រដ្ឋបាលខេត្តរតនគិរី រៀបចំរួចជាស្រេចទទួលភ្ញៀវទេសចរ និងពលរដ្ឋក្នុងខេត្ត សប្បាយរីករាយក្នុងឱកាសពិធីបុណ្យចូលឆ្នាំថ្មី

(រតនគិរី)៖ នៅក្នុងឱកាស នៃការពិនិត្យមើល ការរៀបចំតុបតែងលម្អនៅបរិវេណមន្ទីរវប្បធម៌ និងវិចិត្រសិល្បៈខេត្ត ដែលជាកន្លែងប្រារព្ធពិធីសង្រ្កាន្តរតនគិរី ២០២២ នាថ្ងៃទី១១ ខែមេសា ឆ្នាំ២០២២នេះ លោកញ៉ែម សំអឿន អភិបាលខេត្តរតនគិរី បានលើកឡើងថា រដ្ឋបាលខេត្តរតនគិរី បានរៀបចំរួចជាស្រេចដើម្បីទទួលភ្ញៀវទេសចរជាតិ-អន្តរជាតិ និងប្រជាពលរដ្ឋក្នុងខេត្តសប្បាយរីករាយក្នុងឱកាសពិធីបុណ្យចូលឆ្នាំឆ្នាំខាល ចត្វាស័ក ព.ស២៥៦៦ គ.ស២០២២ មានដូចជាការតុបតែងភ្លើងពណ៌ នៅតាមទីសាធារណៈ និងតាមដងវិថីធំៗ ក្នុងក្រុងបានលុង, ការសម្អាតបរិស្ថាន, ការដោតទង់ជាតិ, ទង់ជ្វាលា, ទង់សាសនា, ការរៀបចំដាក់ភ្លើងពណ៌តាមមន្ទីរអង្គភាពជុំវិញខេត្ត និងតាមបណ្តាយ និងទទឹងវិថីធំៗជាដើម។

លោកអភិបាលខេត្តបន្តថា សង្រ្កាន្តរតនគិរីរយៈពេល ៣ថ្ងៃចាប់ពីថ្ងៃទី១៤-១៥ -១៦ នឹងមានការដង្ហែរក្បួនមហាសង្ក្រាន្ត ចេញពីវត្តឥសាន្តរតនារាមឆ្ពោះមន្ទីរវប្បធម៌ ដើម្បីទទួលទេវតាឆ្នាំថ្មី មានការប្រគុំតន្ត្រីសម័យ និងរាំលេងកំសាន្តសប្បាយព្រមទាំងមានបាញ់កាំជ្រួច ដើម្បីអបអរសាទរបុណ្យចូលឆ្នាំថ្មី ព្រមទាំងមានកម្មវិធីល្បែងប្រជាប្រិយ និងល្បែងកំសាន្តប្រពៃណីខ្មែរដូចជាចោលឈូង, បោះអង្គុញ,ចាប់កូនខ្លែង, ទាញព្រ័ត្រ, លោតបាវ, វាយក្អម, ប្រណាំងកង់យឺត ការតាំងពិព័រណ៍ លក់ផលិតផលផ្សេងៗផងដែរ។

លោកអភិបាលខេត្តបន្ថែមថា ការបង្កើតនូវព្រឹត្តិការណ៍សង្ក្រាន្តនេះ ជាផ្នែកមួយផ្តល់ឱកាស ដល់យុវជន ប្រជាពលរដ្ឋ ភ្ញៀវទេសចរជាតិ និងអន្តរជាតិ បានស្វែងយល់ នូវភាពសម្បូរបែប នៃវប្បធម៌ អរិយធម៌ ទំនៀមទំលាប់ ប្រពៃណី និង សាសនា របស់ព្រះរាជាណាចក្រកម្ពុជាយើង ព្រមទាំងបន្តពង្រីកកិត្យានុភាព របស់ជាតិខ្មែរនៅ លើឆាកអន្តរជាតិ ដែលនេះ គឺជាការរួមចំណែកក្នុងការបំផុសគំនិត ស្មារតីយុវជន ប្រជាជនឲ្យចេះរួមកម្លាំងគ្នា សាមគ្គីគ្នា ជាធ្លុងមួយ ជាគ្រួសារខ្មែរតែមួយ ក្នុងមោទនភាពជាតិខ្មែរ និងស្មារតីអភិរក្ស អភិវឌ្ឍន៍ វប្បធម៌ជាតិ អត្តសញ្ញាណ ជាតិខ្មែរ ឲ្យបានគង់វង្ស រីកចំរើនទៅមុខក្រោមម្លប់នៃសន្តិភាព៕