ខេត្តរតនគីរី ៖ ប្រភពព័ត៌មានឲ្យដឹងថាមានមេឈ្មួញកាប់ បំផ្លាញព្រៃឈើ និងរកស៊ីដឹកឈើដឹកជញ្ជូនឈើធំៗដែលគេស្គាល់ថា ឈ្មោះអាន ទូច (ជាប្តី) និងប្រពន្ធឈ្មោះហាក់ស៊ីណាត បានដឹកជញ្ជូនឈើចេញពីស្រុកអូរជុំ និងស្រុកវ៉ើនសៃ យ៉ាងផ្លូកទឹកផ្លូកដីចូលក្រុងបានលុងខេត្តរតនគីរីកាត់មុខផ្ទះលោកនូវតារាហៅឈុននាយការិយាល័យប្រឆាំងបទល្មើសសេដ្ឋកិច្ចជារាងរាល់ថ្ងៃប៉ុន្តែលោកនាយរូបនេះធ្វើមិនដឹង ។
ចំណែកមេឈ្មោះហ៊ូវជីវ៉ៃបានដឹកឈើចេញពីស្រុកអូរជុំ និងស្រុកវ៉ើនសៃស្រុកតាវែង ស្រុកកូនមុំ ស្រុកលំផាត់ យ៉ាងគគ្រឹគគគ្រេងតាមផ្លូវជាតិលេខ៧៨ឆ្ពោះទៅកាន់ប្រទេសវៀតណាមយ៉ាងរលូនដោយការបើកភ្លើងខៀបពីលោកនូវតារាហៅឈុននាយការិយាល័យប្រឆាំងបទល្មើសសេដ្ឋកិច្ចខេត្តរតនគីរី។
ហើយសកម្មភាពកាប់បំផ្លាញព្រៃឈើ និងដឹកជញ្ជូនឈើ ទាំងនោះបានធ្វើឱ្យប្រជាពលរដ្ឋទូទាំងប្រទេស ជាពិសេសប្រជាពលរដ្ឋក្នុងខេត្តរតនគីរី បានរិះគន់យ៉ាងខ្លាំងចំពោះអាជ្ញាធរ ថ្នាក់ស្រុក ថ្នាក់ខេត្ត និងមន្ត្រីជំនាញរដ្ឋបាលព្រៃឈើ ហើយសមត្ថកិច្ចពាក់ព័ន្ធមួយចំនួនមិនមានការបង្ក្រាបពីសំណាក់ឈ្មួញ រកស៊ីកាប់បំផ្លាញព្រៃឈើ និងដឹកឈើទាំងនោះទេ តែបណ្តែតបណ្តោយឱ្យឈ្មួញរកស៊ីកាប់បំផ្លាញព្រៃឈើ និងដឹកជញ្ជូនឈើ ស្រេចតែអំពើចិត្ត ប្រហែលជាអាជ្ញាធរថ្នាក់ស្រុក ថ្នាក់ខេត្ត និងមន្ត្រីជំនាញរដ្ឋបាលព្រៃឈើ ព្រមទាំងសមត្ថកិច្ចពាក់ព័ន្ធមានការឃុបឃិតគ្នាជាមួយពួកកាប់បំផ្លាញព្រៃឈើ នឹងដឹកឈើទាំងនោះជាមិនខានឡើយ ។
ប្រភពព័ត៌មានដដែលបានឱ្យដឹងថា រហូតមកដល់ពេលនេះ មិនមានអាជ្ញាធរមន្ត្រីជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធណាហ៊ានបង្ក្រាបឈើដែលកាប់បំផ្លាញព្រៃឈើ និងដឹកជញ្ជូនយ៉ាងពេញបន្ទុកក្នុងស្រុកអូរជុំ និងស្រុកវ៉ើនសៃ ហើយស្រុកនានាមិនមានអាជ្ញាធរមន្ត្រីជំនាញរដ្ឋបាលព្រៃឈើអើពើនោះឡើយ តើឯកឧត្តម អភិបាលនៃគណៈអភិបាលខេត្ត, ឯកឧត្តម ស្នងការនគរបាលខេត្ត និងឧត្តមមេបញ្ជាការកងរាជអាវុធហត្ថខេត្ត ទៅណាអស់ហើយ។
ពាក់ព័ន្ធករណីការដឹកជញ្ជូនឈើ ខុសច្បាប់របស់ឈ្មួញធំៗខាងលើ កាលថ្ងៃទី១២ ខែមេសា ឆ្នាំ២០១៧ អ្នកយកព័ត៌មានបានទូរស័ព្ទទៅលោកផាន់ នគរបាលសេដ្ឋកិច្ច កូនចៅលោកឈុន គាត់ឆ្លើយថាជាប់រវល់ ចុះទៅ ស្រុកអូរយ៉ាដាវ។ចំណែកលោកនូវ តារាហៅឈុន នាយការិយាល័យ នគរបាលប្រឆាំងបទល្មើសសេដ្ឋកិច្ចខេត្ត ពេលទទួលទូរស័ព្ទសុំអន្តរាគមន៍រឿងឡានដឹកឈើ របស់ឈ្មួញអាន ទូចដឹកឈើ ចូលដល់ផ្ទះ លោកឆ្លើយថាគាត់ជាប់រវល់ នៅភ្នំពេញ។ ចំណែកលោកថងសាវុនអភិបាលខេត្តរតនគីរីទូរស័ព្ទមិនចូល។
មតិរិះគន់ថាសមត្ថកិច្ចពាក់ព័ន្ធខាងលើពិតជាបានផលប្រយោជន៍ច្រើនពីឈ្មោះអានទូចនិងឈ្មោះហ៊ូវជីវ៉ៃទើបគេមិនសហការជាមួយសមត្ថកិច្ចជំនាញតូចតាចជាពិសេសអ្នកសារព័ត៌មានតែម្តង ហើយលោក នូវ តារា ហៅ ឈុន នាយការិយាល័យនគរបាល ប្រឆាំងបទល្មើសសេដ្ឋកិច្ចខេត្ត ក៏បានទទួលប្រាក់ពីឈ្មួញទាំងនោះ១ខែៗ រាប់ពាន់ដុល្លាដែរ ទើបមិនមានការទប់ស្កាត់បន្តិចណាសោះឡើយ ៕
