សម្តេចតេជោ ហ៊ុន សែន ណែនាំឲ្យក្រសួងសុខាភិបាលពិចារណាផ្តល់ភាពស្របច្បាប់ លើការវះកាត់ប្តូរក្រលៀននៅក្នុងប្រទេស តែមិនអនុញ្ញាតឲ្យមានការជួញដូរ 

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២១ ខែមីនា ឆ្នាំ២០២២នេះ បានណែនាំឱ្យក្រសួងសុខាភិបាល សិក្សាពីលទ្ធភាពក្នុងការវះកាត់ ដើម្បីប្តូរក្រលៀនស្របច្បាប់នៅក្នុងប្រទេស ខណៈកម្ពុជាមានសមត្ថភាព ធ្វើយ៉ាងណាឱ្យការផ្លាស់ប្តូរនេះ មានភាពស្របច្បាប់។

សម្តេចតេជោ ហ៊ុន សែន បានបញ្ជាក់ថា មានប្រជាពលរដ្ឋខ្លះបានខូចក្រលៀន ហើយត្រូវការដូរក្រលៀន តម្រូវឲ្យចេញទៅក្រៅប្រទេស ប៉ុន្តែចាប់តាំងពីឆ្នាំ២០១០មក កម្ពុជាមានសមត្ថភាពក្នុងការដូរក្រលៀននេះ ដែលមាននៅមន្ទីរពេទ្យព្រះកេតុមាលា [មន្ទីរពេទ្យកងទ័ព] មានលទ្ធភាពនឹងដូរបាន តែគ្រាន់តែមិនមានការផ្សព្វផ្សាយប៉ុណ្ណោះ។

ការថ្លែងរបស់សម្តេចតេជោនាយករដ្ឋមន្ត្រី ធ្វើឡើងក្នុងឱកាសអញ្ជើញសម្ពោធដាក់ឱ្យប្រើប្រាស់ មន្ទីរពេទ្យមិត្តភាពកម្ពុជា-ចិន ព្រះកុសុមៈ (ពេទ្យលោកសង្ឃ) ដែលត្រូវបានសាងសង់ និងបំពាក់បរិក្ខារ ដោយចំណាយថវិកាជាង៨០លានដុល្លារអាមេរិក ជាជំនួយឥតសំណងរបស់រដ្ឋាភិបាលចិន។

សម្តេចបានថ្លែងយ៉ាងដូច្នេះថា «បងប្អូនប្រជាពលរដ្ឋរបស់យើងមួយចំនួន បានចេញទៅប្រទេសក្រៅ ដែលត្រូវចំណាយលុយច្រើន អីចឹងទេខ្ញុំមិនដឹងថា តើថ្ងៃក្រោយគួរយើងធ្វើយ៉ាងម៉េចអំពីបញ្ហានេះ ព្រោះបើយើងមិនឲ្យដូរ ក៏គាត់ទៅដូរនៅប្រទេសក្រៅ អីចឹងទេ តើយើងគួរដោះស្រាយបញ្ហានេះ ក្នុងប្រទេសរបស់យើងដោយផ្តល់លទ្ធភាព ឲ្យក្លាយជាភាពស្របច្បាប់តែម្តង សូមឲ្យគិតគូរលើបញ្ហានេះ»។

សម្តេចបន្ថែមថា «កន្លងទៅគឺមានជនជាតិបរទេស ដែលមកធ្វើការដូរក្រលៀន នៅក្នុងប្រទេសរបស់យើង មានពេលមួយនោះ បើសិនខ្ញុំមិនអន្តរាគមន៍ទាន់ពេលទេ ប្រហែលជាអ្នកដូរក្រលៀន គឺត្រូវស្លាប់។ ពេលនោះមានសមត្ថកិច្ចរបស់យើង គាត់ថាជាការរកស៊ីលក់សិរីរាង្គមនុស្ស តែការពិតសាច់ញាតិរបស់គេនាំមក។ ពេលកំពុងវះកាត់ដូរក្រលៀនស្រាប់តែសមត្ថកិច្ចទៅចាប់ ប្រសិនបើគ្មានអន្តរាគមន៍ទាន់ពេលទេ អ្នកដែលត្រូវប្តូរក្រលៀន និងអ្នកបរិច្ចាគក្រលៀន នឹងស្លាប់ទាំង២នាក់។ សូមឲ្យរដ្ឋមន្ត្រីក្រសួងសុខាភិបាល របស់យើងធ្វើការពិចារណាឲ្យវាទៅជាស្របច្បាប់តែម្តង»។

សម្តេចតេជោ ហ៊ុន សែន បានលើកឡើងថា សម្តេចធ្លាប់ឧបត្ថម្ភថវិកាដល់អ្នកមានបញ្ហាសុខភាព ដែលត្រូវទៅប្តូរសិរីរាង្គ នៅក្រៅប្រទេសប្រហែលជាង១០នាក់ហើយ ដោយពួកគេមានសុខភាពប្រសើរឡើងវិញ។

បើទោះបីជាសម្តេចបញ្ជាឲ្យរដ្ឋមន្ត្រីសុខាភិបាល សិក្សាពិនិត្យលទ្ធភាព ក្នុងការអនុញ្ញាតឲ្យមានការវះកាត់ប្តូរក្រលៀន ដោយស្របច្បាប់ក្តី ប៉ុន្តែសម្តេចតេជោប្រមុខរាជរដ្ឋាភិបាល មិនអនុញ្ញាតឲ្យមានការជួញដូរនោះទេ ត្រូវរកចេញពីក្រុមគ្រួសាររបស់អ្នកជំងឺ ឬអ្នកដែលស្ម័គ្រចត្តិ។

បើតាមការបញ្ជាក់របស់សម្តេចតេជោនាយករដ្ឋមន្ត្រី នៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលទើបសម្ពោធនេះ មានសមត្ថភាពក្នុងការវះកាត់ប្តូរក្រលៀន និងប្តូរថ្លើម រួមទាំងអវៈយវៈមួយចំនួនទៀតផងដែរ។

សូមជម្រាបថា មន្ទីរពេទ្យមិត្តភាពកម្ពុជា-ចិន ព្រះកុសុមៈ មានបំពាក់ដោយឧបករណ៍វេជ្ជសាស្ត្រទំនើបៗនេះ មានគ្រែសម្រាប់ព្យាបាលអ្នកជំងឺរហូតដល់ទៅ ៤០០គ្រែ។ លោកសាស្ត្រាចារ្យវេជ្ជបណ្ឌិត តាន់ សុគន្ធ ប្រធានមន្ទីរពេទ្យមិត្តភាពកម្ពុជា-ចិន ព្រះកុសុមៈ បានឱ្យដឹងថា មន្ទីរពេទ្យនេះ មានបន្ទប់វះកាត់ចំនួន៩ ហើយមានសមត្ថភាពវះកាត់ឆ្អឹង ប្តូរក្បាលឆ្អឹង ប្តូរតម្រង់នោម វះកាត់បេះដូង វះកាត់សួត និងអាចដូរអវៈយវៈ ដូចជាតម្រោងនោម និងថ្លើមជាដើម៕