លោកឧត្តមសេនីយ៍ទោ សិទ្ធិ ឡោះ បើកកិច្ចប្រជុំប្រចាំត្រីមាសទី១ និងបានដាក់ចេញផែនការអនុវត្តន៍បន្ត ដល់នគរបាលទូទាំងខេត្តបន្ទាយមានជ័យ!
ខេត្តបន្ទាយមានជ័យ៖នៅរសៀលថ្ងៃទី២២ ខែមីនា ឆ្នាំ២០២២នេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំមន្ត្រីក្រោមឱវាទ ប្រជុំបូកសរុបលទ្ធផលការងារប្រចាំត្រីមាសទី១ ឆ្នាំ២០២២ និងបានដាក់ចេញផែនការអនុវត្តការងារបន្តរបស់ស្នងការដ្ឋាននគរបាលខេត្ត។
កិច្ចប្រជុំនេះ មានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង លោកនាយ នាយរង ការិយាល័យជំនាញទាំង៣១ លោកអធិការនគរបាលស្រុក-ក្រុងទាំង៩ និង លោកមេញ្ជាការវរ:សេនាតូចនគរបាលការពារព្រំដែនគោកទាំង៤ ផងដែរ។
លោកឧត្តមសេនីយ៍ត្រី រ៉ែម វីរ: ស្នងការរងផែនការងារសេនាធិការ បានអានរបាយការណ៍បូកសរុបលទ្ធផលការងារប្រចាំត្រីមាសទី ១ កន្លងមក។ក្នុងនោះលោកឧត្តមសេនីយ៍ស្នងការរងក៏បានផ្សព្វផ្សាយសេចក្ដីណែនាំលេខ០០៤ ស.ណ.ន ចុះថ្ងៃទី១៦ ខែមីនា ឆ្នាំ២០២២ របស់អគ្គស្នងការដ្ឋាននគរបាលជាតិ ស្ដីពីការពង្រឹងសមត្ថភាពកម្លាំងប្រជាការពារ ដើម្បីត្រៀមបើកវគ្គបណ្តុះបណ្តាល ហ្វឹកហ្វឺននាពេលឆាប់ៗនេះ នៅតាមអធិការដ្ឋាននគរបាលក្រុង/ស្រុក ដើម្បីក្លាយជាកម្លាំងជំនួយ ក្នុងការរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម នៅតាមមូលដ្ឋាន ។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក៏បានកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់កម្លាំងគ្រប់អង្គភាពទទួលបានលទ្ធផលល្អប្រសើរនាពេលកន្លងមក។ លោកឧត្តមសេនីយ៍ ស្នងការ ក៏បានដាក់ចេញនូវផែនការមួយចំនួនដើម្បីពង្រឹងសន្តិសុខ សណ្តាប់ធ្នាប់សង្គម បង្ការ បង្ក្រាប បទល្មើសផ្សេងៗ ឱ្យបានទាន់ពេលវេលា ប្រកបដោយប្រសិទ្ធិភាពតម្លាភាព យុត្តិធម៌។ ក្រៅពីនេះកម្លាំងទាំងអស់ត្រូវមានសាមគ្គីផ្ទៃក្នុង ត្រូវសហការជាមួយជំនាញ និងអាជ្ញាធរពាក់ពន្ធ័ ត្រូវចាត់កម្លាំងប្រចាំការ២៤ម៉ោងលើ២៤ ដើម្បីត្រៀម បង្ការ បង្ក្រាប រាល់បទល្មើសផ្សេងៗ និងផ្តល់សេវាសាធារណ:ជូនពលរដ្ឋក្នុងភូមិសាស្ត្រខេត្តឲ្យបានទាន់ពេលវេលានិងត្រូវបន្តអនុវត្ត វិធានរបស់ក្រសួងសុខាភិបាល ៣កុំ ៣ការពារ ឲ្យបានខ្ជាប់ខ្ជួន ៕
