ឯកឧត្តម គង់ សោភ័ណ្ឌ អញ្ជើញសម្ពោធផ្លូវបេតុងអាមេប្រវែង ១០០០ម៉ែត្រ ជាកាដូជូនដល់បងប្អូនប្រជាពលរដ្ឋនៅស្រុកស្អាង
(ខេត្តកណ្តាល) ៖ នារសៀល ថ្ងៃពុធ ៥កើត ខែចេត្រ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៦ ខែមេសា ឆ្នាំ២០២២ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្តាល អញ្ជើញចូលរួមជាអធិបតីភាពក្នុងពិធីសម្ភោធដាក់ឲ្យប្រើប្រាស់ជាផ្លូវការផ្លូវបេតុងអាមេប្រវែង១០០០ម៉ែត្រ ទទឹង៤ម៉ែត្រ ស្ថិតនៅភូមិព្រែកប៉ាន និងភូមិព្រែកបាឡាត់ឆឹង ឃុំត្រើយស្លា ស្រុកស្អាង ខេត្តកណ្ដាល។
ក្នុងពិធីសម្ភោធនោះដែរ មានការអញ្ជើញចូលរួមពី ឯកឧត្តម លោកជំទាវ អភិបាលរង នៃគណៈអភិបាលខេត្ត កងកម្លាំងទាំងបីរបស់ខេត្ត លោក លោកស្រី ប្រធានមន្ទីរ អង្គភាពនានាជុំវិញខេត្ត យុវជន សសយក យុវជនកាយរឹទ្ធ យុវជនកាកបាទក្រហម និងប្រជាពលរដ្ឋ នៅឃុំត្រើយស្លា ស្រុកស្អាង។
សម្ធិផលទាំងនេះ គឺជាសក្ខីភាពនៃការរីកចម្រើនឥតឈប់ឈររបស់រដ្ឋបាលខេត្តកណ្តាល ជាពិសេសរដ្ឋបាលស្រុកស្អាង ក្រោមការដឹកនាំពោរពេញទៅដោយចក្ខុវិស័យវែងឆ្ងាយ និងភាពប្រាកដនិយម របស់រាជរដ្ឋាភិបាល ជាពិសេសការខិតខំយកចិត្តទុកដាក់ពីសុខមាលភាពរបស់ប្រជាពលរដ្ឋ រួមទាំងការកសាងហេដ្ឋារចនាសម្ព័ន្ធ ប្រព័ន្ធគមនាគមន៍នានានៅក្នុងខេត្តកណ្តាល។
«ឯកឧត្តម គង់ សោភ័ណ្ឌ សូមចូលរួមអបអរសាទរដល់បងប្អូនប្រជាពលរដ្ឋ នៅក្នុងស្រុកស្អាង ដែលទទួលបាននូវផ្លូវបេតុងជាចំណងដៃថ្មី មុនពេលពិធីបុណ្យចូលឆ្នាំថ្មីប្រពៃណីជាតិ ឆ្នាំខាល ខាងមុខនេះ សម្រាប់ការធ្វើដំណើរប្រកបមុខរបរចិញ្ចឹមជីវិតប្រចាំថ្ងៃ»
សូមអរគុណសន្តិភាព! ដែលនាំមកនូវការអភិវឌ្ឍលើគ្រប់វិស័យ៕
