបាញ់កាំជ្រួច ដើម្បីអបអរសាទរ បុណ្យចូលឆ្នាំថ្មី ឆ្នាំ ខាលចត្វាស័ក ព. ស២៥៦៦។
ថ្នាក់ដឹកនាំក្រុមប្រឹក្សា ខេត្តកណ្ដាល ថ្នាក់ដឹកនាំ រដ្ឋបាលខេត្ត និងមន្ត្រីអ្នកមុខអ្នកការ ជាច្រើនរូបទៀត បានចូលរួមពិធី ដ៍អធិកអធមនេះ។

គួរបញ្ជាក់ថា៖ ការបណ្តែតកន្ទោង ឬគោមទឹក មានការពាក់ពន្ធ័ និងប្រវត្តិនូវទំនៀមទម្លាប់ ប្រពៃណី និងជំនឿរបស់ប្រជាជនខ្មែរ តាំងតែពី បូរាណកាល មកម៉្លេះ ក្នុងគោលបំណង ដើម្បីជម្រុះនូវ ឧបទ្រុពចង្រៃ ទាំងឡាយចោល និងនាំមកនូវសេចក្តីសុខ ព្រមទាំងលាភសំណាង ដល់ប្រជាជនយើង នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។
ឯពិធីបង្ហោះគោម លើអាកាស គឺជាការបូជាដល់គុណ បុណ្យបារមី វត្ថុស័ក្ដសិទ្ធិ សូមថែរក្សាសត្វលោក ឲ្យបានសុខ គ្រប់ប្រការ ក្នុងឳកាសឆ្នាំចាស់ ឆ្លងចូលឆ្នាំថ្មី អ្វីៗល្អប្រសើរ កំចាត់បង់ទៅនូវ ទុក្ខសោក រោគភ័យ ផងទាំងឡាយ កុំបីកើតមានឡើយ។ចំណែក ការរៀបចំបាញ់កាំជ្រួច គឺធ្វើឡើង ដើម្បីអបអរសាទរ ឆ្នាំថ្មី និងអបអរសាទរ លទ្ធផលដែល ខេត្តសំរេចបាន នូវសមិទ្ធិផលធំៗជាច្រើន ក្នុងរយ:ពេលឆ្នាំកន្លងមកនេះ៕