មន្ទីរសាធារណការ និងដឹកជញ្ជូន ខេត្តកណ្តាល បានបើកសន្និបាតបូកសរុបលទ្ធផលការងារឆ្នាំ២០២១ និងលើកដៅការងារឆ្នាំ២០២២
ខេត្តកណ្ដាល៖ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល បានគូសបញ្ជាក់ថា សន្និបាតបូកសរុបការងាររបស់មន្ទីរ សាធារណៈការ និងដឹកជញ្ជូនខេត្តកណ្ដាល គឺមានសារៈសំខានបំផុត សម្រាប់អង្គភាពនីមួយៗដើម្បីស្វែងយល់ និងផ្លាស់ប្តូរបទពិសោធន៍ពីចំណុចវិជ្ជមាន អវិជ្ជមាន បញ្ហាប្រឈម និងការដោះស្រាយ ដើម្បីទទួលបានជោគជ័យក្នុងការអនុវត្តតួនាទីភារកិច្ចរបស់ខ្លួន។
ការគូសបញ្ជាក់នេះ បានធ្វើឡើង នៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២១ និងលើកដៅការងារឆ្នាំ២០២២ របស់មន្ទីរសាធារណការ និងដឹកជញ្ជូន ខេត្តកណ្តាល នៅព្រឹកថ្ងៃទី៨ ខែមេសា ឆ្នាំ២០២២ ដោយមានការចូលរួមពី លោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្ត មន្ទីរពាក់ព័ន្ធ កងកម្លាំងទាំងបី អជ្ញាធរក្រុង-ស្រុក ឃុំ-សង្កាត់ និងមន្ត្រី នៃមន្ទីរសាធារណៈការ និងដឹកជញ្ជូនខេត្តជាង ២៧០នាក់។
ឯកឧត្តមអភិបាលខេត្ត បានមានប្រសាសន៍បន្តថា លទ្ធផលដែលនឹងទទួលបានពីសន្និបាតនាថ្ងៃនេះគឺជាគន្លឹះ សម្រាប់អនុវត្តសកម្មភាពអាទិភាពសំខាន់ៗ នៅឆ្នាំក្រោយៗទៀត ស្របតាមគោលនយោបាយរបស់រាជរដ្ឋាភិបាល មានសង្គតិភាព ជាមួយនឹងគោលដៅអភិវឌ្ឍន៍របស់ រដ្ឋបាលខេត្ត និងជាពិសេស ដើម្បីចូលរួមសម្រេចនូវផែនការយុទ្ធសាស្ត្រចតុកោណដំណាក់កាលទី៤ ក្នុងនីតិកាលទី៦ នៃរដ្ឋសភា ដែលមាន សម្តេចអគ្គមហាសេនាបតីតជោ ហ៊ុន សែន ជានាយករដ្ឋ មន្ត្រី នៃព្រះរាជាណាចក្រកម្ពុជា បានកំណត់យក ធនធានមនុស្ស ទឹក ផ្លូវ ភ្លើង ជាអាទិភាព ដើម្បី លើកកម្ពស់ផាសុខភាព និង ជីវភាពរស់នៅជូនប្រជាពលរដ្ឋ ពោលគឺ មានផ្លូវ មានស្ពាន មានក្តីសង្ឃឹម និងមាន ការអភិវឌ្ឍ។
ក្នុងពិធីនេះដែរ ឯកឧត្តម បានស្នើឱ្យមន្ទីរសាធារណការ និងដឹកជញ្ជូនខេត្ត ត្រូវ បន្តខិតខំបំពេញការងារ ឱ្យអស់ពីសមត្ថភាព លទ្ធភាព ទេពកោសល្យ និងគំនិតច្នៃប្រឌិតខ្ពស់ រស់រវើក ក្នុងស្មារតីយកចិត្តទុកដាក់ដឹកនាំ មានការទទួលខុសត្រូវខ្ពស់ចំពោះថ្នាក់ដឹកនាំក្រសួងសាធារណការ និងដឹកជញ្ជូន និងរដ្ឋបាលខេត្ត លើវិស័យការងារ ដែលខ្លួនទទួលខុសត្រូវ ព្រមទាំងខិតខំព្យាយាមដោះស្រាយរាល់បញ្ហាប្រឈមនានាឱ្យអស់ពីលទ្ធភាព និងស្នើសុំយោបល់ ឬគោលការណ៍ដោះស្រាយពីថ្នាក់ដឹកនាំក្រសួងសាមី និងថ្នាក់ដឹកនាំខេត្ត ក្នុងករណីចាំបាច់ ។
មន្ទីរត្រូវមានកិច្ចសហការ និងទំនាក់ទំនងការងារល្អ ជាមួយមន្ទីរ អង្គភាព ស្ថាប័ន ដៃគូអភិវឌ្ឍន៍នានា ជាពិសេសអាជ្ញាធរគ្រប់លំដាប់ថ្នាក់ ដើម្បីអនុវត្តការងារឱ្យទទួលបានលទ្ធផលជោគជ័យ និងមានប្រសិទ្ធភាព។ ការងារសំខាន់គឺត្រូវយកចិត្តទុកដាក់បំពេញតួនាទីជាសេនាធិការឱ្យរដ្ឋបាលខេត្ត លើការងារវិស័យសាធារណការ និងដឹកជញ្ជូន និងបំពេញការងារតាមភារកិច្ច តួយ៉ាង ហេដ្ឋារចនាសម្ព័ន្ធស្ពាន ផ្លូវថ្នល់ ផ្លូវកៅស៊ូ ផ្លូវបេតុង លូ ស្តារប្រព័ន្ធលូ និងការផ្តល់សេវារដ្ឋបាល និងសេវាសាធារណៈជូនប្រជាពលរដ្ឋ ឱ្យបានល្អប្រសើរ ។
បន្ថែមពីលើនេះ មន្ទីរត្រូវមានផែនការ ការងារច្បាស់លាស់ ចំគោលដៅ និងការអភិវឌ្ឍន៍ធនធានមនុស្ស ដើម្បីគុណភាព ប្រសិទ្ធភាពការងារ និងអ្នកបន្តវេន ។
