ខេត្តបាត់ដំបង ៖ ព្រឹកថ្ងៃទី ២១ ខែមេសា ឆ្នាំ២០១៧ ឯកឧត្តម បណ្ឌិត ជាម ច័ន្ទ សោភ័ណ អភិបាលស្តីទី នៃគណៈអភិបាលខេត្ត និងជាអនុប្រធានអចិន្ត្រៃយ៍ អនុគណៈកម្មការខេត្ត ដើម្បីទប់ស្កាត់ និងបង្ក្រាបបទល្មើសនេសាទនៅបឹងទន្លេសាប ក្នុងដែនសមត្ថកិច្ចខេត្តបាត់ដំបង បានដឹកនាំកិច្ចប្រជុំពិភាក្សាលើការងារទប់ស្កាត់ និងបង្ក្រាបបទល្មើសនេសាទ នៅក្នុងខេត្តបាត់ដំបង ។ ក្នុងនោះ ក៏មានការចូលរួមពី មន្ត្រីជំនាញពាក់ព័ន្ធ រួមមានព្រះរាជ្ញារង កងកម្លាំងប្រដាប់អាវុធ មន្ទីរអង្គភាពពាក់ព័ន្ធ អភិបាលស្រុកចំនួន៤ ដែលជាប់នឹងបឹងទន្លេសាប នៅសាលប្រជុំសាលាខេត្តបាត់ដំបង ។
លោក ជូង សុភា នាយខណ្ឌរដ្ឋបាលជលផលបាត់ដំបង មានប្រសាសន៍ថា បទលល្មើសនេសាទដែលបង្ក្រាបបានចាប់ពីថ្ងៃទី៨ ខែធ្នូ ឆ្នាំ២០១៦ ដល់ថ្ងៃទី១៩ ខែមេសា ឆ្នាំ២០១៧ នេះមានចំនួន ១៣១ករណី ព្រលែងត្រី ក្នុងបឹងធម្មជាតិចំនួន ៣២៥៨គីឡូក្រាម ។
ឯកឧត្តមអភិបាលស្តីទី បានមានប្រសាសន៍ ស្នើដល់មន្ទីរ អង្គភាព និងសមត្ថកិច្ចជំនាញដែលពាក់ព័ន្ធត្រូវសហការគ្នាឲ្យបានល្អប្រសើរ ក្នុងការចុះទប់ស្កាត់ និងបង្ក្រាបបទល្មើសនេសាទឲ្យដូចភ្លៀងរលឹម រាល់ឧបករណ៍នេសាទខុសច្បាប់ត្រូវដុតបំផ្លាញចោល និងវែកមុខរកមេខ្លោង ប្រមូលវត្ថុតាង និងដាក់ទោសទៅតាមផ្លូវច្បាប់ និងសុំឲ្យសហគមន៍នេសាទជួយសហការ និងរាយការណ៍ដល់សមត្ថកិច្វជាបន្ទាន់ ក្នុងករណីមានបទល្មើស ៕
